Shynynda da búginde gazet-jýrnaldar men ádebı-tanymdyq kitaptardy oqymaıtyn, rýhanı qundylyǵy «jadaý», oı-órisi kemshin, vırtýaldy álemde «ómir súrýdi» ǵana biletin, kúndelikti ómirdegi qıyndyqtardy sheshýde dármensizdik tanytatyn urpaqtyń ósip kele jatqany jasyryn emes.
Suhbatta Prezıdent «Kásibı kadrlardy daıarlaý úshin mektepter men ýnıversıtetterde tıisti bilim berý baǵdarlamalary júzege asyrylyp jatyr. Máselen, 650 myńnan astam stýdent Ai-Sana baǵdarlamasy aıasynda bilim aldy. Kóp uzamaı jasandy ıntellekt mamandandyrylǵan zertteý ýnıversıteti ashylady», dep, jasandy ıntellektini elimizde damytýdyń baǵyt-baǵdaryn málimdedi. Jasandy ıntellekt degenimiz – adamnyń aqyl-oıynyń, sanasynyń kompıýterde beınelenýi. Degenmen «Saıasatta bas bar, júrek joq», degen qanatty sózdi jasandy ıntellektige qaraı burar bolsaq, adamdar arasyndaǵy meıirimdilik, qaıyrymdylyq, qamqorlyq syndy asyl qasıetterden aıyrylyp qalmaǵanymyz durys.
Prezıdent ásker taqyrybyna qatysty oıyn: «Armııa jastarǵa qoldaý kórsetip, olardy elimizdiń naǵyz azamaty retinde tárbıelep shyǵarýy kerek. Komandırler áskerı qyzmetshilerge úlgi-ónege bolýǵa tıis. Áskerde álimjettikke, buzaqylyqqa, rýshyldyqqa, jershildikke oryn joq, ondaı jaıttarǵa oryn berilmeıdi. Munyń bárin ózim jeke qadaǵalap otyramyn», dep tujyrymdaıdy. Jas sarbazdar ant bergende «Áskerı qyzmettiń aýyrtpalyǵy men qıyndyǵyn tabandylyqpen kóteremin», degen sózderdi aıtady. Rasynda da, áskerı ómirge beıimdelgenshe jas sarbazdardy qoldaý da, qorǵaý da kerek. Sondaı-aq «О́z armııasyn asyraı almaǵan el, ózge eldiń armııasyn asyraıdy», degen támsil sózge súıensek, armııada temirdeı tártip te bolýy kerek.
Prezıdent suhbatynda otanshyldyq uǵymyna erekshe mán beredi. «Otanshyldyq degen uly sezim jyltyraq sózben, jalǵan áreketpen, baǵalanbaýǵa tıis. Naǵyz otanshyl azamat jurttyń aldynda keýdesin soǵyp kótermeıdi, etegi jasqa tolyp eńiremeıdi, ońdy-soldy suhbat berip dilmársimeıdi. Úndemeı júrip úlken is tyndyrady. Otanshyl bolý – týǵan elińniń, otbasyńnyń ıgiligi úshin aıanbaı eńbek etý degen sóz», dep túsinik beredi. Prezıdent Qasym-Jomart Toqaevtyń suhbattaǵy kelisti oılary, kesimdi pikirleri, týrashyl tujyrymdary memleketimizdiń ósip-órkendeýine septigin tıgizse jarasymdy bolar edi.
Aıdar Sabyrov,
H.Dosmuhamedov atyndaǵy Atyraý ýnıversıtetiniń aǵa oqytýshysy
