Memleket basshysynyń tapsyrmasy boıynsha 2023 jyldan bastap bes jyl ishinde eń tómengi bazalyq zeınetaqyny eń tómengi kúnkóris deńgeıiniń 70%-na deıin, al eń joǵarǵysyn 120%-ǵa deıin jyl saıyn kezeń-kezeńimen arttyrý máselesi júzege asyrylyp jatyr.
Máselen, 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńgeni (eń tómengi kúnkóris deńgeıiniń 70%-y), eń joǵary mólsheri eń tómengi kúnkóris deńgeıiniń 110%-ynan 118%-yna deıin artyp, 60 005 teńgeni quraıdy.
2019 jyly zeınetkerlik demalysqa shyqqan 70 jastaǵy zeınetkerdiń bıýdjetten tólenetin zeınetaqysynyń mólsheri 2025 jyly 171 588 teńgeni quraǵan, onyń ishinde bazalyq zeınetaqy tólemi – 50 851 teńge, yntymaqty zeınetaqy – 120 737 teńge. 2026 jylǵy 1 qańtardan mólsherdiń kóbeıýine baılanysty osy zeınetkerler úshin zeınetaqynyń jalpy somasy – 192 816 teńgege deıin ulǵaıady, onyń ishinde bazalyq zeınetaqy – 60 005 teńgeni, yntymaqty zeınetaqy – 132 811 teńgeni quraıdy. Atalǵan somalarǵa Biryńǵaı jınaqtaýshy zeınetaqy qory (BJZQ) tólemderi kirmeıtinin atap ótken jón.
Eńbek jáne halyqty áleýmettik qorǵaý mınıstrliginiń dereginshe, 2026 jylǵy 1 qańtardan bastap memlekettik járdemaqylar tómendegideı mólsherde kóbeıedi:
- 1, 2, 3 bala týǵanda beriletin járdemaqy – 149 416 teńgeden 164 350 teńgege deıin, 4 jáne odan da kóp bala týǵanda – 247 716 teńgeden 272 475 teńgege deıin kóbeıedi;
- bala sanyna baılanysty kópbalaly otbasylarǵa beriletin járdemaqy mólsheri 4 balasy bar otbasylar úshin 63 030 teńgeden 69 330 teńgege deıin, 10 balasy barlarǵa – 157 280 teńgeden 173 000 teńgege deıin artady;
- I toptaǵy múgedektigi bar adamdarǵa arnalǵan járdemaqy – 101 702 teńgeden 111 872 teńgege deıin, II toptaǵylarǵa – 81 362 teńgeden 89 498 teńgege deıin, III toptaǵylarǵa – 55 474 teńgeden 61 021 teńgege deıin kóbeıedi.
Sondaı-aq Memlekettik áleýmettik saqtandyrý qorynan (MÁSQ) tólenetin asyraýshysynan aıyrylý jáne eńbek etý qabiletinen aıyrylý boıynsha tólemder de 10%-ǵa artty. Bul tólemder mindetti áleýmettik saqtandyrý júıesine qatysýshylarǵa bıýdjetten tólenetin memlekettik járdemaqylarǵa qosymsha retinde beriledi.
