San-Karlonyń alǵashqy gastroli

Jumyr jerdegi eń kóne de ataqty San-Karlo teatry Qazaqstanǵa alǵash ret gastrolmen keledi. Tek eki kún – 5 jáne 6 shildede «Astana Opera» sahnasynda Adolf Adannyń «Jızel» baleti álemdik deńgeıdegi juldyzdar – Norvegııa ulttyq baletiniń prıma balerınasy Iolanda Korreanyń jáne premeri Ioel Karrenonyń qatysýymen ótedi. Jızel partııasyn oryndaıtyn prıma balerına Iolanda Korrea tamasha tehnıkasymen áıgili, onyń bıleý mánerinde min joq, oǵan keremet úılesimdilik – sahnada jarqyrap, jeńil, ásem ári senimdi qımyldaý, mýzykaǵa degen joǵary qabilet tán. Onyń serigi Ioel Karreno hanzada Alberttiń rólin somdaıdy. Kýbalyq bıshi qaıtalanbas dara ártistik qabiletimen jáne sahnaǵa saı tamasha dene bitimimen súısindiredi. Ol kúrdeli qımyldardy asqan sheberlikpen taza oryndaýdy, bı qımylyn mánerli ádiske salýdy jetik meńgergen. 60 adamnan turatyn neapolıtandyq teatrdyń balet trýppasy «Jızel» baletin KSRO halyq ártisi, Memlekettik syı­lyq ıegeri Lıýdmıla Semenıakanyń redak­sııasynda usynady. Úlken teatrdyń prımasy Jızel partııasyn dúnıejúzinde eń úzdik oryndaıtyndardyń biri bolǵa­nyn eske salaıyq. Sıýjetke, ańyzǵa aınal­ǵan qyzdar-vıllısalar – toıǵa deıin kóz jumǵan, aldanǵan qalyńdyqtar negiz bolǵan. Olar ómir baqı orman kezip, túngi jolaýshylardy eliktirip, álsirep ólgenshe bıge shyr aınaldyrýǵa májbúr. «Gúlmen árlengen nekeqııar kóılekterin kıip... aıdyń jaryǵynda toqtaýsyz bıleıtin vıllısalar bıleýge berilgen ýaqyt aıaqtalýǵa jaqyn qalǵanyn sezgen saıyn qumarlana ári jyldamyraq bıleı túsedi, sosyn olar muzdaı sýyq múrdelerine qaıta oralady...» (G.Geıne).  Jızel esimdi aýyl qyzy Albertke – sharýa bolyp kıingen aqsúıekke ǵashyq bolady. Jızel jigit te ony súıetinine berik senimdi. Alberttiń qalyńdyǵy bar eke­ninen ol áli habarsyz. Kóp uzamaı shyndyq ashylady. Jızel qusadan kóz jumady. O dúnıelik bolsa da, ol ózin satyp ketken kúıeýjigitti súıip ótedi. Ar-uıaty qınaǵan Albert tún ishinde onyń qabirine kelgende, qyz ony vıllısalardan qutqarady. Atalǵan gastrol bir jyl buryn qol qoıylǵan qos teatrdyń Seriktestik jónindegi memorandýmy sheńberinde júzege asqan alǵashqy joba bolmaq. Sýrette: «Jızelden» kórinis.