Jumysker quqyn qorǵaıtyn qujat

Otyrysta aldymen Senat tóraǵasy respýblıkalyq referendým elimizdiń uzaqmer­zim­di damýynyń baǵyt-baǵdaryn aı­qyn­daǵan tarıhı oqıǵa bol­ǵanyn atap ótti. Sondaı-aq M.Áshim­baev senatorlarǵa óńir turǵyn­daryna konstıtýsııalyq nor­malar­dy túsindirý jumysyna bel­sen­di qatysyp, reformanyń ashyq­tyǵyn qamtamasyz etýge qosqan úlesteri úshin alǵys bildirdi.

«Referendýmnyń aldyn ala nátıjelerine sáıkes da­ýys bergen azamattardyń basym kópshiligi jańa Konstıtýsııaǵa qoldaý bildirdi. Osylaısha, 15 naýryz tarıhymyzǵa elimizdiń strategııalyq damý baǵdaryn aıqyndaǵan kún retinde enip otyr. Prezıdent Qasym-Jomart Toqaev atap ótkendeı, otandastarymyz jańarý men jańǵyrý úshin daýys berdi. Referendým nátıjesi azamattarymyz Mem­leket basshysynyń refor­malaryn qoldaıtynyn, jal­py el bolashaǵyna beıjaı qara­maıtynyn kórsetti. Halyq­tyń belsendiligi men joǵary aza­mat­tyq jaýapkershiligi – táýel­siz Qazaqstannyń demokra­tııa­­lyq damýynyń berik kepili. Son­­daı-aq daýys berýshiler sany boıyn­sha eń joǵary rekordtyq kór­set­kish tirkelgen jalpyulttyq referendýmnyń ashyq ári ádil ótkenin, barlyq zań talaby qatań saqtalǵanyn atap ótken jón», dedi M.Áshimbaev.

Bekitilgen kún tártibine sáıkes aldaǵy beısenbide senatorlar «Halyqaralyq azamattyq avıa­sııa týraly konvensııa­nyń 50a)-babyn ózgertýge qatysty hattamany jáne Halyqaralyq azamattyq avıasııa týraly kon­vensııanyń 56-babyn ózgertýge qatysty hattamany ratıfıkasııalaý týraly» zańdy qaraıdy. Usynylyp otyrǵan ózgerister Halyqaralyq azamattyq avıasııa uıymy keńesiniń quramyn 36-dan 40 memleketke deıin ulǵaıtýǵa baǵyttalǵan. Bul múshe memleketterdiń neǵurlym ádil, teńgerimdi ári geografııalyq turǵydan keńirek ókildik etýin qamtamasyz etýge múmkindik beredi. Sondaı-aq tehnıkalyq saraptamany kúsheıtip, uıymnyń norma shyǵarý qyzmetiniń tıimdiligin arttyrý maqsatynda Aeronavıgasııalyq komıssııa quramyn 19-dan 21 múshege deıin kóbeıtý kózdelip otyr.

Sonymen qatar Palata otyrysynda «Qazaqstan Respýb­lıkasynyń keıbir zańnamalyq aktilerine qaýipsiz eńbek jaǵ­daıyn jetildirý, jumyskerler­diń eńbek quqyǵyn qorǵaý jáne áleýmettik qamsyzdandyrý máselesi boıynsha ózgerister men tolyqtyrýlar engizý týraly» zań qaralady. Qujattyń maqsaty – jumyskerlerdiń eńbek qu­qyǵyn qorǵaý salasyndaǵy ult­tyq zańnamany jetildirý. Zań eńbekti jáne azamattardy áleýmettik qorǵaýdy basqarý júıesiniń tıimdiligin arttyrýǵa baǵyt­talǵan. Osyǵan baılanysty Eńbek, Áleýmettik, «Halyq densaýlyǵy jáne densaýlyq saqtaý júıesi týraly» kodeksterine, sondaı-aq «Jergilikti memlekettik basqarý jáne ózin-ózi basqarý týraly», «Ruqsattar jáne habarlamalar týraly»,  «Memleket­tik sa­typ alý týraly» zańdarǵa ózgeris­ter men tolyqtyrýlar engiziledi.

Buǵan qosa Senat otyrysy­nyń kún tártibine «Bir taraptan QR Úkimeti jáne ekinshi taraptan Halyqaralyq Qaıta qurý jáne damý banki, Halyqaralyq qarjy korporasııasy men Investısııalar kepildiginiń kópjaqty agenttigi arasyndaǵy QR ornyqty damýyna jáne ór­kendeýine járdemdesý maq­satyn­da yntymaqtastyqty keńeı­tý jónindegi áriptestik týraly negizdemelik kelisimdi ratıfıkasııalaý týraly» zań jáne Qazaqstan Respýblıkasy Joǵarǵy sotynyń sýdıasyn qyzmetinen bosatý týraly másele shyǵaryldy.

Sondaı-aq Senatta osy apta­da atom ónerkásibin damytý, káme­letke tolmaǵandar isteri jónin­degi mamandandyrylǵan aýda­naralyq sottardyń qyzmetin jetildirý sekildi ózge de ózekti máseleler qaralady. Depýtattar buǵan deıin Májilis qabyldaǵan zańdardy Senat komıtetterine bólip berdi.