- Aralas jekpe-jekten Bangkokte ótken ONE FC týrnırindegi tusaýkeser kezdesýinde 80 kg salmaqtaǵy Dıas О́tegen (2-0) reseılik Ahmed Rabadanovty (3-0) tóreshiler sheshimimen utty. Krasnodarda uıymdastyrylǵan ASA jarysynda Baǵdos Oljabaı (21-17) 16 Eagle FC lıgasynyń eks-chempıony, armenııalyq Jora Aıvazıannan (17-1) aılasyn asyra almady.
- Qatardyń astanasynda shymyldyǵy túrilgen WTT Star Contender Doha dodasynda elimizdiń ústel tennısshileri súreńsiz óner kórsetti. Eskendir Harkı irikteý synynda Saýd Arabııasynyń ókili Álı Álhadravıge (2:3) ese jiberse, qatarlyq Marıam Áliniń tas-talqanyn shyǵarǵan Sarvınoz Mirqadyrova (3:0) ekinshi kezeńde taıpeılik Hýan Iý-Szege (0:3) jol berdi. Sondaı-aq olar juptyq, aralas juptar saıystarynda da alǵashqy aınalymnan asa almady.
- Elimizdiń ardager tennısshisi Mıhaıl Kýkýshkın Shotlandııanyń Glazgosyndaǵy «Chellendjer» týrnırde táýir nátıjege qol jetkizdi. Bastapqy básekelerde kolýmbııalyq Adrıa Sorıano Barrera, shveısarııalyq Remı Bertola, germanııalyq Tom Genchti jolynan yǵystyrǵan ol jartylaı fınalda chehııalyq Gınek Bartonnan basym tústi. Fınalda Kýkýshkın fransııalyq Kleman Shıdege jol berdi.
- «Golden Boy» promoýterlik kompanııasynyń uıymdastyrýymen AQSh-tyń Kalıfornııa shtatynda ótken kásipqoı boks keshinde О́zbekstannyń týy astynda óner kórsetetin 23 jastaǵy qandasymyz Rýslan Abdýllaev ýrýgvaılyq Edýardo Haver Abreýdi besinshi raýndta aýyr soqqylardyń astyna alyp, aıqyn basymdyqpen jeńdi. Bul – Rýslannyń kásipqoı rıngtegi tórinshi jeńisi. Áýesqoılar arasynda qazaq jigitiniń álem, Azııa chempıony degen ataqtary bar.
- Túrkııanyń Ystanbul qalasynda shaıbaly hokkeıden jasóspirimder arasyndaǵy IIA dıvızıonyndaǵy álem birinshiligi bastaldy. Elimizdiń quramasy Túrkııa, Ońtústik Koreıa, Nıderland, Latvııa, Jańa Zelandııamen bir topta óner kórsetedi.
- 6–7 aqpan aralyǵynda Astanada Devıs kýboginiń álemdik tobynyń pleı-offynda elimizdiń quramasy Monakoǵa qarsy oınaıdy. Osy asa jaýapty jarysta el namysyn Aleksandr Býblık, Aleksandr Shevchenko, Tımofeı Skatov, Beıbit Juqaev, Denıs Evseev, Ámir Omarhanov syndy tennısshiler qorǵaıdy.
