«Birneshe kún buryn jaqsy jańalyq estidik. Astanadaǵy Respýblıkalyq fızıka-matematıka mektebiniń oqýshysy Bórte Saıranbekqyzy álemniń jetekshi ýnıversıtetteriniń biri - Harvard University-ge qabyldandy. Bul bir ǵana oqýshynyń jetistigi emes, tutas bilim júıesiniń áleýetin kórsetetin mańyzdy belgi der edim.
Búginde Qazaqstannyń bilim salasy jańa sapalyq kezeńge qadam basyp otyr. Muny naqty derekter de dáleldeıdi. Máselen, «Bolashaq» halyqaralyq baǵdarlamasy 1993 jyldan beri 12,5 myńnan astam qazaqstandyqty shetelde oqytqan. Qazirdiń ózinde 1 400-den astam stıpendıat álemniń jetekshi ýnıversıtetterinde bilim alyp júr. Al 2026 jylǵa 635 grant bólinýi bul baǵyttaǵy jumystyń júıeli túrde jalǵasyp jatqanyn kórsetedi», - deıdi spıker.
Ol el jastarynyń tildik daıyndyǵy men halyqaralyq testileý mádenıeti de aıtarlyqtaı damyp jatqanyn alǵa tartty. Ashyq derekterge qaraǵanda, 2024-2025 jyldary Qazaqstanda IELTS tapsyrǵandardyń 89%-y ony ýnıversıtetke túsý maqsatynda tańdaǵan. Sonymen birge qytaı tilin meńgerýge qyzyǵýshylyq ta ósip keledi.
«Osyndaı kórsetkishter bilim berý júıesindegi sapalyq ózgeristerdiń naqty nátıjesin kórsetedi. Iаǵnı, búgingi oqýshy tek mektep baǵdarlamasymen shektelmeı, halyqaralyq deńgeıde básekege túsýge daıyndalyp jatyr.
Sonymen qatar, álemniń úzdik ýnıversıtetterine túsý básekesiniń ózi óte joǵary. Mysaly, Harvard College deregine sáıkes, bir oqý jylynda 47 893 ótinim túsip, sonyń tek 2 003-i ǵana qabyldanǵan. Mundaı jaǵdaıda qazaqstandyq oqýshynyń irikteýden ótýi úlken daıyndyq pen júıeli eńbektiń nátıjesi ekeni anyq.
Degenmen, jetistiktermen qatar, oılanatyn tustar da bar. Bilim sapasy barlyq óńirde birdeı emes. Qala men aýyl arasyndaǵy aıyrmashylyq, materıaldyq baza men kadr máselesi áli de ózekti», - deıdi Seıitjapar Quralbek.
Onyń paıymynsha, osyndaı jeke jetistikterdi júıeli nátıjege aınaldyrýdy basty mindet etý kerek. Iаǵnı, daryndy oqýshynyń tabysy kezdeısoqtyq emes, qoljetimdi múmkindikke aınalýy tıis.
