XIV qysqy Paralımpıada oıyndarynyń ashylý saltanaty Italııanyń Verona qalasynda ótti.
Mılan-Kortına-2026 qysqy Paralımpıada oıyndaryna 56 elden 600-den asa sportshy qatysady. Qysqy Paralımpıada oıyndarynda Qazaqstan ulttyq quramasy para shańǵy jarysy men para bıatlon sport túrleri boıynsha el namysyn qorǵaıdy.
Atap aıtsaq, para bıatlon jarysyna Erbol Hamıtov, Aleksandr Gerlıs, Sergeı Ýsolsev jáne Iýrıı Berezın qatyssa, al para shańǵy jarysyna Nýrlan Alımov, Vladıslav Kobal jáne Anna Grachıova qatysady.
Aıta keteıik, Mılan-Kortına-2026 XIV qysqy Paralımpıada oıyndary 6-15 naýryz aralyǵynda ótedi. Dúbirli dodada para shańǵy jarysy, para bıatlon, arbadaǵy kerlıng, para snoýbord, taý shańǵysy jáne para hokkeı sport túrleri boıynsha 79 medal jıyntyǵyn sarapqa salady.
«Bul oıyndar – bizdiń quramamyz úshin óz sheberligin dáleldep, el namysyn abyroımen qorǵaýǵa berilgen taǵy bir mańyzdy múmkindik. Qazaqstan ulttyq quramasynyń árbir sportshysy osy dodaǵa uzaq ári kúrdeli daıyndyq arqyly keldi. Olar kún saıyn eńbek etip, óz múmkindikterin dáleldeýge tyrysty. Erteń sportshylarymyz úshin alǵashqy jarys kúni. Barsha qazaqstandyqtardy ulttyq quramamyzǵa jankúıer bolýǵa shaqyramyn. Bizdiń sportshylarymyzǵa sáttilik, ádil jarys jáne jarqyn jeńister tileımin», dedi Týrızm jáne sport vıse-mınıstri Serik Jarasbaev.
Paralıpıada oıyndarynda ulttyq qurama 7-shi naýryz kúni para bıatlonnan 7,5 km qashyqtyqtaǵy sprınttik jarys boıynsha synǵa túsedi.
Jarys jolynda Erbol Hamıtov, Aleksandr Gerlıs, Sergeı Ýsolsev jáne Iýrıı Berezın óner kórsetedi. Ulttyq qurama qatysatyn jarystyń tikeleı efıri Qazsport telearnasynyń efırinde kórsetiledi.
