Resmı derekke sáıkes, jol qozǵalysy erejelerin buzý faktileri sońǵy ýaqytta aıtarlyqtaı artqan. 2025 jyly ǵana nómirsiz, jalǵan nemese ádeıi jabylǵan memlekettik nómirmen júrgen júk kólikterine qatysty 47 myń zańbuzýshylyq tirkelgen. Kóp jaǵdaıda kólikti basqarǵan júrgizýshilerdi anyqtaý múmkin bolmaǵan.
Osyǵan baılanysty joldarda avtopatrýl sany kóbeıtildi. Birneshe memlekettik organnyń qatysýymen birlesken mobıldi toptar quryldy. Reıdterge jol polısııasy, kólik prokýratýrasy, kólik baqylaý ınspeksııasy jáne QazAvtoJol mekemesiniń ókilderi qatysyp jatyr. Tekserý nátıjeleri kún saıyn Ishki ister mınıstrligine joldanady.
Quzyrly organdardyń málimetinshe, zańbuzýshylyqqa barǵan júrgizýshilerdiń negizgi maqsaty jyldamdyqty asyrý derekterin jasyrý. Keıbiri memlekettik nómirdi jabýǵa nemese túsirýge arnalǵan arnaıy quraldar qoldanǵan. Alaıda mundaı áreketter de beınebaqylaý júıeleri arqyly tirkeletini eskertildi.
Kólik baqylaý organdary júrgizilip jatqan sharanyń mazmunyn túsindirdi.
«Qazirgi tańda jol polısııasymen, prokýratýramen jáne QazAvtoJol uıymymen birlesip reıdtik tekserýler júrgizilip jatyr. Negizgi nazar jalǵan jáne oqylmaıtyn memlekettik tirkeý nómirlerin anyqtaýǵa aýdarylǵan. Jol polısııasy óz baǵyty boıynsha jumys isteıdi. Al kólik baqylaý qyzmeti salmaq parametrlerin, ruqsat qujattaryn jáne tehnıkalyq talaptardyń saqtalýyn tekseredi. Bul shara 8 qańtardan 10 qańtarǵa deıin jalǵasady», deıdi vedomstvo.
Ishki ister organdary nómirdi jasyrý nemese qoldan jasaý aýyr quqyqtyq saldarǵa ákeletinin atap ótti. Qoldanystaǵy zańnamaǵa sáıkes, mundaı áreketter úshin júrgizýshi kýáliginen aıyrý nemese 5 táýlikke deıin ákimshilik qamaý jazasy kózdelgen.
Polısııa ókilderi jol qozǵalysyna qatysýshylardy zań talaptaryn qatań saqtaýǵa shaqyrdy. Memlekettik tirkeý nómirin zańsyz ózgertý nemese jasyrý jol qaýipsizdigine tikeleı qater tóndiretini aıtyldy.
Ishki ister mınıstrligi baqylaý sharalary tek elorda mańynda emes, respýblıka kóleminde jalǵasatynyn habarlady. Quqyq qorǵaý organdary joldaǵy qaýipsizdikti qamtamasyz etý basty mindet ekenin atap ótti.
