Germanııada boıjetken kólden altyn quıma taýyp aldy

ASTANA. 13 tamyz. Germanııada Kıonıgszee kóline shomylmaq bolǵan 16 jastaǵy boıjetken sý túbinen altyn quıma taýyp aldy. Bul týraly osy eldiń sueddeutsche.de gazeti habarlady. Sýǵa shomylyp júrgen boıjetken 2 metr tereńdikte jyltyrap jatqan áldeneni kózip shalyp qalady. Keıinnen bul zattyń 999,9 synamaly altyn ekeni anyqtaldy. Quımanyń uzyndyǵy – 6,5 sm, salmaǵy – 500 g, al quny – 16 myń eýrony quraıdy. Taýyp alǵan oljasy týraly qyz polısııaǵa ózi habarlaǵan. Jergilikti turǵyndar dúrligip ketpes úshin polısııa qyzmetkerleri bul aqparatty birneshe kún boıy qupııa ustaıdy. Alaıda, kóldi súzip shyqqan súńgýirler eshteńe tappaǵan. Búgingi tańda mamandar altynnyń qaıdan shyqqanyn anyqtaýda. Tergeýdi altyn quımadaǵy nómirdiń óship qalǵany keıinge shegerip otyr. Qazirdiń ózinde quımanyń Degussa nemis fırmasyna tıesili ekeni belgili bolǵan. Muny fırmanyń sarapshylary da rastap otyr. Olar sondaı-aq, altyn kesektiń 1990 jyldan 2005 jyl aralyǵynda daıyndalǵanyn da málimdedi. Eger altynnyń qojaıyny jarty jyl ishinde tabylmasa, Germanııa zańdaryna sáıkes, oljany taýyp alǵan boıjetken ózine qaldyra alady. Elaman Qońyr. Derek: sueddeutsche.de. Sýret: Polizei, DPA.