Sýretti túsirgen – Erlan OMAR, «EQ»
Mereke teatrlandyrylǵan kórinispen bastaldy. Qydyr ata men Umaı ana jınalǵan jurtqa bata berip, amandyq, baq-bereke men baqyt tiledi. Odan keıin ulttyq kıim kıgen myńnan astam adam bir mezette ejelgi Kórisý kúni dástúrin oryndap, bir-birimen qushaqtasyp kórisip, jyly lebizderin bildirdi.
Saltanatty jıyn barysynda kóktemniń kelýi men tabıǵattyń jańarýyn beıneleıtin qoıylymdar sahnalanyp, ulttyq salt-joralǵylar men ınteraktıvti mádenı baǵdarlamalar usynyldy. Sondaı-aq sahnada Astana qalasynyń Mádenıet basqarmasyna qarasty shyǵarmashylyq ujymdary óner kórsetip, buqara merekelik konsertti tamashalady.
Belgili aqyn Dáýletkereı Kápulymen áńgimeleskenimizde: «Qazir halyq Naýryz merekesiniń mán-mańyzyn tereń túsinip, elimizdiń ár óńirinde ulttyq dástúrdi ulyqtaý jandanyp keledi. Kórip otyrsyz, búgingi merekelik kóńil kúı keremet. Mundaı merekelerdiń basty maqsaty halqymyzdyń ǵasyrlar boıy qalyptasqan mádenı murasyn, ulttyq óneri men salt-dástúrin dáripteý, el birligi men ulttyq biregeılikti nasıhattaý bolýǵa tıis», dedi ol.
«Kórisý kúni – Amal merekesi» atty is-sharany uıymdastyrýshylar ulttyq dástúr men zamanaýı tehnologııany ushtastyryp, jasandy ıntellekt arqyly mádenı qundylyqtardy tanytýdy da kózdepti. Elordanyń sıfrlyq damýyna erekshe úles qosyp júrgen azamattar arnaıy kıiz úı tigip, AI-aımaq ta uıymdastyrǵan. Bul kıiz úıge kelgen qonaqtar ekrandaǵy qyzdan Naýryz merekesine qatysty suraq surap, elektrondy sadaq atyp, qultemirmen bı bılep, sán-saltanat qurdy. «Astana innovations» uıymynyń qyzmetkeri Aıdyn Esbek el birligi men ulttyq bolmysty zamanǵa saı tehnologııamen nasıhattaý kerektigine toqtalyp, jasandy ıntellekt arqyly dástúrdi nasıhattaý alda da jalǵasyn tabatynyn aıtty.
Sonymen qatar saıabaq aýmaǵynda ulttyq mýzykalyq aspaptar men qoldanbaly óner buıymdarynyń kórmesi uıymdastyrylyp, kelýshilerge qazaq halqynyń baı mádenı murasymen jaqynyraq tanysýǵa múmkindik berildi. Jurt ónerpazdardyń konsertin tamashalaýdan bólek, kir tasyn kóterip, altybaqan teýip, asyq, toǵyzqumalaq oınap, kóńil kóterdi.
