Jalpy, qys mezgilinde qala turǵyndary Aqtas aýylyna kelip syrǵanaq tepkendi unatady. Alaıda keı jaǵdaıda tabıǵat aıasynda demalýshylar tazalyq erejelerin umyt qaldyryp jatady. Sonyń saldarynan qorshaǵan ortanyń keıpin buzǵan qoqystar paıda bolady. Olardy jınaýǵa jalǵyz aýyl turǵyndarynyń shamasy jetpeıdi. Sol sebepti qala jastary aqtastyqtarǵa kómekke keldi. Uıymdastyrýshylardyń aıtýynsha, is-sharanyń maqsaty – aınalany tek qoqystan tazartý emes, sonymen birge, turǵyndardy qalany taza ustaýǵa shaqyrý. Tazalyq aksııasy sonysymen de mańyzdy. Aınala muntazdaı taza bolsa, birinshiden, týǵan jerdiń ekologııasyna paıda, ekinshiden, turǵyndardyń qoǵamdyq jaýapkershiliginiń joǵary ekenin kórsetedi. Mundaı bastamaǵa jastardyń tartylýy keleshek sapaly urpaqtyń qalyptasýyna negiz qalaıdy.
«Tazalyq ár otbasynan bastalýy kerek. Osy oraıda jastardyń belsendi aralasýymen shaharda «Taza Shym» jobasy sátti júzege asyrylyp jatyr. Tazalyq is-sharasynda erekshe kózge túsken erikti jastarǵa aıtar alǵysymyz zor. Joǵary oqý oryndarynyń stýdentteri jumys ta istep, arasynda fleshmob uıymdastyryp ta úlgerip júr. «Taza Qazaqstan» aksııasy qala, eldi mekenderdi qoqystan tazartýmen qatar, adamdardyń boıynda tazalyq mádenıetin qalyptastyrýǵa úndeıdi. Qorshaǵan ortanyń tazalyǵyna mán berý adam boıynda Otanǵa degen súıispenshilik sezimin oıatady. Jastardy tabıǵatty aıalaýǵa úıretedi. Sol turǵyda «Taza Qazaqstan» aksııasy, onyń aıasynda iske asyp jatqan «Taza Shym» jobasy ári tazalyqty kózdegen, ári rýhanı kemeldikke úndegen mańyzdy bastama. Aqtas eldi mekeninde uıymdastyrylǵan tazalyq is-sharasyna Shymkenttiń eki júzge jýyq erikti jasy qatysty», deıdi megapolıstegi Jastar resýrstyq ortalyǵynyń basshysy Janserik Juman.
Aksııa barysynda qatysýshylar «tazalyqty saqtaý bir kúndik naýqan emes, kúndelikti daǵdy bolýǵa tıis» degen pikirdi alǵa tartyp, barshany osy qaǵıdany qalypty ustanýǵa shaqyrdy. Jastardyń uıymdasýymen ótken is-shara shahardyń tazalyǵyna ǵana emes, qoǵamnyń ekologııalyq sanasynyń oıanýyna da óz septigin tıgizedi.
ShYMKENT
