«Aýyldyq densaýlyq saqtaýdy jańǵyrtý» ulttyq jobasy aıasynda keıingi eki jyldyń ishinde oblysta 38 medısınalyq nysan salynyp, paıdalanýǵa berildi. Oǵan 9 mlrd teńgeden astam qarajat bólingeni týraly Almaty oblystyq densaýlyq saqtaý basqarmasynyń basshysy Erjan Súleımenov atap ótti.
«Búginde halyq tyǵyz qonystanǵan Qarasaı aýdanynyń Abaı men Úshterek aýyldarynda medısınalyq-sanıtarlyq alǵashqy kómek ortalyqtary ashylyp jatyr. Qos aýyl úshin bul úlken jańalyq. Jańa nysandar zamanǵa saı salynyp, zamanaýı tehnıkamen jaraqtandyrylǵan. Bulardyń árqaısysy 50 adamdy qabyldaýǵa qaýqarly. Olar bilikti, tájirıbeli dárigerlermen, orta býyn medısına mamandarymen qamtylǵan. Halyqqa qaltqysyz qyzmet kórsetý – basty maqsatymyz. Osy kúni Abaı aýylynda 50 myńǵa taıaý halyq turady. Soǵan oraı medısınalyq kómektiń aýqymyn keńeıtip, dárigerler sanyn arttyrý da mańyzdy», dedi basqarma basshysy.
Jańa medısınalyq nysannyń ashylý saltanatyna aýyldyń aqsamaıly qarııalary men turǵyndary kóptep jıyldy. Qýanyshty sáttiń kýágerlerin Qarasaı aýdanynyń ákimi Jasulan Estenov quttyqtady. Ol óz sózinde aýdannyń Aqseńgir, Kóktoǵan, Kemertoǵan aýyldarynda da jańa nysandar boı kóterip, paıdalanýǵa berilgenin, aldaǵy ýaqytta Qaratóbe aýylyndaǵy felsherlik-akýsherlik pýnkt iske qosylatynyn atady.
«Osy Raıymbek aýyldyq okrýginiń ortalyǵy Abaı aýylyndaǵy medısınalyq mekemede 1978 jyldan bastap bas dáriger bop jumys istep, zeınetke shyqtym. Ol ǵımarat óte eskirip, eńseni basatyn edi. Jańa ǵımarattyń ashylýyn asyǵa kúttik, razymyz. Elimizdiń órkendep, kúnnen-kúnge kórkeıip jatqanyn naqty isterden sezinip jatyrmyz. Qarııalarǵa qamqorlyq tanytýdan aıanbaıtyn aq halatty jandarǵa alǵys aıtamyz», deıdi aýyl aqsaqaly Kógershin Ábdýálıuly.
Abaı aýylynyń turǵyndaryna esigin aıqara ashqan jańa medısınalyq-sanıtarlyq alǵashqy kómek ortalyǵynyń meńgerýshisi Aıjan Baımahanova munda buryn-sońdy bolmaǵan stomatologııalyq, laboratorııalyq, akýsher-gınekologııalyq, fızıoemdeý, egý kabınetteri, sonymen qatar 5 tósektik kúndizgi stasıonar zamanaýı qural-jabdyqtarmen jaraqtalǵanyn qýana tilge tıek etti.
Endi basy aýyryp, baltyry syzdaǵan turǵyndar analız tapsyryp, tis emdetý úshin aýdan ortalyǵyna sabylmaı, aýyl ishindegi sý jańa ortalyqtyń bilikti dárigerlerine qaralyp, tıisti em-sharalaryn qabyldaı alady.
Dál osyndaı jan jadyratarlyq jańalyq tús aýa Úshterek aýylynda jalǵasyn tapty.
Almaty oblysy,
Qarasaı aýdany
