Sýretterdi túsirgen – Jumabaı MUSABEK
О́ńirde jumys istep turǵan birneshe mekeme júzdegen balanyń ómir sapasyn jaqsartýǵa, olardyń qoǵamǵa beıimdelýine úles qosyp otyr. Sonyń ishinde atap aıtatyny – atqa miný arqyly erekshe qajettilikteri bar balalardy ońaltýdy júzege asyratyn Ippoterapııa ortalyǵy.
«Mundaǵy ońaltý ortalyqtarynyń ereksheligi – dástúrli emdeý tásilderimen qatar ınnovasııalyq baǵyttardyń engizilýi. Sonyń biri – ıppoterapııa, ıaǵnı jylqy kómegimen emdeý ádisi. Bul tásil balalardyń bulshyq etterin nyǵaıtyp qana qoımaı, olardyń emosııalyq jaı-kúıine de oń áser etedi. Ippoterapııa sabaqtary ásirese tirek-qımyl júıesinde aqaýy bar, psıhoemosııalyq turaqsyzdyq baıqalatyn balalarǵa óte tıimdi. Jylqymen jumys isteý barysynda balanyń senimi artyp, qorqynyshy azaıady. Birneshe aıdyń ishinde qozǵalys belsendiligi jaqsaryp, emosııalyq baılanys ornaı bastaıdy», deıdi «Mereı» balalardy ońaltý ortalyǵy dırektorynyń orynbasary Ardaq Baqytqyzy.
Ippoterapııa ortalyǵy «Mereı» balalardy ońaltý ortalyǵynyń bazasynda ashylǵan. «Mereı» ortalyǵyna oblys ákiminiń Panfılov aýdany, Jarkent qalasyndaǵy burynǵy rezıdensııasy arnaıy beıimdelip berilip, jóndeý jumystary júrgizilip, ortalyq qajetti qural-jabdyqtarmen qamtylǵan edi. Ippoterapııadan basqa ortalyqta 1,5 jastan 18 jasqa deıingi balalar segiz baǵytta saýyqtyrý emin alady, munda 55 adam jumys isteıdi. Qazirde mekemede 40 bala ońaltý sharalaryn qabyldap jatyr.
Sonyń ishinde tirek-qımyl apparaty buzylǵan, júıke júıesiniń jumysynda jeńil aýytqýy bar balalar da bar. Olarǵa basseın, fızıoterapııa, emdik deneshynyqtyrý, massaj, gıdromassaj kabınetteri, emdeý kabıneti, tuz shahtasy, eńbek terapııasy kabıneti qarastyrylǵan. Mekemeniń balalardy tasymaldaýǵa arnalǵan avtobýsy da bar. Bul nysan kóptegen otbasy úshin úlken tirekke aınaldy. Mamandardyń kásibı eńbegi men ata-analardyń senimi toǵysqan osyndaı ortalyqtar balalardyń bolashaǵyna jol ashyp, olardyń tolyqqandy ómir súrýine múmkindik beredi. Ony ıppoterapııa sabaqtaryna qatysatyn Hadıdjanyń anasynyń aýzynan estidik.
«Qyzym 6 jasta, Daýn sındromy bar. «Mereı» ortalyǵyna birneshe jyl boıy bardyq, onda ıppoterapııa sabaqtary ótkizile bastaǵanda qatty qýandyq. Sabaqtan keıin balam jaǵymdy emosııalaryn bildirip, ózin baqytty sezinedi. Jylqymen baılanys balaǵa fızıkalyq jaǵynan ǵana emes, emosıonaldy turǵyda da paıdaly. Alǵashqy sabaqtardan bastap-aq qyzymnyń kóńil-kúıi jaqsaryp, sabyrly bola túskenin, boıynda senimdilik paıda bolyp, qyzyǵýshylyq tanyta bastaǵanyn baıqadym. Bar yqylas-peıilderimen jumys isteıtin mamandarǵa shyn júrekten alǵysymdy bildiremin», deıdi Ajarbývı Imerova.
Búginde «Mereı» ortalyǵynda 40 bala bolsa, sonyń 33-i ıppoterapııa sabaqtaryna qatysady. Bir jyl ishinde 7 balanyń jaǵdaıy jaqsarǵany baıqalǵan, ıaǵnı úsh balanyń psıhoemosııalyq kóńil kúıi turaqtalyp, tórt balanyń tirek-qımyl júıesiniń jumysy jaqsarypty.
Oblys ákiminiń baspasóz qyzmetiniń málimetinshe, jylqynyń balalarǵa beretin jaqsy energııasy kóp. Balalardy ońaltýmen arnaıy daıyndyqtan ótken eki jattyqtyrýshy aınalysady. Dárigerdiń usynystaryna qaraı sabaqtar aptasyna 2-3 ret aýdany 400 sharshy metr bolatyn arnaıy salynǵan jabyq arenada ótkiziledi. Ippoterapııa aıaqqa turýǵa, júrýdi jaqsartýǵa kómektesedi, arqa bulshyq etterin kúsheıtedi, vestıbýlıarlyq apparatty jattyqtyrady, jalpy densaýlyqty jaqsartýmen qatar, balanyń damýyna oń áser etedi.
Eń bastysy, balalarǵa kórsetilgen kómektiń naqty nátıjesin kúndelikti ómirde ata-analar sezinip otyr. Ortalyqqa balasyn ákeletin ata-analar oń ózgeristerdi jasyrmaı aıtady. Taǵy bir em alýshy Madııardyń anasy da ortalyq jumysyna rıza. Onyń ortalyqtan em alyp júrgenine eki jyldan astam ýaqyt bolǵan.
«Ippoterapııa bizge kóp kómektesti. Madııar atqa minýdi unatady, kóńil kúıi birden jaqsarady. Ippoterapııaǵa deıin Madııardyń aıaq-qoly álsiz boldy, tepe-teńdigin ustaı almaıtyn. Qazir aıaq-qoldarynyń bulshyq etteri nyǵaıdy, aıaǵyn basa alatyn boldy», deıdi Maqpal О́skenbaeva.
Mundaı ortalyqtardyń damýy – qoǵamnyń áleýmettik jaýapkershiliginiń kórinisi. Erekshe balalarǵa qolaıly orta qalyptastyrý arqyly óńirde ınklıýzıvti qoǵam qurýǵa naqty qadam jasalyp otyr.
Jetisý oblysy
