Jarysta komandaǵa bar bolǵany úsh kún berilipti. Onyń eki kúni jobany jasap, robotty synaqtan ótkizgen jastar qysqa ýaqyt ishinde «Jeztabanǵa» kamera arqyly aınalany tanyp, kedergini baıqap, joldy ózi tańdaýǵa múmkindik beretin algorıtm jazǵan.
«Jeztaban» jolynan jańylmaǵanymen, bastapqyda aldyndaǵy kedergi aınalasyndaǵy qýystarǵa kelgende kidirip qala beripti. Áýelgide mýltımodaldi jasandy ıntellekt modelin bult arqyly qoldanyp, úsh túrli trassaǵa jeke algorıtm men fýnksııa daıyndaý jospary da bolǵanmen jarys kezinde ınternettiń álsizdigin eskerip, tapqyr jastar kodtyń mańyzdy bóligin ǵana ózgerte otyryp, ıttiń «oılanýyna» 1 sekýndtan ýaqyt berip turdy. Osylaısha, «Jeztaban» ár kedergi aldynda baǵytyn ózi tapty. JI kózi arqyly robot tapsyrmany jyldam oryndady.
«Synaq aldynda «ıtimiz» jol aıaǵyna jetpeı qalsa, bárin qaıtadan bastadyq. Tipti qonaqúıde ár jerge ústel qoıyp, «Jeztabandy» jattyqtyra berdik. Tipti tańdy uıqysyz qarsy alǵan kezimiz de boldy. Jalpy ózime Unitree Go2-niń kamerasy unaıdy. Osy arqyly kóptegen kompıýterlik vıjn men fantastıkalyq joba jasaýǵa bolady. Taǵy bir tıimdi tusy – 4D lidar arqyly «ıtke» aldyndaǵy zattardy nemese joldy «seziný» múshesin berýge bolady. Osy jarys mundaı robottardy jetildirip, túrli oqys oqıǵalar kezinde qaýipti aımaqtarǵa júk tasymaly men adamdardy izdeýge, qutqarýǵa «jumsaýǵa» bolatynyn dáleldedi dep oılaımyn. Operasııalyq júıesine kirip, motorlar men negizgi baǵdarlamalyq bóligine óz logıkasyn engizip, «jan bitirgen» ıtimiz sharty qıyn úsh trassany ótti. «Jeztabannyń» bul jeńisi – izdenistiń jemisi», deıdi komanda kapıtany Ernur Qanat.
Ernurdyń aıýynsha festıvalǵa qatysqan komandalardyń kópshiligi robot ıtti konsol arqyly qozǵaltýdan aspaǵan. Bulardyń negizgi qarsylastary SDU University komandasy bolypty. Olar da robotty barynsha jetildirýge tyrysypty. Biraq ekinshi trassaǵa kelgende ıtteri durys ótpeı qalǵan. «Olardyń eńbekteri zor boldy, sondaı bedeldi ýnıversıtettiń stýdentterimen kezdesip, básekeles bolǵanymyzdy maqtan tutamyz», deıdi qyzylordalyq jastar.
Jobany ázirleýde jasandy ıntellekt quraldarynyń da kómegine súıengen jastar kod jazýda «Gemini» men «ChatGPT» júıelerin paıdalanypty. Al negizgi sheshimder, test nátıjeleri men beıimdeý jumystaryn komanda músheleri ózderi jasap shyqty.
Qazir jeńimpaz «Jeztaban» jasandy ıntellekt arqyly ózdiginen júrip-tura alady, al komanda osy baǵyttaǵy izdenisterin jalǵastyra beredi.
Qyzylorda
