Foto: primeminister.kz
Búginde óńirde kommýnaldyq ınfraqurylymdy aýqymdy jańartý jumystary júrgizilip jatyr. Jańǵyrtylyp jatqan negizgi nysandardyń biri – Oral qalasyn jylý jáne ystyq sýmen qamtamasyz etetin «JaıyqTeploEnergo» AQ qazirgi ýaqytta «qyzyl aımaqta» tur. 2029 jylǵa deıin júrgiziletin jańǵyrtý jumystarynyń nátıjesinde tozý deńgeıin 83%-dan 60%-ǵa deıin tómendetip, nysandy «sary aımaqqa» shyǵarý josparlanǵan.
Sonymen qatar, tozý deńgeıi 65%-dy quraıtyn uzyndyǵy 1,8 shaqyrym bolatyn №7 jylý magıstralin qaıta jańartý jumystary jalǵasyp jatyr. Qanat Bozymbaev qurylys-montajdaý jumystarynyń sapasyn qatań baqylaýdy tapsyrdy. Atalǵan jylý magıstrali 24 bıýdjettik mekeme men 130 turǵyn úıdi jylýmen qamtamasyz etedi. Jobany júzege asyrý jelilerdiń tozýyn azaıtýǵa, júıeniń ótkizý qabiletin arttyrýǵa jáne paıdalaný shyǵyndaryn tómendetýge múmkindik beredi.
Energetıkalyq jáne kommýnaldyq ınfraqurylymdy jańǵyrtýǵa qansha qarjy jumsalady?
Sondaı-aq Qanat Bozymbaev Oral qalasynyń Zachagan kentindegi №29 káriz-sorǵy stansasynyń jumysymen tanysty. Qazirgi tańda munda qurylys-montajdaý jumystarynyń 40%-y oryndalǵan. Jobanyń quny – 1,7 mlrd teńge. Jańǵyrtý aıaqtalǵannan keıin, 2027 jyldyń sońyna qaraı stansa táýligine 14 700 tekshe metrge deıin sarqyndy sýdy aıdaı alady. Bul júıege jańa abonentterdi qosýǵa jáne kenttiń kommýnaldyq ınfraqurylymyn tıimdi basqarýǵa jol ashady.
Odan keıin vıse-premer «Batys Qazaqstan aımaqtyq elektr jelilik kompanııasy» JShS-niń qalalyq elektr jelileri keshenine bardy. Munda 138 shaqyrym elektr jelilerin jańǵyrtýǵa baǵyttalǵan úsh kezeńdi joba júzege asyrylyp jatyr. Qazirgi ýaqytta jobanyń eki kezeńi aıaqtalyp, úshinshi kezeń boıynsha jumystar jalǵasýda.
Qanat Bozymbaev qazirgi jańǵyrtý qarqynyn saqtaý óńirdiń kommýnaldyq ınfraqurylymyndaǵy júıeli máselelerdi sheshýge jáne energııamen jabdyqtaý senimdiligin arttyrýǵa múmkindik beretinin atap ótti. Júrgizilip jatqan jumystardyń nátıjesinde oblystaǵy elektr jelileriniń tozý deńgeıi 82%-dan 75,4%-ǵa deıin tómendedi.
Elimizdiń energetıkalyq nysandarynda aýqymdy jóndeý jumystary júrip jatyr
Jumys sapary barysynda otandyq óndirýshilerdi qoldaý máselesine erekshe nazar aýdaryldy. Jobalarda qazaqstandyq temirbeton tirekteri, kabeldik-ótkizgish ónimder, metall konstrýksııalar, transformatorlyq qosalqy stansalar, polıetılen qubyrlary jáne ózge de jabdyqtar paıdalanylyp jatyr. Keıbir nysandarda qazaqstandyq qamtý úlesi 80-99%-ǵa deıin jetedi.
Qazirgi tańda EKSJ elektrondyq platformasynda Batys Qazaqstan oblysy boıynsha jalpy somasy 113,7 mlrd teńgeni quraıtyn 38 joba tirkelgen. Onyń ishinde jalpy quny 21,9 mlrd teńge bolatyn 10 pılottyq joba belsendi júzege asyrylý kezeńinde tur.
