Foto: Qorǵanys mınıstrligi
Memleket basshysy «Áskerı qyzmettiń belgilengen merzimin ótkergen merzimdi áskerı qyzmettegi áskerı qyzmetshilerdi zapasqa shyǵarý jáne Qazaqstan Respýblıkasynyń azamattaryn 2026 jyldyń naýryz-maýsymynda jáne qyrkúıek-jeltoqsanynda merzimdi áskerı qyzmetke kezekti shaqyrý týraly» Jarlyqqa qol qoıdy. Qujatqa sáıkes, 17 naýryzdan bastap óńirlerdegi shaqyrý komıssııalary jumysqa kiristi. Komıssııalarǵa ákimderdiń orynbasarlary jetekshilik etedi.
Qarýly kúshter Bas shtabynyń Uıymdastyrý-jumyldyrý jumystary departamentiniń bastyǵy, general-maıor Almas Isabekovtiń málimetinshe, 30 maýsymǵa deıin 18-27 jas aralyǵyndaǵy azamattar áskerge alynady.
«Bıyl kóktemgi shaqyrý aıasynda 21 myńnan astam azamatty áskerge alý josparlanyp otyr. Onyń ishinde 11 myńnan astamy Qarýly kúshterge, 7 myńnan astamy IIM Ulttyq ulanyna, 2 myńǵa jýyǵy UQK Shekara qyzmetine, 400-ge jýyǵy Tótenshe jaǵdaılar mınıstrligine, al 300 azamat Memlekettik kúzet qyzmetine jiberiledi», dedi ol.
Shaqyrylýshylarǵa habarlama SMS jáne eGov portaly arqyly keminde úsh kún buryn jiberiledi. Mundaı habarlamalar resmı shaqyrý bolyp sanalady. Shaqyrtý alǵan azamat belgilengen ýaqytta jergilikti áskerı basqarý organyna kelýge mindetti.
Qorǵanys mınıstrligi áskerı esep júıesin sıfrlandyrýdy jalǵastyryp jatyr. «Smart voenkomat» jobasy aıasynda shaqyrylýshylardyń derekteri tolyq avtomattandyrylǵan. Júıe azamattardy turǵylyqty jeri ózgergen kezde avtomatty túrde esepke qoıady, 17 jastaǵy jasóspirimderdi tirkeıdi, sondaı-aq keıinge qaldyrý nemese bosatý rásimderin elektrondy túrde júrgizedi.
Osy júıeniń nátıjesinde 2025 jyly 457 myńnan astam adamǵa keıinge qaldyrý berilgen. Sonymen qatar áskerge shaqyrý týraly buıryqtar da elektrondy formatta rásimdeledi. Bul óz kezeginde áskerı qyzmetshilerge nesıelik demalys berý úshin derekterdi kredıttik bıýrolarǵa avtomatty túrde joldaýǵa múmkindik beredi.
Medısınalyq tekserý prosesi de sıfrlyq júıege kóshirilip jatyr. «E-Medosmotr» júıesi arqyly shaqyrylýshylardy kýálandyrý Astana, Shymkent qalalarynda, Almaty, Batys Qazaqstan jáne Jetisý oblystarynda keńinen engizilgen. 2025 jyly 17 myńnan astam azamat medısınalyq tekserýden sıfrlyq formatta ótken.
Prezıdent 2026 jylǵy áskerge shaqyrý týraly Jarlyqqa qol qoıdy
Merzimdi áskerı qyzmet ótkeretin azamattarǵa memleket tarapynan birqatar áleýmettik qoldaý sharalary qarastyrylǵan. Atap aıtqanda, olar nesıelik demalysqa ıe bolady jáne UBT nátıjelerin esepke almaı, joǵary oqý oryndaryna memlekettik grantpen túse alady.
«2023 jyldan beri 9 myńnan astam sarbaz UBT tapsyrmaı-aq joǵary oqý oryndaryna qabyldandy. Tek 2025 jyldyń ózinde bul múmkindikti 3 300 áskerı qyzmetshi paıdalandy», dedi Almas Isabekov.
Sondaı-aq 20 myńnan astam áskerı qyzmetshige shamamen 8,8 mlrd teńge kóleminde nesıelik demalys berilgen. Qyzmet barysynda sarbazdar oqý ortalyqtarynda túrli jumysshy mamandyqtaryn meńgere alady.
Shopandar men baqtashylardyń balalaryn áskerge shaqyrý keıinge qaldyrylýy múmkin
General-maıordyń aıtýynsha, shaqyrýdan jaltarý nemese dálelsiz sebeppen shaqyrý pýnktine kelmeý zańmen qýdalanady. Mundaı jaǵdaıda ákimshilik jaýapkershilik, al áskerden jaltarǵandarǵa qatysty qylmystyq jaýapkershilik qarastyrylǵan.
