Ulttyq neırohırýrgııa ortalyǵynyń qyzmeti men damý maqsattary da atalǵan strategııalyq baǵyttarmen tolyq úndes. Búginde Astana men elimizdiń birqatar iri qalalary medısınalyq týrızmniń tartymdy ortalyǵyna aınalyp otyr. Elimizge dıagnostıka men sapaly em alýǵa kórshiles eldermen qatar, AQSh pen Eýropa memleketterinen de pasıentterdiń kelýi otandyq densaýlyq saqtaý júıesine degen halyqaralyq senimniń artqanyn, sondaı-aq medısınanyń básekege qabilettiligin kórsetedi.
Osy baǵytta Ulttyq neırohırýrgııa ortalyǵy naqty nátıjelerge qol jetkizdi. Ortalyǵymyzda shetelden kelgen 500-den astam naýqas em qabyldady. Bul kórsetkish jyl saıyn ósip keledi. Sheteldik pasıentterdiń geografııasy da keńeıe tústi. Olardyń qatarynda Reseı, Qyrǵyzstan, О́zbekstan, Tájikstan, Túrkııa, Ázerbaıjan, Ýkraına, Grýzııa, Germanııa, AQSh, Ulybrıtanııa, Fransııa, Nıgerııa, Kanada, Belarýs elderiniń azamattary bar. Sonymen qatar ortalyqta joǵary tehnologııalyq «Gamma-pyshaq» radıohırýrgııalyq júıesi tabysty qoldanylady. Bul ádis bas mıyndaǵy isikter men tamyrlyq patologııalardy ashyq operasııasyz, joǵary dáldikpen emdeýge múmkindik beredi.
Búginde «Gamma-pyshaq» tehnologııasy arqyly 2200-den astam naýqas em aldy. Olardyń ishinde shetel azamattary, negizinen О́zbekstan, Qyrǵyzstan, Tájikstan elderinen kelgen pasıentter bar. Bul derekter Ulttyq neırohırýrgııa ortalyǵynyń óńirlik medısınalyq týrızm ortalyǵy retindegi mańyzyn aıqyn kórsetedi. Osy baǵytta Ulttyq neırohırýrgııa ortalyǵy naqty nátıjelerge qol jetkizip otyr. Jaqynda Ýkraınadan pasıent mıdaǵy isik dıagnozymen ortalyǵymyzǵa júginip, joǵary tehnologııalyq operasııa jasatýǵa arnaıy Astana qalasyna keldi. Operasııaǵa deıin ol Ortalyq mamandarymen qashyqtan keńes alyp, dıagnozy men emdeý taktıkasyn jan-jaqty talqylady. Nátıjesinde naýqasqa zamanaýı transnazaldy ádis arqyly operasııa sátti jasaldy. Bul ádis isiktiń naqty ornalasýyn, joǵary dáldikti, zamanaýı jabdyqty, mol klınıkalyq tájirıbeni talap etedi, halyqaralyq praktıkada arnaıy jabdyqtalǵan, kásibı ortalyqtarda ǵana júzege asyrylady.
Medısınalyq týrızmniń damýy elimizdiń halyqaralyq bedelin arttyryp qana qoımaı, densaýlyq saqtaý salasynyń ekonomıkalyq áleýetin keńeıtýge, jańa tehnologııalardy engizýge, medısınalyq kómektiń sapasyn arttyrýǵa múmkindik beredi. Bul óz kezeginde Memleket basshysy atap ótken áleýmettik qamsyzdandyrý júıesin nyǵaıtýǵa tikeleı yqpal etedi.
Sonymen qatar keıingi jyldary medısına qyzmetkerlerine kórsetilip otyrǵan áleýmettik qoldaýdyń kúsheıýi – sala damýynyń mańyzdy faktory. Eńbekaqynyń artýy dárigerler men medısınalyq personaldyń áleýmettik mártebesin kóterip, mamandyqtyń bedelin nyǵaıtty.
Ulttyq neırohırýrgııa ortalyǵy aldaǵy ýaqytta da ınnovasııalyq tehnologııalardy engizý, halyqaralyq yntymaqtastyqty keńeıtý, medısınalyq týrızmdi damytý arqyly Memleket basshysy belgilegen jańǵyrý baǵytyn iske asyryp, halyq densaýlyǵyn nyǵaıtý isine úles qosa bermek.
Serik AQShOLAQOV,
Qazaqstannyń Eńbek Eri, «Ulttyq neırohırýrgııa ortalyǵy» AQ basqarma tóraǵasy, UǴA akademıgi
