Syrtqy ister mınıstrligi málimdegendeı, 30 kúnge deıingi tegin týrıstik jáne medısınalyq vıza resimdeý birden kúshine endi. El azamattary Úndistanǵa tegin vızany e-Visa onlaın júıesi arqyly nemese Astana, Almaty jáne sheteldegi Úndistan dıplomatııalyq ókildikterinde rásimdeı alady. Osy oraıda, SIM vızaǵa ótinishti memlekettik qyzmetter arqyly ǵana berýdi eske salady.
Vıza alýdy jeńildetý ekijaqty týrıster aǵynyn arttyryp, Úndistandy el azamattaryna qoljetimdi baǵytqa aınaldyrýǵa múmkindik bermek. Al Úndistan azamattaryna Qazaqstanda vızasyz 14 kúnge deıin bolýyna ruqsat etilgen.
Aıta ketsek, Úndistannyń Qazaqstandaǵy elshisi Saılas Tangal elimizge 2025 jyly Úndistannan shamamen 250 myń týrıst kelgenin málimdedi.
«Týrızm, sonyń ishinde medısınalyq jáne saýyqtyrý týrızmi yntymaqtastyqtyń bolashaǵy zor baǵytyna aınalady. 2025 jyly Qazaqstanǵa kelgen úndi azamattarynyń sany 250 myń adamǵa jetti», dedi dıplomat.
Elimiz keıingi jyldary Úndistannyń medısınalyq tehnologııalar, farmasevtıkalyq óndiris, telemedısına men dástúrli medısına salasyndaǵy tájirıbesine qyzyǵýshylyq tanytyp keledi. Densaýlyq saqtaý mınıstri Aqmaral Álnazarova Úndistan elshisimen kezdesýde úndi elimen farmasevtıka salasyndaǵy kelissóz júrgizilip jatqanyn aıtty. Úkimet taratqan málimetke sáıkes qazir elimizde úndi kompanııalary shyǵarǵan 965 dárilik zat pen 248 medısınalyq buıym tirkelgen.
Jalpy, Úndistan Táj-Mahal syndy sáýlet óneriniń jaýharymen álemge tanymal. Jylyna ondaǵan mıllıon týrıst tamashalaıtyn tańǵajaıyp mavzoleıdi osydan tórt ǵasyr buryn 1631 jyly Moǵol patshasy Shah Jahan jary Mýmtaz Mahalǵa arnap saldyrtqan. Táj-Mahal Ýttar-Pradesh shtatynyń Agra qalasynda ornalasqan. Aq mármárdan salynǵan keseneniń syrty men ishi jartylaı asyl tastarmen bezendirilgen. Keseneniń eki jaǵynda meshit pen qonaqúı ornalasqan.
Táj-Mahalǵa bararda áýeli Delıge jetip alý qajet. Búginde Úndistan men Qazaqstan arasynda aptasyna 15 tikeleı reıs qatynaıdy. Delı men Táj-Mahal ornalasqan Agra qalasynyń arasy 239 shaqyrym.
Sondaı-aq Úndistandaǵy Jammý Kashmır shtatynyń bas qalasy Srınagar qazaq pen úndi elin baılanystyratyn altyn kópirge aınalary sózsiz. Árıne, buǵan deıin de osy aımaqqa elimizdiń iri tulǵalary jıi at basyn burǵan, endi Kashmır aımaǵyna otandastarymyz erkin saıahattaı alady.
Srınagar qalasynda áıgili tarıhshy, ádebıetshi, Moǵolstan men oǵan irgeles elderdiń tarıhy týraly asa qundy derekter jınaqtalǵan «Tarıhı Rashıdı» kitaby men «Jahannama» dastanynyń avtory Muhammed Haıdar Dýlatı jerlengen. Muhammed Haıdar Dýlatı jazǵan derekterdiń arqasynda Qazaq handyǵynyń qurylý tarıhyn 1465 jyldan bastalady dep esepteımiz.
Uly moǵoldar ımperııasynyń sultandary jerlengen «Mazar-ı-Salatın» qorymynda tarıhı tulǵanyń kesenesi 2018 jyly jańartylǵan. BAQ-ta jarııalanǵan aqparatqa sáıkes zırat basynda ýrdý jáne aǵylshyn tilinde jazylǵan taqtatas bar. Bul aqparattyq taqta 2015 jyldyń qyrkúıek aıynda ornatylǵan.
«Bıikten tómenge Srınagarǵa qarap turmyz. Kashmır jazyǵynyń eni 20, al uzyndyǵy 200 shaqyrymdaı desedi. Srınagardyń bıikten de kórkem kórinetinin baıqadyq. Osy jerde, árıne, Muhammed Haıdardyń da at basyn tirep, Kashmırdiń sulýlyǵyna, kórkem tabıǵatyna tánti bolǵandyǵyna kúmán joq. Uly ǵalym jerlengen «Mazar-ı-Salatın» – «Sultandar zıraty» Gımalaıdan bastaý alatyn Jelam ózeniniń buralańdap aǵatyn tusynda. Ol jerge eski shahardaǵy bir kósheni jaryp ótip jettik. «Mazar-ı Salatındi» 1997 jyly jeltoqsanda osynda arnaıy kelgenimde kórgenmin. Muhammed Haıdardyń zıratyn osy qabirstannyń soltústik jaǵyndaǵy bıikteý jerden tapqanmyn», dep Kashmır saparynan estelik qaldyrǵan edi Ábsattar qajy Derbisáli «Egemen Qazaqstan» gazetinde jarııalanǵan «Gımalaı asqan qazaqtar» atty maqalasynda. Aıta ketsek, 1540–1551 jyldary Kashmır patshasy bolǵan Myrza Haıdar Dýlatıdiń zıratyn Ábsattar qajy Derbisáli 1994 jyly Kashmırden izdep tapqan.
Sondaı-aq Dinmuhamed Qonaev «О́tti dáýren osylaı» degen kitabynda 1955 jyldyń 16 maýsymynda Úndistan Premer-mınıstri Djavaharlal Nerý qyzy Indıra Gandımen birge Almatyǵa kelgen saparynan estelik jazǵan edi. Avtor qurmetti meımandardyń: «Mynaý bizdiń Kashmır ǵoı?», dep tańǵalǵanyn jazady.
Jalpy, Úndistan – kórikti jerlerimen erekshelenetin, baı mádenı murasy bar elderdiń biri. Tarıh pen mádenıet toǵysqan elde týrısterge at basyn tireıtin oryndar kóp. Máselen, «Qyzǵylt qala» atanǵan Djaıpýr shtatynyń astanasy Radjasthanda Hava-Mahal (Jel saraıy), Amber fort, Sıtı Palas, Djantar Mantar observatorııasy sekildi tarıhı nysandar ornalasqan. Sondaı-aq álem elderiniń týrısteri Úndistannyń eń kóne jáne qasıetti qalalarynyń biri Varnasıge (Ýttar-Pradesh) kóptep aǵylady. Bul qala – Gang ózeniniń boıynda ornalasqan, úndilerdiń dinı ortalyǵy. Munda kelgen týrıster Gangta tańerteńgi ǵıbadat rásimderin tamashalaı alady.
Qazir elimizde úndi mádenıeti ıoga, úndi kınosy, klassıkalyq bı men mýzyka arqyly keńinen tanymal bolsa, Úndistanda qazaq eli mádenı festıvaldar men konsertter arqyly tanystyrylyp keledi.
Týrıstik agenttikterdiń málimetine súıensek, qazir Úndistannyń Ýttarakhand shtatyndaǵy Rıshıkesh pen Harıdvar qalalaryna týrısterdiń qyzyǵýshylyǵy jyl saıyn artyp keledi. Rıshıkesh Gımalaı taýlarynda ornalasqan, ıoga men medıtasııa ortalyǵy retinde tanymal qala bolsa, Harıdvar – úndi dinin nasıhattaıtyn qasıetti qalalardyń biri. Bul eki qala da Gang ózeniniń boıynda ornalasqan.
Elimizdiń azamattaryna arnalǵan 30 kúndik vızasyz rejim týrızm, mádenıet, densaýlyq saqtaý salalaryn odan ári damytýǵa serpin bolmaq.
