Rýhanı qundylyqtarymyzdy aıshyqtaǵan jobada mádenı muralarymyz nasıhattalyp, mektep aýlasyna jınalǵan qonaqtardy ulttyq dástúrge saı qarsy alý rásimi ótti. Aq kımeshek kıgen ájeler shashý shashyp, aqjarma tilegin arnasa, aqsaqaldar bata berip jastarǵa ónege kórsetti. Qazaqy qonaqjaılyqtyń úlgisi retinde kelgen qonaqtar ulttyq dámnen aýyz tıip, kóne dástúrdiń kórkem úlgisin sezindi.
Merekelik alańda oqýshylardyń qatysýymen asyq atý, arqan tartys, qazaqsha kúres, bórenege shyǵý sııaqty ulttyq oıyndar uıymdastyryldy. Arnaıy usynylǵan etno-kórme kelýshilerge erekshe áser syılady. Kórmede ulttyq oıý-órnek kompozısııalary, qolóner sheberleriniń týyndylary kórsetilip, mektep oqýshylary men ustazdary án men kúıden shashý shashty.
Shara barysynda sóz alǵan mektep dırektory Anargúl Mándibaeva Naýryznama onkúndiginiń tárbıelik mańyzyna toqtalyp, aıtýly bastama oqýshylar úshin ómirlik qundylyqtardy boıǵa sińiretin úlken tárbıe mektebi ekenin atap ótti.
«Naýryznama onkúndigi – ulttyń jady men jańǵyrýynyń toǵysqan tusy, dástúr men búginniń arasyn jalǵaǵan rýhanı kópir. Bul kezeń tek merekelik dýmanmen shektelmeı, ár kúnniń ózindik mazmuny arqyly qoǵamǵa, ásirese jas urpaqqa tereń taǵylym usynady. Oqýshylarymyz úshin Naýryznama – tárbıe mektebi. Munda olar úlkendi qurmetteý, kishige izet kórsetý, tabıǵatpen úılesimde ómir súrý, eńbek pen birliktiń qadirin túsiný sekildi ómirlik mańyzdy qaǵıdalardy boıyna sińiredi. Ár kúnniń mazmuny – bir-bir ónege: qaıyrymdylyq, ulttyq óner, tazalyq, tatýlyq, jańarý. Bul uǵymdar jasóspirim sanasynda eldik pen adamgershiliktiń irgetasyn qalaıdy. Sonymen qatar, Naýryznama – jastardyń ulttyq bolmysyn tanýyna jol ashatyn alań. Zamanaýı jahandaný dáýirinde tól mádenıetke degen qyzyǵýshylyqty arttyryp, ulttyq kodty saqtaýdyń mańyzyn uǵyndyrady. Dombyra úni, ulttyq oıyndar, dástúrli taǵamdar men ádet-ǵuryptar – bári de jas urpaqtyń júregine elge degen súıispenshilik uıalatady. Bizdiń mektebimizde qazaq, orys, uıǵyr tilderinde bilim beriledi. Is-sharanyń bir maqsaty olardyń bárine ulttyq salt-dástúrlerimizdiń taǵylymyn tanytý», deıdi Ál-Farabı atyndaǵy №31 orta mekteptiń dırektory Anargúl Mándibaeva.
Dástúrli ónerge arnalǵan sheberlik saǵattary baǵdarlamanyń taǵy bir mańyzdy bóligine aınaldy. Munda qonaqtar dombyra jasaý, qysh qumyra daıyndaý, kıiz basý, shı toqý sııaqty ulttyq qolóner baǵyttarymen tanysyp, sheberlerdiń jumysyna tánti boldy. Bilikti ustaz Qaıyrǵalı Atabaıuly jetekshilik etetin «Toǵyzqumalaq» úıirmesiniń jetkinshekteri erekshe oıyn tásilin kórsetti. «Bul bólim dástúrli ónerdiń qyr-syryn zamanaýı formatta kórsetýge baǵyttalǵan», deıdi ustazdar.
Is-sharada Talǵar aýdandyq ádistemelik ortalyǵynyń ádiskeri Anar Ábeýova ǵasyrǵa jýyq tarıhy bar mekteptiń taǵylymdy tájirıbesine joǵary baǵa berip, jınalǵandardy merekemen quttyqtady. Is-shara konserttik baǵdarlamaǵa ulasyp, «Eki juldyz» án baıqaýymen jalǵasyn tapty.
Almatyda Naýryz merekesine oraı «Nauryz Sale» aksııasy ótedi
