Áýe kompanııalarynyń málimetinshe, jappaı keshigýlerge qolaısyz aýa raıy sebep bolǵan. Ushý-qoný jolaǵyndaǵy kóktaıǵaq saldarynan reısterdi oryndaý qaýipti bolǵan.
Sonyń saldarynan 15 qańtardaǵy kúndizgi jáne keshki reıster keıinge qaldyryldy. Atap aıtqanda, Astana – Atyraý – Astana, Almaty – Atyraý, Atyraý – Almaty baǵyttaryndaǵy reıster toqtatyldy. Al Amsterdam – Atyraý halyqaralyq reısi májbúrli túrde Aqtaý qalasyndaǵy qosalqy áýejaıǵa qondy.
Áleýmettik jelilerde jolaýshylardyń shaǵymdary da paıda boldy.
«Búgin tańǵy 05:00-de bizdi qonaqúıden alyp ketip, ushý ýaqyty 09:00 bolady dedi. Keıin 11:00-ge, odan soń 11:30-ǵa aýystyrdy. Tamaq ta, sýsyn da berilmedi. Demalatyn bólme de joq. О́z esebimizden tamaq pen sýsyn satyp alýǵa májbúrmiz. Áýe kompanııasy naqty ushý ýaqytyn aıtpaı otyr», dep jazdy jolaýshylar.
Onymen qosa Atyraýda qar qaıta jaýa bastady. Bul aýa raıy jaǵdaıyn odan ári nasharlatty. Aldaǵy saǵattarda reısterdiń oryndalý-oryndalmaýy ázirge belgisiz.
Air Astana áýe kompanııasynyń baspasóz qyzmeti 15 qańtardaǵy barlyq keshki reısterdiń 16 qańtarǵa aýystyrylǵanyn rastady.
«KS 983/984 Astana – Atyraý – Astana, KS 885 Almaty – Atyraý, KS 878 Atyraý – Almaty reısteri, sondaı-aq Aqtaýǵa baǵyttalǵan KS 904 Amsterdam – Atyraý reısi keıinge qaldyryldy. Keshiktirilgen reısterdiń jolaýshylaryna tamaq pen sýsyn usynylady. Jolaýshylardan reısterdiń mártebesin áýe kompanııasynyń saıtynan nemese mobıldi qosymshasynan tekserýdi suraımyz», delingen habarlamada.
Eske sala keteıik, bir kún buryn Hıýaz Dospanova atyndaǵy áýejaıda taǵy bir oqıǵa tirkelgen. Almatydan kelgen FlyArystan áýe kompanııasynyń ushaǵy qonǵannan keıin rýldeý jolynan shyǵyp ketken. Ushaqta 166 jolaýshy bolǵan, zardap shekkender joq.
