Sýret: instagram.com/turkistan_oblysy
Álı Bektaev pen Murat Qadyrbek Túrkistan qalasy men Otyrar aýdanynda boldy. Senatorlar Túrkistanda «Turan» arnaıy ekonomıkalyq aımaǵynyń aýmaǵynda ornalasqan «Altyn dala maqta» men «Turkestan textile» óndiristik nysandarynyń jumysymen tanysyp, eńbek ujymdarymen kezdesti. Kezdesýde olar Parlamenttiń sessııasy kezinde qabyldanǵan, kásipkerlikti damytýǵa baǵyttalǵan zańdar týraly, óndiristik aımaqtyń ınvestısııalyq ahýalyn jaqsartýdyń, eksporttyq áleýetin arttyrýdyń mańyzyn aıtty.
Sondaı-aq depýtattar Túrkistan qalasynyń aktıvimen kezdesip, onda qalanyń áleýmettik-ekonomıkalyq damýy, ınfraqurylymdy jańǵyrtý, aýyl sharýashylyǵyn qoldaý, quqyqtyq júıeni jetildirý men halyqtyń ómir súrý sapasyn arttyrý máselelerin talqylady. Kezdesý barysynda Túrkistannyń erekshe mártebesi týraly zańdy iske asyrý aıasynda Alash qozǵalysynyń qaıratkerlerine arnalǵan murajaı ashý týraly bastama kóterildi. Senatorlar tarıhı-rýhanı murany saqtaý isin Úkimetpen birlesip qolǵa alatyndaryn jetkizdi.
Otyrar aýdanynda senatorlar iske asyrylyp jatqan ınvestısııalyq jobalarmen, onyń ishinde «Túrkistan maqta agroónerkásiptik kesheni» kópfýnksıonaldy keshenniń quramyndaǵy zamanaýı maqta óńdeý zaýytyn aralady. Olardyń aıtýynsha, kásiporyn qazir zamanaýı agrotehnologııalardy engizip, sý resýrstaryn tıimdi paıdalanýǵa yqpal etip, óńirdiń áleýmettik-ekonomıkalyq damýyna úles qosyp otyr. Jalpy, aýyl-aımaqtarda sý únemdeý tehnologııasyn damytý aýyl sharýashylyǵy taýaryn óndirýshilerge, óńir ekonomıkasyn ártaraptandyrýǵa, jańa jumys oryndaryn qurýǵa zor yqpal etedi.
Al senator Nurtóre Júsip T.Júrgenov atyndaǵy Ulttyq óner akademııasynyń basshylyǵymen, professor-oqytýshylar quramymen kezdesip, óner salasyn damytý máselelerin talqylady. Depýtat akademııa elimizdegi negizgi zııatkerlik, shyǵarmashylyq ortalyq, sondaı-aq ulttyq óner mektebiniń ustasy ekenin atap ótti. Onyń aıtýynsha, munda bolashaq sahna, ekran men beıneleý óneri sheberleriniń kórkem oıy, kásibı mádenıeti, azamattyq jaýapkershiligi qalyptasady. Senator óner salasyna bilikti maman daıarlaý máselesin de alǵa tartty.
«Kórkemdik bilim berý júıesiniń aldynda kásibı daǵdyny jetkizý ǵana emes, ulttyq biregeılikti saqtaı otyryp, jahandyq keńistikte jumys isteı alatyn mádenı jaýapty, básekege qabiletti tulǵany qalyptastyrý mindeti tur. Oqytýshylar, olardyń mamandyqqa degen talapshyldyǵy men adaldyǵy bolashaq otandyq ónerdiń sapasyn aıqyndaıdy. Qazir bilim baǵdarlamalaryn jańartý, oqytýdyń praktıkalyq quramdas bóligin kúsheıtý men teatr, kınostýdııa, murajaılar men halyqaralyq mádenı ınstıtýttarmen yqpaldasý ózekti bolyp otyr. Bul memleket pen kásibı qoǵamdastyqtyń ózara tyǵyz is-qımylyn talap etedi», dedi depýtat.
Sonymen qatar senator Altynbek Nuhuly Buqar jyraý atyndaǵy Pavlodar oblystyq ádebıet jáne óner murajaıynda boldy. Ol mekemeniń qyzmetimen, keıingi jyldary tabylǵan jańa eksponattarmen, júzege asyp jatqan sıfrlyq jobalarmen tanysty. Evakýasııa, órt qaýipsizdigi, kúzet, klımattyq erekshelik jáne saqtaý jaǵdaıy boıynsha talaptarmen qosa murajaılarǵa ulttyq qaýipsizdik standarttaryn ázirleý máseleleri qaraldy. Senator ujymnyń aıtylǵan usynystaryn odan ári pysyqtaýǵa alyp, olardyń iske asyrylýyna qoldaý kórsetýge daıyn ekenin atap ótti.
Buǵan qosa A.Nuhuly Ekibastuz qalasynyń ákimi Aıan Beısekınmen kezdesip, Ekibastuz qalalyq máslıhatynyń sessııasyna qatysty. Onda qalanyń bir jyldaǵy áleýmettik-ekonomıkalyq damýynyń qorytyndysy shyǵarylyp, Memleket basshysynyń óńirlik ınfraqurylymdy jańartý, halyqtyń ómir súrý sapasyn arttyrý, ekologııalyq qaýipsizdikti qamtamasyz etý jáne jastarǵa jańa múmkindik jasaýǵa baǵyttalǵan tapsyrmalaryn iske asyrý máseleleri qaraldy. Senator máslıhat depýtattaryna qala damýynyń oń serpinin saqtaýǵa baǵyttalǵan mindetterdi tabysty iske asyratynyna senim bildirdi.
