Bıyl jylyjaıda ol 200 myń qyzǵaldaq ósirdi. О́ziniń jeke ıeligindegi jylyjaıdyń aýmaǵy – 3 myń sharshy metr. Qyzǵaldaqtyń tuqymyn Nıderlandtan aldyrypty.
«Kópten beri jylyjaı ashýdy oılap júr edim. Birneshe jyldan beri gúl ósiremin ǵoı. Gúldi tek ósirýmen shektelmeı, sórege deıingi daıyndyǵyn ózim qadaǵalaımyn. Ár istiń ózindik qıyndyǵy bolatyny sekildi, gúldiń túr-túrin ósirý ońaı emes. Ásirese qyzǵaldaqty jylyjaıda ósirý úshin aldymen topyraqty sapaly daıyndap, temperatýranyń rejimin qatań saqtaý qajet. Udaıy kútim jasalsa, qyzǵaldaqtyń túınegi úsh aıdan soń kórine bastaıdy», deıdi B.Ysqaqova.
Gúl ósirýshiniń aıtýyna qaraǵanda, bıylǵy aıazda jylyjaıdaǵy temperatýrany 14-16 gradýs shamasynda ustaý qıyndyq týdyrypty. Biraq birqalypty jylýdyń nátıjesinde 200 myń qyzǵaldaq ósirilipti.
«Qyzǵaldaqty ósirý tabandylyq pen shydamdylyqty qajet etedi. Biz 200 myń qyzǵaldaqty ózimizdiń 11 saýda ornynda satý maqsatynda ósirip otyrmyz. О́ıtkeni oǵan suranys bar. Degenmen bul – maýsymdyq bıznestiń bir túri. Sol sebepten qyzǵaldaq ósirýshilerdiń deni bul isti bir-eki jyldan soń tastap ketedi. Al biz muny turaqty ári otbasylyq kásipke aınaldyrdyq», deıdi ol.
Kásipkerdiń pikirinshe, qyzǵaldaqqa suranys 8 naýryz qarsańynda arta túsedi. Sondyqtan jylyjaıda ósirilgen qyzǵaldaqtyń basym bóligi sol kezde satylymǵa shyǵarylady. Qazir ony ósirýge 20-dan astam adam jumysqa tartylypty. Deni – qyz-kelinshekter. Jylyjaıdaǵy jumys táýlik boıy jalǵasady. Onyń kásibine uly men kelini qoldaý kórsetip otyr.
«Bastapqyda otbasylyq kásibimizge aınalǵan gúldiń san túrin shetelden tasymaldaıtyn edik. Keıbirin Nıderlandydan, Belarýs pen Reseıden aldyrdyq. Biraq jyl ótken saıyn logıstıka men kedendik rásimdeýge baılanysty qıyndyq týyndady. Mundaı kedergiden soń gúldi, ásirese qyzǵaldaqty ózimiz ósirýge sheshim qabyldadyq», deıdi kelini Áıgerim Dáýletııarova.
Qazir pıon gúliniń 11 500 tuqymyna tapsyrys berilipti. Gúldiń bul túrin úsh jyldan keıin ǵana sata alady. Endi jylyjaıda hrızantema, raýshan men basqa gúlderdi ósirý kózdelipti.
«Byltyr bir tal gúldi 800 teńgeden satqan edik. Bıyl ózimiz ósirgen otandyq gúldiń bir danasyn 700 teńgeden satamyz. Jylyjaıda ósirilgen gúldiń sanyn kóbeıtip, kórshiles óńirlerge jiberýdi maqsat etip otyrmyz», deıdi B.Ysqaqova.
Atyraý oblysy
