Qyrǵyzdar orys tilinen bas tartýda

ASTANA. 26 naýryz. Búginde Qyrǵyzstanda orys tili men Reseı biliminiń aptalyǵy ótýde. Eldiń Bilim jáne ǵylym mınıstrligi muryndyq bolǵan shara barysynda orys tili pániniń muǵalimderi biliktiligin arttyrýda. Sondaı-aq, mektep oqýshylary men stýdentter arnaıy baıqaýǵa qatysýda. Fınalǵa deıin jetken qatysýshylar aldaǵy kúzde Máskeýge baryp, tájirıbe jınap qaıtady. Bul týraly news-asia.ru habarlady. Mundaı keń kólemdegi shara Qyrǵyzstanda alǵash ret ótkizilýde jáne sońǵysy bolýy da ǵajap emes. Sebebi, Memlekettik til boıynsha ulttyq komıssııanyń músheleri el úshin orys tiliniń qajeti shamaly dep sanaıdy. Sondaı-aq, Ata Zańdarynda jazylǵan orys tiliniń resmı degen mártebesin alyp tastaýdy usynýda. Alaıda, qyrǵyzdar jaqyn arada mundaı qadamǵa bara almaıdy. О́ıtkeni, Konstıtýsııaǵa túzetý engizýge 2020 jylǵa deıin moratorıı jarııalanǵan. Sońǵy jyldary el ishinde memlekettik til máselesi qyzý talqylanyp, «Bir el – bir til» degen uran paıda boldy. Bilim jáne ǵylym salasynda júrgen mamandar men BAQ ókilderi osy máseleni jıi kóterip, el arasynda eleń etkizerlikteı pikirtalas týdyrdy. Sońynda túıtkildi máseleniń núktesin el prezıdenti Almazbek Atambaev qoıyp: «Qyrǵyzstanda turyp qyrǵyz tilin bilmeý – arsyzdyq jáne nadandyq», – dedi. Osydan keıin elde memlekettik tildiń qoldanys aıasyn keńeıtip, mártebesin arttyrýǵa negizdelgen Ulttyq baǵdarlama daıyndalyp, 2020 jylǵa deıin arnaıy jospar jasaldy. Soǵan sáıkes, qyrǵyz tilin oqytý tásili túbirimen ózgerip, balabaqshadaǵy baladan bılik basyndaǵy sheneýnikterge deıin memlekettik tildi bilý mindetteldi. Búginde qyrǵyz tilin qajet deńgeıde bilmeıtin sheneýnikter zań boıynsha qyzmetinen alastatylady. Elaman Qońyr. Derek, sýret: news-asia.ru.