Bul kúnderi jigit aǵasy jasyna jetken Jetpisbaevtyń qandaı qarymdy balýan bolǵanyn kózi qaraqty jankúıerler jaqsy biledi. Sporttyq mansabyn qazirgi Jetisý oblysy Kerbulaq aýdanynyń Qoıankóz aýylynda óz kásibine jan-tánimen berilgen jergilikti jattyqtyrýshy Baqyt Qoqysbekovtyń qol astynda bastaǵan ol toqsanynshy jyldardyń bel ortasynda Qazaqstannyń beldi balýandarynyń birine aınaldy. Samboshylardyń elishilik jarysynda Berikke teń keler eshkim tabylmady. Ol bes-alty jyldaı 57 jáne 62 kg salmaq dárejeleriniń tizginin qolyna myqtap ustady. «Sambonyń akademıgi» atanǵan Kereı Qoıshybektiń ózi bul jigittiń keleshegine zor úmitpen qarady.
Shetelde de Jetisýdyń jolbarysyna jarytyp qarsylyq kórsete alǵan balýandar sırek edi. Keıipkerimiz qarsy kelgenderin alyp ta, jalyp ta jyqty. Eń bastysy, ol qorqýdy, qaımyǵýdy bilmeıtin. Jeńilip jatsa, jigeri jasymaıtyn. Sońǵy sátke deıin kúresip, tabandylyq pen tózimdiliktiń, jeńiske degen jigerdiń úlgisin kórsetti. Jeńip jatsa, ózgeler sekildi ýaqyt sozyp júrip almaıdy. Kesirinshe, atoılap utýǵa tyrysatyn. Mine, osy qasıetteri úshin kórermen Berikti erekshe jaqsy kóretin.
Astanada dzıýdodan Qazaqstan Barysy Grand Slam týrnıri ótedi
Saryózektiń sańlaǵy dzıýdony da erkin meńgerdi. Almatyǵa kelip, tanymal bapker Manarbek Taýtanovtyń qol astynda sheberligin shyńdady. Ol kisiden kóp nárse úırendi. Kúrestiń bul túrinen de eleýli tabystarǵa qol jetkizip, sport sheberi normatıvin oryndady. Biraq japondar oılap tapqan ónerdi shyndap qýmady. Eger oǵan myqtap den qoıǵanda Beriktiń baǵyndyrǵan belesteri budan da bıik bolar edi. Bul ásire maqtaý emes, shyn sózimiz. Olaı deýge negiz, toqsanynshy jyldardyń ekinshi jartysy men jańa ǵasyr tabaldyryqtan attaǵan tusta dzıýdo kúresiniń juldyzdaryna aınalǵan jampoz jigitterdiń deni dál osy Jetpisbaevtan ońbaı jeńilgenin bizdiń de kózimiz kórdi.
– Árıne, dzıýdodan odan da zor tabystarǵa qol jetkizýge bolar edi. Oǵan kúsh-jigerim de, qarym-qabiletim de jetetin edi. Biraq «joqtyq jomarttyń qolyn baılaıdy» demekshi, toqsanynshy jyldardaǵy toqyraý zamanynda keńinen kósilýge múmkindik bolmady. Oqý-jattyǵý jıyndaryna qatysyp, jaýapty jarystarda baq synaý úshin árkimniń aldyna baryp, aqsha suraýǵa týra keldi. Jasyratyny joq, qoly ashyq, jany jaısań aǵalarymnyń qamqorlyǵyn kórdim. Ony joqqa shyǵarmaımyn. Biraq únemi kishireıe berý qaıbir jaqsylyq deısiz. Soǵan qynjyldym. Bozkilemnen qol úzgennen keıin kásipkerlikpen aınalystym. Sol kezde artymyzdan ergen ini-qaryndastarǵa qoldaý kórsetýdi ózime paryz sanadym. Meniń qamqorlyǵymdy kórgen shákirtterimniń aldy álem chempıonaty, Azııa oıyndary jáne qurlyq birinshilikterinde jeńis tuǵyryna kóterildi. О́zim tek demeýshi bolyp qana qoımaı, olardyń jattyǵý jumystaryna tikeleı aralastym. Únemi jandarynda júrdim. Sol úshin de Qazaqstannyń eńbek sińirgen jattyqtyrýshysy ataǵyn aldym. Byltyrǵy jyly Jetisý oblysy dzıýdo federasııasynyń vıse-prezıdenti qyzmetine taǵaıyndaldym. О́zime júktelgen jaýapkershilikti barynsha abyroıly atqarýǵa tyrysyp júrmin. Al jeke ózimniń ómirlik prınsıpim – qazaqtyń daryndy jastaryn halyqaralyq arenaǵa shyǵarý úshin barynsha kúsh salý, – dep Berik Jetpisbaev keńinen kósildi.
«Jastar» sport saraıynda tórt tatamı tóseldi. Uıymdastyrý máselesinde bir min joq. Bári joǵary deńgeıde boldy. Eki kún boıy respýblıkamyzdyń birqatar óńirinen kelgen jas órender bir-birimen arpalysyp, jeńis tuǵyrynda kimderdiń marqaıyp turýǵa laıyq ekenin anyqtady. Uldar arasynda shyraıly Shymkentten kelgen balýandar shashalaryna shań juqtyrmaı, jalpy komandalyq esepte kósh bastady. Qyzdardyń saıysynda Jetisý óńiriniń sulýlary top jardy. Atalǵan týrnırde esimderi tómende atalǵan dzıýdoshylar óz salmaq dárejeleri boıynsha top jardy:
Uldar:
50 kg – Álınur Jasulan (Shymkent), 55 kg – Erasyl Ermekbaı (Shymkent), 60 kg – Batyrhan Asqaruly (Almaty qalasy), 66 kg – Aldııar Aımurat (Almaty oblysy), 73 kg – Temirhan Muhtar (Shymkent), 81 kg – Bekzat Qoǵaıbek (Jetisý), 90 kg – Aldııar Aıtmuhan (Almaty oblysy) jáne +90 kg – Nurqanat Qabdylsámet (Abaı).
Qyzdar:
0 kg – Sezim Seıitnur (Jetisý), 44 kg – Aıym Aıdosqyzy (Jetisý), 48 kg – Janbota Kúnǵazy (Abaı), 52 kg – Janerke Qanaǵat (Abaı), 57 kg – Maral Erkin (Jetisý) ,63 kg – Ajar Erbolqyzy (Jetisý), 70 kg – Merýert Ádiljan (Jetisý) jáne +70 kg – Aıǵanym Marat (Jetisý).
