Instıtýt Memleket basshysy Qasym-Jomart Toqaevtyń kólik, logıstıka jáne tranzıt salalaryn damytýǵa qatysty strategııalyq tapsyrmalaryn iske asyrý aıasynda qurylyp otyr. Prezıdent óz Joldaýlarynda jáne jarııa suhbattarynda kólik-logıstıkalyq sektordy damytý Qazaqstannyń halyqaralyq ekonomıkalyq básekege qabilettiligin arttyrýdyń jáne uzaq merzimdi ornyqty ósýdiń negizgi faktorlarynyń biri ekenin birneshe ret atap ótti.
Is-shara barysynda sóz sóılegen Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev Memleket basshysy aıqyndaǵan mindetterdiń ǵylymı turǵyda qamtamasyz etilýiniń mańyzdylyǵyna toqtaldy.
«Memleket basshysy kólik pen logıstıkany eldiń strategııalyq basymdyǵy retinde aıqyndady. Osy mindetterdi tabysty iske asyrý úshin salany zamanaýı ǵylymmen qamtamasyz etý qajet. Kólik ǵylymdary men tehnologııalary ınstıtýty dál osy maqsatqa qyzmet etedi», dedi UǴA prezıdenti.
Onyń aıtýynsha, Ulttyq ǵylym akademııasynda «Kólik» baǵyty boıynsha arnaıy ǵylymı seksııa qurylyp, bul baǵyt alǵash ret ǵylymnyń basym baǵyttarynyń tizbesine engizilgen. Nátıjesinde kólik salasyndaǵy ǵylymı jobalar granttyq jáne baǵdarlamalyq-maqsatty qarjylandyrýǵa, sondaı-aq kommersııalandyrý tetikterine qol jetkizdi. Sonymen qatar ınstıtýt qyzmetinde jasandy ıntellekt, geoaqparattyq júıeler jáne boljamdyq modeldeý tehnologııalaryn qoldaný kózdelip otyr. Bul sheshimder kólik aǵyndaryn ońtaılandyrýǵa, ıntellektýaldy logıstıkany damytýǵa jáne Qazaqstannyń tranzıttik-kólik ınfraqurylymynyń qaýipsizdigi men tıimdiligin arttyrýǵa baǵyttalmaq. Kólik ǵylymdary men tehnologııalary ınstıtýtynyń qurylýy Memleket basshysy qoıǵan strategııalyq mindetterdi ǵylymı turǵyda qamtamasyz etýge, Qazaqstannyń kólik salasyn uzaq merzimdi damytýǵa jáne eldiń Eýrazııalyq keńistiktegi tranzıttik áleýetin nyǵaıtýǵa berik ǵylymı-tehnologııalyq negiz qalaıdy.
Qazaqstannyń Eýrazııa qurlyǵynyń dál ortasynda ornalasýy elge halyqaralyq kólik-logıstıkalyq habqa aınalý jáne qýatty tranzıttik áleýet qalyptastyrý úshin aıryqsha múmkindik beredi.
Búginde respýblıka aýmaǵy arqyly 11 halyqaralyq kólik dálizi ótedi, onyń ishinde 6 avtojol jáne 5 temirjol baǵyty bar. Avtomobıl joldarynyń jalpy uzyndyǵy 157 myń shaqyrymdy, temirjol jelileri 15 myń shaqyrymdy quraıdy.
Kólik ǵylymdary men tehnologııalary ınstıtýty kólik salasyndaǵy irgeli jáne qoldanbaly ǵylymı zertteýlerdi júzege asyratyn mamandandyrylǵan ǵylymı ortalyq retinde jumys isteıtin bolady. Instıtýt qyzmetiniń negizgi baǵyttaryna kólik júıesin damytýǵa arnalǵan ǵylymı-tehnıkalyq negizdemelerdi ázirleý, tranzıt pen logıstıkanyń tıimdiligin arttyrý, kólik ınfraqurylymynyń beriktigi men uzaq merzimdiligin qamtamasyz etý, ınnovasııalyq materıaldar men tehnologııalardy engizý, sondaı-aq kólik nysandaryn ártúrli jol-klımattyq jaǵdaılarǵa beıimdeý kiredi.
Instıtýttyń mańyzdy ǵylymı baǵyttarynyń biri – Qazaqstan aýmaǵynyń jol-klımattyq aýdandastyrylýyn naqtylaý. Qazirgi tańda el aýmaǵy eki ǵana jol-klımattyq aımaqqa bólingen. Josparlanǵan ǵylymı zertteýler nátıjesinde óńirlik erekshelikterdi eskeretin neǵurlym naqty júıe qalyptastyrylyp, aımaqtar sany altyǵa deıin ulǵaıtylmaq. Bul joldar men kólik qurylystaryn jobalaý, salý jáne paıdalaný sapasyn arttyrýǵa múmkindik beredi.
Instıtýttyń qyzmeti kólik ınfraqurylymynyń uzaq qyzmet etýi men senimdiligin arttyrýǵa, kólik júıesin basqarýdyń tıimdi ádisterin damytýǵa, ınnovasııalyq materıaldar men tehnologııalardy ázirleý jáne engizýge, sondaı-aq kólik qurylystaryn ártúrli klımattyq jaǵdaılarǵa beıimdeýge baǵyttalatyn bolady.
Almaty
