Qaraly habardy Májilis depýtaty Baqytjan Bazarbek estirtti.
«Búgin 91 jasyna qaraǵan shaǵynda jubaıymnyń ápkesi, Dımash Ahmetuly Qonaevtyń týǵan qaryndasy, kórnekti zııaly tulǵa, ǵylym doktory, professor Raýza Ahmetqyzy ómirden ozdy», dep jazdy depýtat.
R. Ahmetqyzy 1934 jyly 10 sáýirde Almaty oblysynyń Shilik aýylynda týǵan. Ol Meńliahmet pen Záýre Qonaevtardyń on bir balasynyń ishindegi eń kishisi boldy. Úlken ápkesi Ámınadan 27 jas kishi bolsa, óziniń aldyndaǵy aǵasy Asqardan 5 jas aıyrmashylyǵy bar.
Marqum 1952 jyly M.V. Lomonosov atyndaǵy Máskeý memlekettik ýnıversıtetiniń bıologııa-topyraqtaný fakýltetine oqýǵa túsip, ony 1956 jyly sátti aıaqtaǵan.
Ǵalym búkil sanaly ǵumyryn ǵylymǵa arnady. 1957 jyldan bastap 2016 jylǵa deıin Qazaqstan Ǵylym akademııasynyń júıesinde tapjylmaı eńbek etti. Ol Bıohımııa jáne Molekýlalyq bıologııa ınstıtýttarynda qyzmet atqaryp, bıologııa salasyndaǵy iri maman retinde tanyldy.
R. Qonaeva respýblıkanyń belgili quqyqtanýshysy Murat Baımahanovtyń jary bolǵan. Olardyń qyzy Dına Baımahanova da ata-ana jolyn qýyp, ǵylymmen aınalysqan, qazirgi tańda zań ǵylymdarynyń doktory.
