Foto: ashyq derekkóz
Avtokólik júrgizýshileriniń aıtýynsha, qaladaǵy keıbir jol ýchaskelerinde eski jáne jańa jol tańbalary qatar saqtalyp qalǵan. Bul jaǵdaı qozǵalysqa qatysýshylardy shatastyryp, ásirese túngi ýaqytta jáne qolaısyz aýa raıynda jolmen júrýdi qıyndatady.
Júrgizýshiler 13 jáne 15-shaǵynaýdandar arasyndaǵy jol bóligin vıdeoǵa túsirip, onda eski tańbalar tolyq óshirilmeı, jańasymen qabattasyp turǵanyn kórsetken. Olardyń sózinshe, túnde jol syzyqtary nashar kórinedi, bul jol-kólik oqıǵalarynyń qaýpin arttyrady.
Atalǵan máselege qatysty Aqtaý qalasy ákimdigi túsinikteme berdi. Ákimdiktiń málimetinshe, kórsetilgen ýchaskede qozǵalys syzbasy ózgertilip, jańa jol tańbalary salynǵan, al eski tańbalar eki ret qara boıaýmen jabylǵan. Alaıda birneshe jyl boıy jol jabynynda bolǵan eski tańbalardyń ústinen jaǵylǵan boıaý keı jerlerde tozyp, burynǵy syzyqtar qaıta kórinip qalǵan.
Qala ákimdigi qolaıly aýa raıy ornaǵan soń eski jol tańbalaryn qaıtadan boıaý jumystary jalǵasatynyn málimdedi.
