Amerıkalyq «Firebird» kompanııasy jasandy ıntellekt ınfraqurylymyn qurýǵa, derekter ortalyqtaryn damytýǵa, joǵary ónimdi esepteý júıelerin ázirleýge mamandanǵan. Kompanııa álemniń túrli óńirinde jobalardy júzege asyryp, jasandy ıntellekt, joǵary ónimdi esepteýler, sıfrlyq ınfraqurylym salasyndaǵy álemdik kóshbasshy «NVIDIA» sııaqty jetekshi tehnologııalyq seriktestermen yntymaqtastyq ornatqan. Kompanııanyń sheshimderi álemdegi jetekshi sýperkompıýterler men derekterdi óńdeý ortalyqtarynyń basym bóliginde qoldanylady. Sondaı-aq qazirgi zamanǵy generatıvti jasandy ıntellekt modelderiniń eleýli bóliginiń negizin quraıdy.
Kezdesý barysynda ulttyq jasandy ıntellekt ınfraqurylymyn damytý máseleleri talqylandy. Olardyń qatarynda joǵary ónimdi esepteý qýattaryn qurý, zamanaýı derekterdi óńdeý ortalyqtaryn ornalastyrý, halyqaralyq tehnologııalyq seriktesterdi tartý máselesi talqylandy. Premer-mınıstr jasandy ıntellekt pen sıfrlyq ınfraqurylymdy damytý elimizdiń negizgi basymdyqtarynyń biri ekenin aıtty.
«Memleket basshysy bıylǵy jyldy «Sıfrlandyrý jáne jasandy ıntellekt jyly» dep jarııalady. Osy aptada «Digital Qazaqstan» sıfrlyq transformasııa men jasandy ıntellektini damytý týraly jalpyulttyq strategııasy qabyldandy. Qazir Ekibastuz qalasynda negizgi sıfrlyq jobalardyń biri – «Derekterdi óńdeý ortalyqtarynyń alqaby» jobasy júzege asyrylyp jatyr. Bizdiń maqsatymyz – jahandyq sıfrlyq ınfraqurylymdy ornalastyrýǵa arnalǵan alań qalyptastyrý. Biz «Firebird» jáne «NVIDIA» seriktesterimen jasalǵan kelisimderdi joǵary baǵalaımyz», dedi Úkimet basshysy.
Premer-mınıstr «DО́O alqaby» jobasynyń negizgi artyqshylyqtaryna nazar aýdardy. Olardyń qatarynda aýqymdy jer rezervi, jeńildikter, elektr energııasynyń básekege qabiletti baǵasy bar. Jobany keń aýqymda taratý múmkindigi ınvestorlarǵa mańyzdy faktor, ıaǵnı qazir 300 MVt qýat qoljetimdi bolsa, aldaǵy ýaqytta ony kezeń-kezeńimen 1 GVt-qa deıin arttyrý josparlanyp otyr. «Firebird» kompanııasynyń negizin qalaýshy ári bas dırektory Razmık Ovakımıan elimizdiń sıfrlyq ınfraqurylymdy damytýdaǵy joǵary áleýetin atap ótti.
«Prezıdenttiń 2026 jyldy «Jasandy ıntellekt jyly» dep jarııalaý jónindegi kóregen sheshimin erekshe atap ótkim keledi. Qazaqstanǵa alǵash kelgen kezde-aq eldiń bıik maqsattary, tehnologııalyq tájirıbesi men adam kapıtaly álemdik deńgeıde ekeni birden baıqaldy. Búginde jasandy ıntellektiniń ozyq esepteý qýattaryna, talanttardy damytýǵa ári ınnovasııalyq ekojúıelerge ınvestısııa salyp jatqan elder erteńgi ekonomıkalyq múmkindikterdi qalyptastyratyn bolady. «Firebird» AQSh-tyń ozyq tehnologııalaryn engizý tájirıbesin, jahandyq jasandy ıntellekt ekojúıesindegi tyǵyz seriktestik baılanystaryn jáne iri aýqymdy ınfraqurylymdyq jobalardy qaýipsiz ári erekshe jyldamdyqpen júzege asyrý qabiletin biriktiredi. 2027 jyly jobany iske qosý elderińizdi álemdegi jetekshi on eldiń qataryna qosady. Bizdiń komandamyz myqty, múmkindikterimiz zor jáne biz Qazaqstan Úkimetimen, «NVIDIA» kompanııasymen jáne AQSh-taǵy seriktesterimizben yntymaqtasa otyryp, maqsat-muratty shynaıy júzege asyrýǵa óz úlesimizdi qosatynymyzǵa qýanyshtymyz», dedi Razmık Ovakımıan.
«NVIDIA» kompanııasynyń vıse-prezıdenti Rev Lebaredıan «DО́O alqaby» jobasyn júzege asyrýǵa arnalǵan negizgi tehnologııalyq quraldar men tásilderdi, Qazaqstannyń jahandyq jasandy ıntellekt ekojúıesine ıntegrasııalaný keleshegin tanystyrdy.
«Jasandy ıntellektini damytý úshin «bes qabatty tort» dep ataıtyn qurylym qajet. Bul deńgeıde tómengi qabattardaǵy barlyq tehnologııany alyp, olardy túrli sala men baǵytqa arnalǵan qosymshalarǵa aınaldyramyz, osylaısha olar naqty paıda men qundylyq ákeledi. Biraq bári energııadan bastalady. Eger energııa bolmasa, qalǵanyn damytý múmkin emes. Bul – irgetas. Qazaqstanda energııa resýrstary bar. Onyń qory mol ári ony odan ári óndirý múmkindigi bolǵandyqtan, Qazaqstan bul baǵytty bastaý úshin óte qolaıly oryn bolyp sanalady. Shyn máninde Qazaqstan osy «bes qabatty torttyń» árbir deńgeıine qatysa alady. Meniń kórgenim, oqyǵanym jáne qazir osynda bolyp baıqaǵanym boıynsha, Qazaqstannyń rýhy men jigeri alǵa qaraı umtylýǵa jáne eldiń bar ıgiligin – tabıǵı resýrstaryn da, adam kapıtalyn da jasandy ıntellektiniń jańa dáýirine qadam basý úshin paıdalanýǵa baǵyttalǵan», dedi Rev Lebaredıan.
Kezdesýge qatysýshylar mundaı jobalarǵa álemde qyzyǵýshylyqtyń qarqyndy ósip kele jatqanyn atap ótti. Halyqaralyq sarapshylardyń baǵalaýynsha, aldaǵy jyldary jasandy ıntellektiniń jahandyq naryǵynyń kólemi júzdegen mlrd dollardan asady, al AI-modelderdi oqytý jáne paıdalaný úshin qajetti esepteý qýattaryna suranys jyl saıyn eki ese qarqynmen ósip keledi. Osyǵan baılanysty memleketter ázirleýshiler men tehnologııalar úshin ǵana emes, sonymen qatar jańa býynnyń sıfrlyq ekonomıkasynyń negizine aınalatyn ınfraqurylym úshin de belsendi básekege túsip otyr.
«Memleket basshysynyń tapsyrmasyna sáıkes elimiz jasandy ıntellektini damytýǵa arnalǵan ulttyq ınfraqurylymdy júıeli túrde qalyptastyryp jatyr. «DО́O alqaby» jobasy jasandy ıntellekt ekonomıkasynyń jańa býyny – JI-tokender ekonomıkasynyń negizgi platformalarynyń birine aınalady. 10 mlrd dollar kólemindegi ınvestısııa elimizde «NVIDIA» GB300 jáne «Vera Rubin» chıpterin qosa alǵanda, sońǵy býyndaǵy 100 myń GPU-chıpteri negizinde aýqymdy esepteý klasterin qurýǵa múmkindik beredi. Bizdiń baǵalaýymyzsha, jobany júzege asyrý jyl saıyn keminde 3 mlrd dollar kóleminde eksporttyq kiris ákeledi, jańa jumys oryndaryn ashady, jahandyq tehnologııalyq kompanııalardy tartady. Elimizdiń Eýrazııadaǵy negizgi sıfrlyq habtardyń biri retindegi pozısııasyn nyǵaıtady», dedi Jaslan Madıev.
Elimizge zamanaýı derekter ortalyǵy men esepteý platformalaryn damytý ınvestısııa tartýǵa, sıfrlyq servısterdi lokalızasııalaýǵa, ınjenerlik kadrlardy daıarlaýǵa ári tehnologııalar salasynda jańa eksportqa negizdelgen baǵyttardy qalyptastyrýǵa múmkindik ashady. О́ziniń joǵary ónimdi ınfraqurylymynyń bolýy, sondaı-aq ǵylymı zertteýler júrgizýge, startaptardy qoldaýǵa, bultty servısterdi keńeıtýge, el ishinde jasandy ıntellekt sheshimderin keńeıtýge jaǵdaı jasaıdy.
«Biz ondaǵan jylǵa eseptelgen ınfraqurylymdy qalyptastyryp jatyrmyz. Jobany júzege asyrý zamanaýı esepteý resýrstaryna qoljetimdilikti qamtamasyz etýge, jasandy ıntellekt tehnologııalaryn engizýdi jedeldetýge ári jahandyq tehnologııalyq kompanııalardy tartýǵa qolaıly jaǵdaı jasaýǵa múmkindik beredi. Bizdiń maqsatymyz – Qazaqstanda Eýrazııadaǵy eń iri sıfrlyq klasterlerdiń birin qalyptastyrý», dedi Baǵdat Mýsın.
Kezdesý qorytyndysynda jasandy ıntellekt pen sıfrlyq ınfraqurylym salasyndaǵy yntymaqtastyq týraly jalpy kólemi 10 mlrd dollardy quraıtyn kelisimderge qol qoıyldy.
