Daýys berý nátıjesi boıynsha «QOŃYR: arhıv úni» tujyrymdamasy jeńimpaz atandy. Jobanyń kýratory – Syrlybek Bekbotaev.
61-shi Venesııa bıennalesi 2026 jylǵy 9 mamyr men 22 qarasha aralyǵynda ótedi. Osy merzimde Qazaqstannyń Ulttyq pavılony Bıennale baǵdarlamasy aıasynda usynylatyn bolady.
Konkýrs ulttyq pavılondy daıyndaýda ashyq ári turaqty tájirıbeni qalyptastyrý maqsatynda uıymdastyryldy. О́tinimder bir aı boıy qabyldandy. Irikteý eki kezeńnen turdy. Birinshi kezeńde usynylǵan materıaldarǵa saraptamalyq baǵalaý jasaldy, al ekinshisinde fınalıstermen onlaın-suhbat júrgizildi.
Baǵalaý úshin jobanyń tujyrymdamalyq tutastyǵyna (25 ballǵa deıin), menedjmenti men iske asyrylýy (20 ballǵa deıin), tájirıbe, etıka jáne ornyǵýyna (20 ballǵa deıin) mán berildi. Ár suraq boıynsha 1-den 5 balǵa deıin qoıylyp, qorytyndy nátıje upaı arqyly anyqtaldy.
Birinshi kezeńniń fınalyna úsh joba ótti. Ekinshi kezeńde qazylar alqasy árbir fınalıspen onlaın-suhbat ótkizip, talqylaý qorytyndysy boıynsha aqtyq daýys berý paraqtaryn toltyrdy.
Irikteý komıssııasy pánaralyq saraptama qaǵıdaty boıynsha qurylyp, onyń quramynda zamanaýı óner, ónertaný, táýelsiz teatr men mýzyka salalaryndaǵy jergilikti jáne halyqaralyq mamandar, sondaı-aq akademııalyq qaýymdastyq pen memlekettik mýzeıler ókilderi boldy.
Eske sala keteıik, konkýrs 2025 jyldyń qarasha aıynda jarııalanǵan bolatyn. Onyń maqsaty – 2026 jyly Bıennalede «In Minor Keys» taqyrybyn ashatyn, tujyrymdamalyq jáne kórkemdik turǵydan birtutas jobany irikteý jáne Qazaqstannyń zamanaýı ónerin halyqaralyq deńgeıde tanystyrý.
Konkýrsqa kýratorlar men kýratorlyq toptarǵa Qazaqstan azamattary, kýratorlyq qyzmet tájirıbesi bar mamandar shaqyryldy. Qazaqstanda turatyn jáne jumys isteıtin úmitkerlerge basymdyq berildi.
Syrlybek Bekbotaev – sýretshi ári kýrator, Astana qalasynda turyp, jumys isteıdi. Onyń shyǵarmashylyǵy men mol tájirıbesi kóshpendiler ómiri men mádenı mura taqyrybyna arnalǵan. 2025 jyly ol L. N. Gýmılev atyndaǵy Eýrazııa ulttyq ýnıversıtetin «Mádenıettaný» mamandyǵy boıynsha támamdaǵan.
