Sporttyń Kıokýshın Býdokaı karate dep atalatyn túri bizdiń elimizde de jaqsy damyp keledi. Bul – tolyq kontaktty jekpe-jekke negizdelgen karate stıli. Ol qatal jattyǵýlarmen, kúshti soqqylarmen jáne shynaıy jekpe-jek tehnıkasymen tanymal.
Qazaqstanda Kıokýshın Býdokaı karateni damytatyn negizgi uıym – Kazakhstan Fullcontact Karate Organization (KFKO). 2013 jyly qurylǵan. Halyqaralyq WKB uıymynyń resmı ókili. Qazirgi kúni 16 óńirde bólimsheleri, 90-nan astam klýby jumys isteıdi. Olarda tárbıelenip jatqan sportshylar jyl saıyn óńirlik jarystarǵa, respýblıkalyq chempıonattarǵa jáne halyqaralyq týrnırlerge qatysyp otyrady. Mysaly, bıyl Astanada ótken Astana Open týrnırine 600-ge jýyq sportshy elimizdiń 15 óńirinen qatysqan. Bul jarystar jastar arasynda sportty damytýǵa jáne eldik deńgeıdegi, halyqaralyq chempıonattarǵa daıyndyqqa múmkindik beredi. Kıokýshın Býdokaı karatemen 4 jastaǵy baldyrǵannan bastap, 18-den joǵarǵy jastar men eresekter de aınalysa alady.
Jýyrda KFKO-nyń uıymdastyrýymen Almaty qalasynda «kýmıte» tártibi boıynsha balalar, jasóspirimder jáne qyzdar arasynda SENTOKI CUP – 2026 chempıonaty ótti. Oǵan 200-ge jýyq bala qatysty. Solardyń ishinde Qyzylorda oblysyna qarasty Aral aýdanynyń Bógen aýylynan kelgen bes bala da júlde aldy. Atap aıtsaq, 50+ salmaq dárejesinde Madııar Shákı II orynǵa shyqty. Al qyzdar arasyndaǵy 40+ salmaq dárejesinde
Gúlbarshyn Aralbaı – I oryn (kýbok), Kórkem Jańabergen – II oryn, Zarına Sátenova III oryn ıelendi. -30 salmaq dárejesi boıynsha synǵa túsken Raıana Amandyqqyzy da namysty qoldan bermeı, keýdesine III orynnyń medalin taqty.
«Osy Almaty chempıontynyń aldynda ǵana Qyzylorda oblysy, Aral aýdanyndaǵy №Bógen orta mektebinde ashylǵan «Kıokýshın Býdokaı karate» úıirmesiniń jumysymen tanysyp qaıtqan bolatynmyn. Úıirmeniń ashylǵanyna kóp bola qaımasa da, balalardyń jattyǵý kezindegi qabilet-qarymyn, talpynysyn baıqap, aldaǵy ýaqytty jeńis tuǵyrynan kórinetindikterine sengen bolatynmyn. Endi, mine, senim aqtaldy. Bizdiń maqsat – Syr óńirindegi sportty súıetin balalardyń basyn biriktirý, jattyqtyrý, úlken jarystarǵa daıyndaý, sportty, salaýatty ómir saltyn nasıhattaý», deıdi «Kazakhstan Fullcontact Karate Organization (KFKO)» respýblıkalyq qoǵamdyq birlestigi Qyzylorda oblystyq federasııasynyń jetekshisi Shahmardan Faızýllaev.
Dzıýdodan Grýzııadaǵy Grand Slam týrnıri: Talǵat Orynbasar qola júldeger atandy
Shalǵaıdaǵy aýyl balalaryn sportqa baýlyp júrgen jattyqtyrýshy Meıram Álishev – Qazaq sport jáne týrızm akademııasyn bitirgen kásibı maman. Búginde osy Kıokýshın Býdokaı karate sporty boıynsha ashqan úıirmeniń quramynda 20 bala bar.
«Qazir, jasyratyny joq, úlken-kishi túgel telefonǵa táýeldimiz. Balalardyń bos ýaqytyn tıimdi ótkizý úshin osy «Kıokýshın Býdokaı karate» úıirmesin ashqan bolatynmyn. Qoldaý bildirgen mektep dırektory Marat Andyzbaevqa alǵys bildiremin. Sport – tek dene jattyǵýlary ǵana emes, ol adam ómirin tártipke keltiretin, erik-jigerdi kúsheıtetin, jaýapkershilik sezimin arttyratyn ómir salty. Sportpen aınalysatyn jastar zııandy ádetterden aýlaq bolady dep oılaımyn. Kishkentaı sportshylarym Almatyda ótken SENTOKI CUP – 2026 chempıonatynda mereıimizdi ósirip tastady. Qýanyshtymyn!», deıdi №20 Bógen orta mektebiniń dene shynyqtyrý páni muǵalimi, «Kıokýshın Býdokaı karate» úıirmesiniń jetekshisi Meıram Álishev.
Dzıýdoshy Nurqanat Serikbaev Grýzııadaǵy Grand Slam týrnıriniń chempıony atandy
