Elbasy Qytaı Halyq Respýblıkasynyń Tóraǵasy Sı Szınpınge Tıanszın qalasyndaǵy hımııa zaýytynda bolǵan jarylysqa baılanysty kóńil aıtý jedelhatyn joldady, dep habarlady Prezıdenttiń baspasóz qyzmeti. Jedelhatta hımııa zaýytyndaǵy jarylys saldarynan kóptegen adamnyń qaza tapqany jáne zardap shekkeni týraly habardy Memleket basshysynyń zor kúızelispen qabyldaǵany atap ótilgen. Nursultan Nazarbaev orny tolmas qaıǵyǵa ortaqtasa otyryp, jeke óziniń jáne barsha Qazaqstan halqynyń atynan QHR Tóraǵasyna, sondaı-aq, qaza bolǵandardyń týǵan-týystaryna kóńil aıtty. Sońynda Qazaqstan Prezıdenti zardap shekkenderdiń tezirek saýyǵyp ketýine tilektestik bildirdi.
