Memleket basshysy óz sózinde sammıtke qatysýshylarǵa iltıpat bildirip, osy tarıhı is-sharany uıymdastyrǵany úshin AQSh Prezıdenti Donald Trampqa alǵys aıtty.
– Donald Tramp atyndaǵy Beıbitshilik ınstıtýtynda ótip jatqan kezdesýimiz batyl ári pragmatıkalyq áreketter sheshýshi ról atqaratyn kezeńmen tuspa-tus kelip otyr. Shyn máninde, bul – sóz kúıinde qalatyn qarar qabyldaıtyn konferensııa emes, kerisinshe, naqty ári maqsatty sharalar arqyly uzaqmerzimdi beıbitshilik ornatýǵa úles qosatyn jıyn. Prezıdent myrza, Sizdiń jahandaǵy beıbitshilik pen turaqtylyqty ilgeriletýdi kózdeıtin aıqyn muratyńyz ben kóregen qadamdaryńyz elimizdiń Beıbitshilik keńesine qosylýyna túrtki boldy, – dedi Prezıdent.
Qasym-Jomart Toqaev Beıbitshilik keńesin kópjaqty kúsh-jigerdiń áleýetin arttyratyn, zaman talabyna saı uıym dep sanaıdy.
– Álemde mundaı bastama kóterilgen joq. Rasynda, bul – buryn-sońdy bolmaǵan betburys. О́ıtkeni birge kúsh-jiger jumyldyrýdyń arqasynda «Jasampazdyq arqyly beıbitshilik» atty jańashyl tujyrymdamany nemese jobany iske asyrýǵa barlyq múmkindik bar. Sondyqtan, Prezıdent myrza, Sizdiń naqty is-áreket qana beıbitshilikke berik negiz qalaıdy degen ustanymyńyzdy tolyq quptaımyn, – dedi Memleket basshysy.
Prezıdent elimiz Gaza sektoryndaǵy ahýaldy turaqtandyryp, aımaqty qalpyna keltirý jumystaryna atsalysýǵa daıyn ekenin jetkizdi.
– Qazaqstan iskerlik jáne kásibı bedeli joǵary deńgeıdegi halyqaralyq kompanııalardy tarta otyryp, aımaqty qaıta qalpyna keltirý jáne qurylys jumystaryna qatysýǵa nıetti. Bul baǵdarlama boıynsha ınfraqurylym jasaqtaýǵa, úıler men turǵyn úı keshenderin, mektepter, aýrýhanalar jáne basqa da mańyzdy áleýmettik nysandardy salýǵa bolady. Álemdegi eń iri bıdaı óndirýshilerdiń biri sanalatyn elimiz Gaza men odan tysqary jerlerdegi azyq-túlik qaýipsizdigin qamtamasyz etý úshin gýmanıtarlyq kómek kórsetýge daıyn. Qazaqstan palestınalyq stýdentterdiń ýnıversıtetterimizde bilim alýy úshin bes jyl boıy 500-den asa oqý grantyn bólýdi josparlap otyr. Biz halyqaralyq deńgeıde moıyndalǵan elektrondyq úkimet salasyndaǵy tájirıbemizben jáne basqa da sıfrlyq sheshimdermen bólise alamyz. Qazaqstan Halyqaralyq turaqtandyrý kúshterin qoldaýǵa ázir. Iаǵnı dalalyq gospıtal qurý úshin bir top medısına mamanyn, sondaı-aq Azamattyq-áskerı úılestirý ortalyǵyna baqylaýshylar jiberýge daıar, – dedi Qasym-Jomart Toqaev.
Memleket basshysynyń aıtýynsha, Taıaý Shyǵystaǵy ornyqty damýdy qamtamasyz etý úshin aımaqta beıbitshilik pen yntymaqtastyqty, ózara senimdi nyǵaıtýdy kózdeıtin jańa tásilder qajet.
– Atalǵan ustanymǵa arqa súıeı otyryp, Qazaqstan Ibrahım kelisimderine qosylý jóninde sheshim qabyldady. Osylaısha, biz aımaqta jáne odan tysqary jerlerde pragmatıkalyq ekonomıkalyq ári gýmanıtarlyq yntymaqtastyqqa úles qosamyz. Bul Beıbitshilik keńesiniń izgi muratyna tolyq saı keledi, – dedi Prezıdent.
Keńestiń jahandyq kún tártibin eskere otyryp, Qasym-Jomart Toqaev Qazaqstanda túrli deńgeıdegi kezdesýler ótkizý arqyly bul bastamaǵa naqty qoldaý kórsetýge daıyn ekenin rastady.
– Sonymen qatar Beıbitshilik keńesi aıasynda Prezıdent Tramp atyndaǵy arnaıy nagradany bekitýdi usynamyn. Bul onyń beıbitshilikti ilgeriletý isindegi ǵalamat jetistikterine kórsetken qurmetimiz bolmaq. Sizdiń tegeýrindi ári kóregen basshylyǵyńyzben Keńes óziniń tarıhı izgi mıssııasyn abyroımen atqaratynyna senimdimin, – dedi Memleket basshysy.
Donald Tramp óz sózinde Gazadaǵy turaqtylyqty qamtamasyz etýge jáne qalpyna keltirýge atsalysqany úshin Beıbitshilik keńesiniń alǵashqy otyrysyna qatysýshylarǵa shynaıy rızashylyǵyn bildirdi.
AQSh Prezıdenti Keńeske qatysýshy elderdiń basshylaryn tanystyrý barysynda Qazaqstandy keremet ári baı el retinde sıpattady.
Donald Tramp Sammıtke kelgen memleketter basshylaryn sheshimtal áreketteri arqyly beıbitshilik pen turaqtylyqty nyǵaıtýǵa, halyqaralyq dıalogti damytýǵa eleýli úles qosqan naǵyz jahandyq aýqymdaǵy kóshbasshylar dep atady.
Joǵary deńgeıdegi is-shara barysynda Beıbitshilik keńesiniń atqarýshy organdarynyń músheleri baıandama jasady. Jıynǵa qatysýshylarǵa Gaza sektoryn qalpyna keltirý, sonyń ishinde ınfraqurylymdy damytý, qaýipsizdikti qamtamasyz etý jáne halyqaralyq qarjylandyrý jospary tanystyryldy.
Joǵarǵy atqarýshy keńestiń múshesi Djared Kýshner Gazany damytýǵa arnalǵan bas jospar týraly málimet berip, aımaq turmys-tirshilikke jáne ekonomıkalyq órleýge qolaıly jaǵdaı jasaıtyn zamanaýı keńistikke aınalýǵa tıis ekenin atap ótti.
Dúnıejúzilik bank tóraǵasy Adjaı Banga Beıbitshilik keńesiniń qarjy mehanızmderi ashyqtyqqa jáne qarjyny naqty maqsattarǵa bólý qaǵıdattaryna negizdeletinin jetkizdi.
Al Halyqaralyq turaqtandyrý kúshteriniń jetekshisi, general Djasper Djeffers Gazadaǵy qaýipsizdik pen turaqtylyqty qamtamasyz etý sharalary jóninde aıtty.
Gazany basqarý jónindegi ulttyq komıtettiń basshysy Alı Shaat qaıta qalpyna keltirý jumystaryn úılestirý jáne halyqaralyq seriktestermen yqpaldastyq tásilderin usyndy.
Sonymen qatar jıynda AQSh Vıse-prezıdenti Djeı Vens, AQSh Memlekettik hatshysy Marko Rýbıo, Bahreın Koroli Hamad ben Isa Ál Halıfa, Qatar Ámiri sheıh Támım ben Hamad Ál Tánı, О́zbekstan Prezıdenti Shavkat Mırzııoev, Indonezııa Prezıdenti Prabovo Sýbıanto, Rýmynııa Prezıdenti Nıkýshor Dan, Albanııa Premer-mınıstri Edı Rama, Mysyr Premer-mınıstri Mustafa Madbýlı jáne basqa da tulǵalar sóz sóıledi.
