Foto: ashyq derekkóz
Sonymen birge Pavlodar oblysynda, Soltústik Qazaqstan men Shyǵys Qazaqstan oblystarynyń basym bóliginde, Qostanaı oblysynyń soltústiginde, Aqmola, Qaraǵandy jáne Abaı oblystarynyń soltústik-shyǵysynda jaýyn-shashyn kóbirek túsýi yqtımal. Sondaı-aq Almaty jáne Jambyl oblystarynyń ońtústik jartysynda, Túrkistan oblysynyń ońtústik-shyǵysynda jáne Jetisý óńirinde qar mólsheri qalypty deńgeıden joǵary bolýy múmkin.
Aýa raıy qubylmaly bolady
Qańtar aıynda qar jaýyp, jel kúsheıip, boran men tuman, kóktaıǵaq qubylystary baıqalatyn kezeńder men ashyq ári aıazdy kúnder alma-kezek aýysady.
Elimizdiń batysynda aıdyń alǵashqy onkúndiginde túnde aýa temperatýrasy -10…-18 gradýsqa deıin tómendep, kúndiz -5…-12 gradýs shamasynda bolady. Keıin birtindep jylyný kútiledi.
Soltústik-batys, soltústik jáne ortalyq óńirlerde túngi aýa temperatýrasy -10…-20 gradýstan -3…-8 gradýsqa deıin qubylyp, kúndiz -12 gradýstan +3 gradýsqa deıin jetýi múmkin.
Shyǵys aımaqtarda túnde -2…-18, kúndiz -6…+2 gradýs aralyǵynda saqtalady. Al ońtústik jáne ońtústik-shyǵysta túngi temperatýra -12 gradýstan +5 gradýsqa deıin, kúndiz +8…+10 gradýsqa deıin kóteriledi. Eldiń eń ońtústiginde kúndizgi aýa temperatýrasy +15 gradýsqa jetýi yqtımal.
Qańtardyń ekinshi jartysynda aıaz kúsheıedi
Sınoptıkterdiń boljamynsha, qańtardyń ekinshi jáne úshinshi onkúndikterinde soltústik, soltústik-batys, ortalyq jáne shyǵys óńirlerde sýyq aýa massalarynyń enýine baılanysty kúrt aıaz bolady. Túnde aýa temperatýrasy -25…-35 gradýsqa deıin tómendep, kúndiz -15…-20 gradýsqa deıin sýytýy múmkin.
Batys óńirlerde aıazdy kúnderi túngi temperatýra -20…-27 gradýsqa deıin tómendeıdi. Keı kúnderi kúndiz 0…+5 gradýsqa deıin jylyný yqtımaldyǵy da joq emes.
Al elimizdiń ońtústiginde temperatýra qubylmaly bolady: túnde 0…-20, kúndiz +12…-13 gradýs aralyǵynda saqtalady. Qańtardyń sońyna qaraı keıbir óńirlerde túngi aıaz -30 gradýsqa deıin jetýi múmkin.
Qarsyz qys qalypty jaǵdaıǵa aınala ma?
Aıta keteıik, bıyl qystyń alǵashqy kúnderi elimizdiń kóptegen óńirinde qarsyz ótti. Sınoptıkterdiń aıtýynsha, eger osyndaı aýa raıy saqtalsa, elimiz úshin qar az túsetin nemese qarsyz qys birtindep qalypty qubylysqa aınalýy yqtımal.
