Sýret: baq.kz/
Memleket basshysy halyqtyń kókeıinde júrgen eń ózekti máselelerge jaýap berip qana qoımaı, el damýynyń basym baǵyttaryn – qoǵamdyq-saıası jańǵyrý, ekonomıkany ártaraptandyrý, áleýmettik ádildik pen zań ústemdigin nyǵaıtý máselelerine jan-jaqty toqtaldy. Ásirese memlekettik basqarý júıesinde bolatyn aýqymdy transformasııa týraly tereńnen tolǵady.
Qasym-Jomart Toqaev prezıdenttik laýazymǵa kirisken sátten beri aýqymdy reformalardy qolǵa aldy. Onyń jemisin kórip te kelemiz. Bul bastamalardyń ózeginde ádildik ıdeıasy jatyr.
Bizdiń túpki maqsatymyz – ádiletti, órkenıetti, myqty ári qaýipsiz memleket qurý. Qyzylordada kóterilgen bastamalar – osy uly murat jolyndaǵy iri, betburysty qadamdardyń jalǵasy. Negizgi ekpin bılik ınstıtýttary arasyndaǵy tepe-teńdikti saqtaýǵa beriledi.
Memleket basshysynyń «Kúshti Prezıdent – yqpaldy Parlament – esep beretin Úkimet» formýlasyn odan ári kúsheıtýge erekshe mán berilip otyr. Bir palataly Parlament – sonyń aıqyn dáleli. Al onyń bolashaq ataýyn «Quryltaı» dep usynýy ulttyq bolmysymyz ben ulttyq kodymyzdy qaıta jańǵyrtýmen teń. Ǵasyrlar boıy dala demokratııasynyń ózegi bolǵan quryltaıdyń qaıta túleýi dep sanaımyn.
Alda kóp jumys kútip tur. Ata zańymyzǵa úlken ózgerister engizip, irgeli reformalardy iske asyramyz. Bul – tarıhı kezeńniń bastaýy. Depýtat retinde biz osy jumystyń aldyńǵy shebinde júrýge mindettimiz. Eldigimizdi nyǵaıtýǵa, egemendigimizdi tuǵyrly etýge baǵyttalǵan tarıhı reformalardyń ıgiligin barsha jurtymyz, urpaǵymyz kóre bersin.
Dáýlet TURLYHANOV,
Májilis depýtaty
