Oljas Súleımenov týraly «Oljas – On molodoı» atty eńbek 2016 jyly jaryq kórgen edi. Keıin bul izdenis jalǵasyp, jańa kitaptarmen tolyqty. Aqynnyń 90 jyldyq mereıtoıyna oraı jaryq kórgen «О́siris zańy» men «Jer áleminiń Elshisi» kitabynyń tusaýy Almatyda ótken halyqaralyq forým barysynda kesildi.
Kórnekti aqyn, qoǵam qaıratkeri ári «Nevada–Semeı» halyqaralyq antııadrolyq qozǵalys kóshbasshysy Oljas Súleımenovtiń mereıtoıyna arnalǵan «О́z jeriniń elshisi» atty VII halyqaralyq Eýrazııa mádenıetterin jaqyndastyrý forýmyna Qazaqstanmen birge Fransııa, Reseı, Túrkııa, Ázerbaıjan, Qyrǵyzstan, О́zbekstan, Tájikstan, Qytaı men AQSh syndy elderdiń mádenıet, ǵylym men ádebıet ókilderi qatysty.
Forýmnyń plenarlyq otyrysynda Premer-mınıstrdiń orynbasary – Mádenıet jáne aqparat mınıstri Aıda Balaeva Memleket basshysy Qasym-Jomart Toqaevtyń mereıtoı ıesine joldaǵan quttyqtaýyn jetkizdi.
«Oljas Súleımenovtiń ómir joly – Otanǵa adaldyqtyń, joǵary azamattyq ustanymnyń jáne jalpyadamzattyq qundylyqtarǵa beriktiktiń jarqyn úlgisi. Onyń shyǵarmashylyǵy qazaq ádebıetiniń ǵana emes, álemdik rýhanııattyń da mańyzdy qubylysyna aınaldy», delingen quttyqtaýda.
«Qazaq oqyrmanyna Oljas Súleımenovtiń bolmysyn keńinen tanystyrǵym keldi. Onyń ǵalamdyq oılaý júıesi, adamzat tarıhy men bolashaǵyna qatysty paıymdary qyzyqtyrdy. Ásirese «О́siris zańy» eńbegindegi tyń kózqarastar erekshe áser etti», deıdi aýdarmashy Eskendir Ertaı.
Qalamgerdiń aıtýynsha, «Baıtaq» partııasynyń Oljas Súleımenovti Nobel syılyǵyna usyný bastamasyn qoldaý maqsatynda kezekti jınaqqa «Jer áleminiń Elshisi» degen ataý berilgen.
Oljas Omarulynyń shyǵarmashylyq jáne qoǵamdyq qyzmetin nasıhattaýǵa úles qosyp júrgen Eskendir Ertaı túrki dúnıesi keńistigin nyǵaıtýǵa atsalysqan áriptesterine alǵys aıtyp, barsha jýrnalıst qaýymyn kásibı merekemen quttyqtady.
