Bul týraly Qazaqstandyq depozıtterge kepildik berý qory habarlady. 2025 jyly jeltoqsan aıynyń sońynda depozıt naryǵynyń barlyq negizgi segmentinde mólsherlemelerdiń ósýi tirkeldi.
Qordyń dereginshe, jeltoqsanda talap etilmeli depozıtter boıynsha mólsherlemeni 2 bank, tolyqtyrýǵa bolatyn merzimdi salymdarda 3 bank, jınaq depozıtterinde 12 bankke deıin kótergen. Eń joǵary ósim merzimdi jáne jınaq depozıtterinde baıqalyp, qysqa merzimge ashylatyn salymdar boıynsha jyldyq tabystylyq 20-20,5 paıyzǵa jetken.
Talap etilmeli depozıtter segmentinde de ósim bar. Jyl basynda eń joǵary mólsherleme 15 paıyz shamasynda bolsa, jyl sońynda 16,9 paıyzǵa deıin artty. Naryqtaǵy ortasha kórsetkish 15,3 paıyzdy qurap, mundaı depozıt usynatyn bankter sany 18-ge jetti.
Qor salymshylarǵa depozıt tańdaǵanda tek joǵary paıyzǵa emes, sharttaryna, qarajatty merziminen buryn alý múmkindigine jáne banktiń turaqtylyǵyna nazar aýdarýǵa keńes beredi.
Kepildendirilgen ótemaqy kólemi teńgedegi jınaq depozıtteri boıynsha 20 mln teńgege deıin, ózge teńgelik salymdarda 10 mln teńgege deıin belgilenip otyr.
