«Qazgıdromet» taratqan málimetke sáıkes, 1 aqpanda Qostanaı, Kókshetaý, Pavlodar, Qaraǵandy, Temirtaý, О́skemen, Semeı, Rıdder, Aqtóbe, Almaty, Astana qalalarynda, sondaı-aq túngi ýaqytta Petropavl qalasynda aýanyń lastanýyna yqpal etetin qolaısyz meteorologııalyq jaǵdaılar kútiledi.
Qolaısyz meteorologııalyq jaǵdaılar (QMJ) — bul qysqa merzimdi meteorologııalyq faktorlardyń (tynyq aýa, álsiz jel, tuman, temperatýralyq ınversııa) jıyntyǵy. Mundaı jaǵdaılar atmosferanyń jerge jaqyn qabatynda zııandy (lastaýshy) zattardyń jınalýyna ákeledi.
QMJ kezinde qala turǵyndaryna, ásirese avtokólik joldary men basqa da lastaný kózderine jaqyn jerlerde, ashyq aýada bolý ýaqytyn qysqartý usynylady. Al ókpe, júrek-qan tamyrlary jáne allergııalyq sozylmaly aýrýlary bar adamdarǵa syrtqa shyqqan kezde ózderine qajetti dári-dármekterdi birge alyp júrý qajet.
