Denıs Ten ázirge úshinshi orynda (vıdeo)

ASTANA. 27 naýryz. Qytaıdyń Shanhaı qalasynda mánerlep syrǵanaýdan álem chempıonaty ótýde. Dodada el namysyn jalǵyz Denıs Ten qorǵaýda. Búgin ol qysqa baǵdarlama boıynsha jarys jolyna shyqty. Bul týraly egemen.kz habarlady. Osy rette aıta keter jaıt, Denıs Ten aıdynǵa shyqqan kezde uıymdastyrýshylar qatelikke jol berdi. Olar bizdiń sportshynyń kompozısııasyn qosý kezinde salǵyrttyq tanytyp, Tenniń júıkesine aıtarlyqtaı salmaq túsirdi. Al mánerlep syrǵanaýda mundaı jaıt sportshyǵa keri áserin tıgizeri anyq. Nátıjesinde, Denıs alǵashqy jattyǵýynda qatelik jiberýge májbúr boldy. Desek te, qalǵan ýaqytta barlyq jattyǵýyn minsiz oryndaǵan ony tóreshiler 85,89 upaımen baǵalady. Bul kórsetkishpen Qazaqstan sportshysy ázirge úshinshi orynda keledi. Al Japonııa senim artqan Iýdzýrý Hanıý 95,20 upaımen kósh bastap tur. Ekinshi orynǵa 92,74 upaı jınaǵan Ispanııa sportshysy Haver Ernandes jaıǵasty. Erler arasyndaǵy erkin baǵdarlama erteń bolady. Saıysty «Qazaqstan» ulttyq telearnasy Astana ýaqytymen saǵat 15:35-ten bastap tikeleı efırde kórsetedi. Aıta keteıik, álem chempıonatynyń irikteý kezeńine qatysqan Abzal Rahymǵalıev jáne juptyq bıleý saıysynda óner kórsetetin Ilııas Álı men Karına Ýzýrovalar negizgi kezeńge óte almady. Elaman Qońyr. Derek: egemen.kz. Sýret: facebook.com.