54 jastaǵy brazılııalyq maman 2013–2018 jyldar aralyǵynda da dál osy qyzmette bolǵan. Kakaýdyń jetekshiligimen elimizdiń bas komandasy 2016 jyly Eýropa chempıonatynda aıdy aspanǵa bir-aq shyǵaryp, qola medaldi oljalady. Bapker Almatynyń «Qaırat» klýbynyń tizginin ustaǵanda jerlesterimiz ÝEFA kýbogin ıelenip, elishilik jarystarda qarsylas shaq keltirmedi. Basqa da dúbirli dodalarda daralandy. Sol aralyqta el quramasyn jeti jyldaı Kaka (Paýlý Rıkardý Fıgeroa Sılva) jattyqtyrdy. Bul mamannyń da tusynda jerlesterimiz úlken arenalarda eleýli tabystarǵa qol jetkizdi.
Bas bapkerlik qyzmetke taǵaıyndalǵannan soń Kakaý BAQ ókilderine suhbat berip, aldaǵy josparlary týraly aıtty. Áńgime barysynda ol: «Shaqyrtý alǵanda qatty qýandym. Meniń Qazaqstandy qalaı jaqsy kóretinimdi jankúıerler biledi. Segiz jyldaı basqa jaqta eńbek etsem de, ózime ystyq Qazaq elin eshýaqytta nazarymnan tys qaldyrǵan emespin. Olar qandaı jarysqa qatyssa da, ár kez taqymymdy qysyp, tileýin tilep otyrǵanyma janymdaǵy adamdar kýá. Biz endi Eýropa men álem chempıonattaryna qaıta joldama alyp, sol jarystarda barynsha tabysty óner kórsetýge tıispiz. Sol jospardy júzege asyrýǵa jyldar boıy jıǵan mol tájirıbemdi paıdalana otyryp, bar kúshimdi salamyn», dep aqtaryla sóıledi.
Qazir bapkerlik quramda biraz aýys-túıis bolyp jatyr. Kúni keshe belgili fýtzalshy Dinmuhambet Súleımenov bas bapkerdiń kómekshisi qyzmetine taǵaıyndaldy. Bul esim sportsúıer qaýymǵa jaqsy tanys. Ol 2009–2019 jyldary Almatynyń «Qaırat» klýby sapynda jasyndaı jarqyldady. Keıinnen Taldyqorǵannyń «Jetisýyna» aýysyp, sol jaqta mansabyn aıaqtady. 10 jyldan asa ýaqyt boıy elimiz quramasynyń beldi oıynshylarynyń biri ári kapıtany boldy. D.Súleımenovtiń Eýropa chempıonatynyń qola júldegeri, ÝEFA kýboginiń eki dúrkin jeńimpazy, álem sýperkýboginiń ıegeri, elimizdiń 9 dúrkin chempıony, taǵy basqa da ataqtary bar.
