Qyzylordada úsh jasar balany izdestirý jalǵasyp jatyr

QYZYLORDA. 13 tamyz. Qyzylorda oblysynda polıseıler joǵalyp ketken búldirshindi izdestirý jumystaryn jalǵastyrýda. Bul týraly egemen.kz tilshisi habarlady. 2015 jyldyń 5 tamyzy kúni 3 jasar búldirshin eki aǵasy men ákesine erip, Josaly kentiniń shet jaǵynda ornalasqan Kalının eldi mekenine jantaq shabýǵa barady. Eki uly úıden aıyr alyp kelýge ketken ýaqytta ákesi 2012 jyly týǵan Altaıuly Baýbekten kóz jazyp qalady. Iz-tússiz joǵalyp ketken búldirshindi tabý maqsatynda jedel-izdestirý jumystary júrgizilip, aýdandyq ishki ister bóliminiń polısııa jasaǵy, Ulttyq ulan №5547 áskerı bóliminiń qyzmetkerleri, ıisshil qyzmettik ıtter, tótenshe jaǵdaılar mekemesiniń qyzmetkerleri men tehnıkalyq qural-jabdyqtary jumyldyryldy. Izdestirý sharalaryna aýdandyq ákimshilik qyzmetkerleri, jergilikti aýdan turǵyndary men eriktiler toby da qosylyp, joǵalyp ketken jerinen ońtústik jaqqa qaraı 3 shaqyrym, soltústikke qaraı 4 shaqyrym, batys jaqta ornalasqan Kalının, shyǵys bette ornalasqan Saryózek eldi mekenderi tolyq aralandy. Alaıda, izdestirý jumystary nátıje bermeı jatyr. Osyǵan sáıkes, polısııa balany kórgen-bilgender bolsa, ózine habarlasýdy suraıdy. Ústinde bolǵan kıimderi qara tústi fýtbolka, kók tústi shapka, qara tústi shorty, kók tústi súıretpe aıaq kıim kórinedi. Erjan Baıtiles. Derek, sýret: egemen.kz.