Qyzylordada mektepke deıingi bilim berý uıymdarynyń forýmy ótti

QYZYLORDA. 13 tamyz. Qyzylordada «Mektepke deıingi tárbıe men oqytý júıesin jańartý: jańa sapa jáne jańa kózqaras» taqyrybynda repýblıkalyq forým ótti. Bul týraly egemen.kz tilshisi habarlady. Forýmǵa Bilim jáne ǵylym vıse-mınıstri Esenǵazy Imanǵalıev, «IýNISEF»  balalar  qorynyń ókili jáne elimizdiń túkpir-túkpirinen kelgen ádisker, pedagog mamandar qatysty. Qonaqtar búgingi balabaqshalardyń jaǵdaıy, olardyń bala tárbıesindegi róli sııaqty aýqymdy máselelerdi sóz etti. Sharanyń negizgi maqsaty – tájirıbe almasyp, bilimderin jetildirý. Forýmǵa arnaıy kelip qatysqan Bilim jáne ǵylym vıse-mınıstri Esenǵazy Imanǵalıev aımaqtyń mektepke deıingi bilim berý uıymdarynyń jumysyna oń baǵasyn berdi. О́ıtkeni qazirdiń ózinde Qyzylorda oblysynyń búldirshenderdi balabaqshamen qamtý kórsetkishi 92,2 paıyzdy quraıdy. Bul kórsetkish jyl sońyna deıin 100 paıyzǵa jetkizilip, «Balapan» memlekettik baǵdarlamasyn ýaqytynan buryn aıaqtaý josparlanyp otyr. Qyzylorda oblysy ákiminiń orynbasary Raýan Kenjehanuly «Balapan» baǵdarlamasy memlekettik-jeke menshik seriktestikti júzege asyrýdyń tıimdi joly ekenin aıtty. «Mektepke deıingi mekemelerdiń oqytý, tárbıelý ádisterine de kóp kóńil bólip kelemiz. Olardyń materıaldyq-tehnıkalyq bazasyn nyǵaıtý úshin de birshama jumystar atqaryldy. Bıyldyń ózinde 200 balabaqshaǵa «Mantessorı» ádisimen oqytýǵa qajetti qural-jabdyqtar alyp berildi. Iаǵnı, tárbıe men oqytý júıesindegi jańashyldyqqa betburys qarqyn alýda», – dedi R.Kenjehanuly. Erjan Baıtiles. Derek: egemen.kz. Sýret: QazAqparat.