Kollajdy jasaǵan – Qonysbaı ShEJIMBAI, «EQ»
Úkimettiń baspasóz qyzmetiniń málimdeýinshe, keshendi jospar halyq densaýlyǵyn janýarlar men adamǵa ortaq aýrýlardan qorǵaýǵa, sondaı-aq janýarlardy aýrýlardan saqtaý men veterınarııalyq-sanıtarııalyq qaýipsizdikti nyǵaıtýǵa baǵyttalǵan.
«Júıeli sharalardyń nátıjesinde Qazaqstanda búginde aýsyl, afrıkalyq jylqy obasy, afrıkalyq jáne klassıkalyq shoshqa obasy sekildi janýarlardyń birqatar asa qaýipti aýrýlary boıynsha turaqty epızootııalyq ahýal qalyptasyp otyr. Bul óz kezeginde otandyq mal sharýashylyǵy ónimderiniń eksporttyq áleýetin keńeıtýge múmkindik berdi», dedi Aýyl sharýashylyǵy vıse-mınıstri Amanǵalı Berdalın.
Jospardyń negizgi basymdyqtary retinde janýarlardyń asa qaýipti aýrýlaryna qarsy kúres, veterınarııa mamandarynyń jalaqysyn kóterý, veterınarııalyq uıymdardyń materıaldyq-tehnıkalyq bazasyn jaqsartý, eksporttyq jetkizilimderdi keńeıtý jáne ishki naryqty qorǵaý, zerthanalyq baqylaýdy kúsheıtý, ónimniń ómirlik sıkliniń barlyq kezeńinde (týǵan sátinen bastap ónimdi ótkizýge deıin) qadaǵalaý, veterınarııa salasyn sıfrlandyrýdy keńeıtý jáne veterınarııalyq farmasevtıka tehnologııalaryn damytý máseleleri aıqyndaldy. Qazirgi tańda elimizde veterınarııalyq preparattar óndiretin 21 zaýyt jumys isteıdi.
Qazaqstan aýmaǵyn janýarlardyń asa qaýipti aýrýlarynan qorǵaý, elimizdiń epızootııalyq turaqtylyǵyn saqtaý jáne tehnıkalyq reglamentterine sáıkes kelmeıtin ónimderdiń ishki naryqqa enýine jol bermeý úshin shekara mańyndaǵy aýmaqtarda veterınarııalyq 67 baqylaý beketi jumys isteıdi.
2025 jyly Qazaqstan shekarasy arqyly ımporttyq, eksporttyq jáne tranzıttik operasııalar barysynda memlekettik veterınarııalyq-sanıtarııalyq ınspektorlar 700 myń tonnadan astam mal sharýashylyǵy ónimin tasymaldaǵan 60 myńǵa jýyq avtokólikti tekserýden ótkizgen.
«Úderisterdi sıfrlandyrý, sondaı-aq derekterdi jınaý men berýdi avtomattandyrý sheńberinde «Aýyl sharýashylyǵy janýarlaryn sáıkestendirý» aqparattyq júıesine bastapqy jáne naqty derekterdi aqparattyq júıelerge avtomatty túrde tikeleı joldaýǵa múmkindik beretin jańa fýnksıonaldar ázirlenip, qoldanysqa engizildi. Olardyń qatarynda ISZH-MOBILE, TortTulik júıeleri bar. Mal sharýashylyǵy ónimderin qadaǵalaýdy «fermadan ústelge deıin» qaǵıdaty boıynsha qamtamasyz etý sheńberinde «Veterınarııalyq-sanıtarııalyq saraptama» modýli júzege asyrylyp otyr. Atalǵan júıege ishki saýda, zerthana, soıý nysandary qosylǵan. Sonymen qatar qoǵamdyq tamaqtaný obektilerin modýlge kezeń-kezeńimen qosý boıynsha jumystar júrgizilip jatyr», delingen Úkimettiń habarlamasynda.
Budan bólek, 2030 jylǵa qaraı Aýyl sharýashylyǵy mınıstrliginiń aýmaqtyq bólimsheleri men vedomstvolyq uıymdarynyń materıaldyq-tehnıkalyq jaraqtandyrylýyn 80%-ǵa deıin jańartý jáne tolyqtyrý josparlanyp otyr. Sondaı-aq jergilikti atqarýshy organdarǵa qatysty veterınarııalyq uıymdar qyzmetkerleriniń eńbekaqy tóleý qory 1,5-2,5 esege deıin artady.
Byltyrǵy jyldyń sońynda Senatta ótken Úkimet saǵatynda veterınarııa salasy aqsap turǵany aıtylǵan.
