Qazaqstannyń barsha jurtshylyǵy Elbasynyń kezekten tys prezıdenttik saılaýǵa túsýin qalaıdy
Otyndy shapqanǵa jaqtyr
Táýelsiz Qazaqstan Elbasymyzdyń eń órkenıetti 30 eldiń qataryna qosylamyz degen úlken ıdeıasymen qýattanyp, alǵa adymdap, erkin ilgerilep bara jatqan el. Biraq ómir qaladaǵy dańǵyl kóshe emes qoı, ómir – kedergisi, qaıshylyǵy mol, kúrdeli qubylys. Álemde ekonomıkalyq daǵdarys júrip jatyr, munaıdyń, gazdyń basqa da shıkizattardyń baǵasy túsip bara jatyr. Ýkraınadaǵy keleńsiz jaǵdaılarmen baılanysty Eýropa, Amerıka Reseıge sanksııa jasaýda. Bul, árıne, Reseıdiń ekonomıkasyna, basqa jaǵdaılaryna óziniń áserin tıgizedi. Biz Reseımen, Belarýs elimen bir ekonomıkalyq odaqta bolǵandyqtan, Reseıdegi qıyn jaǵdaı bizge de áser etetini sózsiz. Osylarmen birge elimizdiń tynysh, erkin damyp kele jatqanyn kóre almaıtyn jáne onyń táýelsizdigine, halqynyń birligine kóz alartyp qaraıtyn toptar da dúnıede barshylyq. Osyndaı qıyn-qystaý jaǵdaıda kópultty halqymyzdyń birligi, birtutastyǵy qarqyndy damýy aýadaı qajet.
Memleketti tájirıbesi mol úlken talant ıesi daryndy tulǵa basqarǵany kerek. Úlken tarıhqa kóz jibersek ylǵı da osylaı bolǵan. Buǵan mysal – Petr I, Abylaı han sııaqty tulǵalardyń memleketti basqarýlary. Osy jaǵdaılardy eskersek, búgingi qıyn-qystaý jaǵdaıda, Qazaqstan zııalylarynyń pikirinshe, bizdiń elimizdi, onyń ekonomıkasyn ári qaraı damytý Nursultan Nazarbaev sııaqty tulǵanyń ǵana qolynan keledi. Bizdiń Elbasymyz – tájirıbesi mol, úlken talant ıesi. Prezıdentimizdiń basqarýymen Qazaqstan halqy kóptegen qıynshylyqtardy jeńdi. Sondyqtan biz Nursultan Ábishulynyń prezıdenttik saılaýǵa qatysýyn shyn nıetimizben qalaımyz. Elbasynyń basshylyǵymen dúnıege «Nurly Jol» baǵdarlamasy keldi. Memleket tarapynan bul baǵdarlamaǵa qyrýar aqsha bólindi. Osy baǵdarlamany endi iske asyrý kerek. Qazaq aıtady ǵoı: Maldy tapqanǵa baqtyr, Otyndy shapqanǵa jaqtyr dep. Sol sııaqty osy baǵdarlamany iske asyrýdy baǵdarlamanyń avtorynyń ózi basqarǵany jón dep esepteımiz.
Jabaıhan ÁBDILDIN,
akademık, fılosofııa ǵylymdarynyń doktory,
professor.
Aqsaqaldar býyny úlken úmit artady
Elbasy «Qazaqstan-2050» dep atalatyn úlken baǵdarlamanyń atqarylý, júzege asý joldaryn, strategııalyq baǵdaryn naqtylap kórsetip berdi. Atalmysh strategııalyq baǵdarlamada elimizdiń ekonomıkalyq áleýetin arttyratyn, álemdi sharpyǵan qarjylyq daǵdarystardan Qazaqstandy qazirgideı baqýatty qalpynda alyp shyǵý joldary, halyq birligi men memleket turaqtylyǵy, rýhanı, mádenı ósý joldary, bári-bári qamtylǵan. Jáne bul baǵdarlamanyń ereksheligi osyndaı sheshýshi sátte halyqtyń yntasyn kóterip, jańa zamanǵa saı damý qadamymyzǵa zor yqpal etetindigi anyq.
Elbasy Nursultan Nazarbaevtyń elimizde kezekten tys saılaý ótkizý týraly Qazaqstan halqy Assambleıasy tarapynan túsken usynysty aıryqsha yntamen qabyldap, zań júzinde Jarlyqqa qol qoıýy, búgingi tańda halyqtyń basym bóligi keleshekke anyq baǵdardy túsine otyryp biraýyzdy bolýy, munyń bári Qazaq eliniń strategııalyq damý jolynda birige túskendigin kórsetip otyr. Budan biz neni baıqaımyz? Qazaqstan óz aldyna shańyraq kóterip Táýelsizdigin alǵan kezeńnen bastap Nursultan Nazarbaev kóshbasshysy retinde alǵashqy qadamyn jasaý aldynda turǵan jas memleketti sony jolǵa saldy, ózgege uqsamaıtyn naqty baǵyt ustanyp, álem aldyndaǵy abyroıyn, ózindik bet-beınesin qalyptastyrýǵa úlken kúsh jumsady. Áýeli ekonomıkaǵa kóńil bólip, halyqtyń ál-aýqatyn arttyrý jolyna tolaıym kúsh jumsap, Qazaqstan memleketiniń jańa zamandaǵy tarıhı baǵdaryn qalyptastyrdy.
Mine, osyndaı az ǵana ýaqyt aralyǵynda ǵasyrlap júrip ótetin joldy asqan aqylmandyqpen, jaza basýdan saqtaı otyryp, ózgemen teń terezeli tirshilikke jetkizý, árıne, erlik. Sony durys túsingen halqymyz osy turaqtylyq pen tynyshtyqty saqtap qalý nıetinde bir Týdyń astyna jıylyp, bir basqarýshynyń nusqaǵan týra jolymen kemel keleshekke batyl qadam jasaı berýdi qalap otyr.
Bizder de, aldyńǵy býyn ókilderi, elimizdiń búgingi «qoı ústine boztorǵaı jumyrtqalaǵan» berekeli shaǵyn kórip, jas urpaǵymyzdyń bilim men órkenıet jolynda qol jetkizip kele jatqan jetistikterine súısinýmen, álemniń aldyńǵy qatarly memleketterimen teń dárejede saıası-ekonomıkalyq qarym-qatynas jasaǵan jańa Qazaqstannyń baǵyt-baǵdaryna, keleshegine zor senimmen aldaǵy óter saılaýdy, onyń ishinde búgingi Kóshbasshy Nursultan Nazarbaevtyń qatysýyna jáne halyq senimine saı jeńip shyǵýyna úlken úmit artamyz.
Dosmuhammed KIShIBEKOV,
akademık, fılosofııa ǵylymdarynyń doktory.
Barshamyzdyń ortaq qalaýymyz
Qazaqstan Respýblıkasynyń Prezıdenti N.Nazarbaev 25 aqpanda kezekten tys prezıdenttik saılaý taǵaıyndaý týraly Jarlyqqa qol qoıdy.
Bul el tarıhyndaǵy aıtýly oqıǵa. Álem basynan árqıly saıası-ıdeologııalyq, tipten qantógiske bastaıtyn oqıǵalardy ótkizip otyrǵanda, prezıdenttik saılaýdyń máni bólekshe. Kórshi Reseı elindegi beleń alǵan ekonomıkalyq daǵdarys, rýbldiń qaýyrt quldyraýy bir keńistiktegi bizdiń elge áserin tıgizbeı qoımaıdy. Bolashaqty boljaý – múmkin emes istiń biri. Hakim Abaı «Kók tuman aldyńdaǵy keler zaman» dep edi. Aldaǵy zaman – kók tuman. Biz sol zamannan úmit sáýlesin izdeımiz. Sol úmit sáýlesin aldaǵy ótetin prezıdenttik saılaýdan tabamyz degen búkil Qazaqstan jurtynyń aq nıeti bar.
Úmit degen ánsheıin eleske qurylǵan sana emes. Men Prezıdent Nursultan Ábishuly Nazarbaevqa zor senimmen qarap, onyń aldaǵy prezıdenttik saılaýǵa túsýin qoldaıtyn azamattyń birimin. Meniń bul qoldaýymnyń eki mánisi bar:
Birinshiden, N.Nazarbaev 1991 jyldyń 1 jeltoqsanynan qolyna bılik alǵan zamannan beri KSRO kezinde turalap qalǵan eldiń ekonomıkasynyń negizin qalap, qaýipsizdigin nyǵaıtyp, ıadrolyq qarýdan bas tartyp, kóregendik saıasat júrgizdi. Osy saıası úrdistiń nátıjesinde Nazarbaevtyń saıası mektebi qalyptasty. El basqara alatyn saıası shákirtteri ósip-óndi. Olar kóp, olar saýatty, olar Prezıdenttiń tájirıbesin kórip, túsinip, sanalaryna sińdirgen myqty saıası qaıratkerler. Olar Úkimettiń, Parlamenttiń, quqyq oryndarynyń bárinde jaýapty jáne nátıjeli qyzmetter atqarýda.
Ekinshiden, Elbasynyń «Qazaqstan-2050» Strategııalyq baǵdarlamasy bar. Bul baǵdarlamanyń mánisi – elimizdi ındýstrııalyq-ınnovasııalyq memleketke aınaldyrý. Indýstrııalyq-ınnovasııalyq baǵdarlamanyń ózge balamasy joq. Indýstrııalyq eldiń memleketi lıberaldyq memleket bolatyny álemge aıan.
Lıberaldyq memleket jaǵdaıynda azamattardyń sanasy múldem jańa deńgeıge ótpek. Oılaý júıesi ózgermek. Naǵyz órkenıettik qundylyqtar qalyptaspaq. Demokratııalyq úrdister qalypty jaǵdaıǵa aınalmaq.
Osy ındýstrııalyq-ınnovasııalyq baǵdarlamanyń óreli salasynyń biri – «Nurly Jol». Jol – ekonomıkalyq úrdisti jańa deńgeıge alyp shyǵatyn logıstıkalyq-aqparattyq-kommýnıkatıvtik-órkenıettik is-shara. Jol – barlyq qazaqstandyqtarǵa olardyń san qıly múmkinshilikterin iske asyratyn asa qajetti jaǵdaı. Muny barsha qazaqstandyqtar sezip, bilip otyr. Sondyqtan men aldaǵy prezıdenttik saılaýǵa Nursultan Ábishulynyń kandıdatýrasy usynylýy barshamyzdyń ortaq qalaýymyz bolatynyn basyn asha aıtýdy paryzym sanaımyn.
Ǵarıfolla ESIM,
akademık, jazýshy.
Sertke soǵar semserimiz
Búgin búkil álem kóz tigip otyrǵan kezekten tys prezıdenttik saılaý – el ómirindegi eleýli oqıǵa, halyq tarıhyndaǵy taǵdyrly kezeń. Osyndaı sheshýshi sátte oıymyzǵa eń aldymen Elbasy Nursultan Nazarbaev esimi oralady. Ol oryndy da. Sebebi, Volter aıtqandaı: «Memleketti qutqarý úshin bir ǵana uly adam jetkilikti». «Memleketti qutqarý» deıtin sóz qalam ushyna tekten tek oralǵan joq. Onyń tereń syry mynada – dúnıe dóńbekshigen myna alasapyran almaǵaıyp ǵasyrda ártúrli álemdik apattar adamzatty úreılendirip tur. Jer sharyn túgel qamtyp, tym jıi bolyp jatqan tabıǵı apattar azdaı-aq, terrorızm, dinder arasyndaǵy alaýyzdyq, ulttar arasyndaǵy arazdyqtan týǵan qarýly qaqtyǵystar, taǵy basqa da tolyp jatqan kesapat keselder dúnıejúziniń ortaq problemasy bolyp otyr. Áli tolyq sheshim tappaǵan Reseı – Ýkraına shıelenisi de alańdatady álemdi. Búkil dúnıejúzin sharpyǵan ekonomıkalyq daǵdarys kún saıyn kúsheıe túsýde. Búginde kári qurlyq Eýropanyń ózi eseńgirep tur. Kúni keshege deıin ekonomıkasy gúldengen, tarıhı tamyryn tereńge jaıǵan Grekııa da kúıi ketip, kúıreýdiń az-aq aldynda.
Prezıdent N.Á.Nazarbaev ótken jyly jeltoqsan aıynyń 14-juldyzynda Táýelsizdik merekesine oraı jasaǵan baıandamasynda bylaı dedi: «Tutas dúnıeni sharpyǵan daǵdarystar búgingi kúnniń basty sıpatyna aınalýda. Jahandyq ekonomıka kezekti ret soqtyqpaly, soqpaqsyz jolǵa aıaq basty. Sondyqtan, biz aldaǵy syn-qaterlerge daıyn bolýǵa tıispiz. Biz jaǵdaı shıryqqan saıyn shynyǵýǵa, kedergige kezdesken saıyn kelesi serpiliske qýat jınaýǵa daǵdylandyq. Alysty kózdegen damý jolynda kezdesetin ýaqytsha kedergilerge moıymaımyz. Eńseni túsirmeı, erteńge senimmen qaraımyz».
Seriniń sertke soqqan semserindeı osy sóz halyqtyń jigerin janydy. Soǵan oraı:
Qıyndyq degen qamal bar,
Qaısarlar jaryp ótetin.
Eńbek degen baqyt bar,
Erinbegen jetetin.
Jalqaýǵa baqyt jolamas,
Qaıyrylmaı oǵan ketetin, – dep jazǵanbyz.
Dúnıe dóńbekshigen osyndaı almaǵaıyp alasapyran ýaqytta Qazaqstan halqy Assambleıasy kezekten tys saılaý ótkizý jaıly bastama kóterip, ony Qazaqstannyń kópultty, bir maqsattaǵy halqy qyzý qoldady. Osyǵan oraı Elbasy N.Á.Nazarbaev Qazaqstan halqyna Úndeý joldady.
Elbasynyń Úndeýinde aıtylǵan «birlik pen bereke, shańyraqtaǵy shattyq» Kúltegin aıtqan: «Halqyna – begi, begine – halqy sengen elde» ǵana bolady. Qudaıǵa shúkir, Qazaqstan dál osyndaı el!
Bıyl ótkeli otyrǵan prezıdenttik saılaýdyń tıimdiligi aıdan anyq. Keler jyldyń kúntizbesinde parlamenttik saılaý tur. Eki saılaýdyń qatar ótýiniń qıyndyǵy óz aldyna, tıimsizdigi taǵy bar. Bul – bir. Ekinshiden – qazirgideı kúrmeýi qatty asa kúrdeli kezeńde synnan ótken, álem áldeqashan moıyndaǵan, el baǵyna týǵan tulǵa Nursultan Ábishuly Nazarbaevqa senim bildirip, «Saılaýǵa tús, elińdi baqytqa bastaýdyń aýyr júgin taǵy da óziń arqala» desek, ol bul tilekti qabyl alyp, qaıta saılansa, el sengen tulǵaǵa álem de senedi. «Birlik pen berekeniń, shańyraqtaǵy shattyqtyń» berik kepili sol! Sebebi, arqaly aqyn Ǵafý Qaıyrbekovtiń sózimen aıtsaq:
Synǵa túsken ekiudaı tusta myna,
Qaramaıdy ol baqytqa,
Bas qamyna,
Laıyq ol baıqasaq qazaq túgil
Álemdi de ádemi basqarýǵa.
Hadıste aıtylǵandaı: «Jer betindegi ǵulama danyshpandar aspandaǵy juldyzdarǵa uqsaıdy. Jerde de, sýda da juldyzdarǵa qarap jol tabýǵa bolady. Juldyzdar bolmasa adasýy múmkin». Álemdegi ár el, ár halyqtyń adastyrmas óz juldyzdary bar. Qazaqstannyń adastyrmas aq juldyzy, baq juldyzy – Nursultan Ábishuly Nazarbaev!
Olaı bolsa Nurekeńe:
Týǵan ersiz qazaǵymnyń baǵyna,
Qut-bereke darı bersin taǵyńa.
Elimizdi baqytqa óziń bastaı ber,
Jeńisińmen qýanta ber taǵy da! –
dep tilek aıtamyz.
Sábıt DOSANOV,
jazýshy, Memlekettik syılyqtyń laýreaty.
Bekem bel býǵany kerek
Qazaqstan halqy Assambleıasynyń Keńesi bastamashylyq tanytyp aıtqan bıyl kezekten tys prezıdenttik saılaý ótkizý jónindegi usynysy halyqtyń qoldaýyna ıe boldy. Otanymyzdyń barlyq óńirinen úlken-kishi Memleket basshysyna óz tilekterin bildirdi. Soǵan oraı, Nursultan Ábishuly óz Úndeýin jarııalady. Men Úndeýdi oqyp otyryp, búkil álem, onyń ishinde Qazaq eliniń búkil tynys-tirshiligimen tanysqandaı boldym.
Men, Úndeýdi oqyǵan soń, álemdik isterdiń uıytqysy bolyp, sonyń oń sheshilýine keleli úles qosyp júrgen Nursultan Nazarbaevtyń kezekten tys prezıdenttik saılaýǵa túsýi qajet degen berik baılamǵa kelip otyrmyn. Osyndaı aýmaly-tókpeli zamanda bul jumysty tek Nursultan Ábishuly ǵana aıaǵyna jetkizip, qazirgi bereke-birlikke uıyǵan baqytty ómirimizdi, tórtkúl dúnıege tanylǵan abyroı-bedelimizdi jalǵastyrady dep oılaımyn.
О́ıtkeni, álemde qanshama daǵdarystar, qıyndyqtar bolyp jatqanmen, oǵan Qazaqstan jurtyn uryndyrmaı, kemel oı, aqyl-parasatymen bıikten bıikke kóterip kele jatqan tek qazirgi Elbasy ekenin biz ǵana emes, basqalar da jaqsy sezip otyr. Tórt qubylasyn túgendep, jurtyn jumyldyrǵan mundaı basshy óziniń alǵa qoıǵan asýlaryn, ıaǵnı «Qazaqstan-2050» Strategııasyn, «Nurly Jol – bolashaqqa bastar jol» atty Joldaýyn dittegen jerine jetkizýin qalaımyz.
Prezıdent bul saılaýǵa qatysýy jaıly sheshimdi keıinirek aıtatynyn Úndeýde bildirgen eken. Biz, aýyl sharýashylyǵy salasyn zerttep, zerdelep, Otanymyzdyń bolashaǵyna qajet mamandar daıyndap júrgen ǵalymdar ortaq elimizdiń bolashaǵy úshin, memleketimizdiń Kók týyn bıikte jelbirete berý jolynda Nursultan Ábishulynyń bekem bel býyp saılaýǵa túsýin qalaımyz.
Rahymjan ELEShEV,
akademık.
Saılaýǵa túskenin qalaımyn
Elbasy Nursultan Nazarbaev sekildi asa bıik tulǵaly qaıratkermen tanys bolý kez kelgen adamnyń taǵdyryna jazyla bermegen bolar. Sonaý ótken ǵasyrdyń 70-shi jyldary osyndaı múmkindik maǵan týǵan bolatyn. Ol kezde men Qazaqstan temirjoly Qostanaı bólimshesiniń bastyǵy edim. Biz Sokolov-Sarybaı ken óndirý birlestiginen ystyq temir jentegin Qaraǵandy metallýrgııa kombınatyna jetkizetin edik. Nursultan Ábishulynyń aralasýymen, sol kisiniń arqasynda sol kúrdeli ýaqytta kombınatqa shıkizatty yrǵaqty jetkizý máselesin sheshken edik.
Meniń jasym búginde toqsannan asty. Adamı tirlikte men Nursultan Ábishulynan bir múshelden asa úlken adammyn, ómirlik tájirıbem de bar. Sol kezdesýde-aq jas jigittiń kóshbasshylyq qasıetin tanyǵan edim. Jyldar ótti, keıin Nursultan Ábishuly Qazaqstandy basqarý tizginin qolyna aldy. Endi Táýelsizdigin alǵan elge aýyrtpalyq ákelgen jyldarǵa taǵy da kýá boldyq. Sonyń barlyǵynan Elbasymyzdyń sara saıasaty arqasynda júgimiz aýmaı ótip kelemiz. Qazir damýdyń jolyna tústik. Meniń sonaý bir jyldarǵy ishki túısigimniń aldamaǵanyn ózim maqtanysh etemin.
Elbasy Nursultan Nazarbaevtyń Qazaqstan halqyna Úndeýin tyńdadym. Taǵy da qadaý-qadaý máselelerdi ortaǵa saldy. Sonyń eń bastysy – tynyshtyq. Álemdi dúrliktirgen qarjy-ekonomıkalyq daǵdarysqa baılanysty bıýdjetti ońtaılandyrý jumysy da túsinistikpen júrgizilip otyr. «Qoıyp ishseń qoı qalady, tartyp jeseń taı qalady» deıdi meniń qazaq dostarym. Qazaq dalasy talaı quqaıdy kórgen. Áıteýir aınaladaǵy sekildi qan tógilmese boldy.
Qalǵan qıyndyqtyń barlyǵy da er moınyna amanat, onyń esebi tabylady. Daǵdarys qaıyrlap turyp qalatyn keme emes, ol da ótkinshi qubylys. Ár elge syn bolýy da yqtımal. Al mundaı kezeńde eldiń tizginin syndarly saıasatker, tájirıbesi de mol, halyqaralyq bedeli de joǵary adamnyń ustaǵany maqul.
Bertran RÝBINShTEIN,
Uly Otan soǵysynyń ardageri,
Qostanaı oblysynyń qurmetti azamaty.
QOSTANAI.
Kemel keleshegimizdiń kepili
Men óz basym ómirimizdiń kóktemi sııaqty jas kezimizde, sol ýaqyttaǵy ataǵy búkil Odaqqa jaıylǵan Qazaqstan Magnıtkasynda, kómir shaınap, ot búrikken domna peshiniń janynda halqymyzdyń bolashaq Elbasy Nursultan Nazarbaevpen kezdesip, tanysyp, áńgimeleskenimdi, ol týraly qazaq baspasózinde alǵashqy bolyp ocherk jazǵanymdy árdaıym maqtanysh tutamyn.
Toqsanynshy jyldardyń basyndaǵy halqymyzdyń ǵasyrlar boıǵy armany oryndalyp, táýelsizdikke qolymyz jetkeni, biraq sonymen birge burynǵy Odaq ydyrap, ekonomıkamyz kúırep, kúızelip, turmys shatqaıaqtap, jumyssyzdyq, berekesizdik jaılap, bolashaǵymyz bulyńǵyr tartyp, asa aýyr kúnder týǵany esimizde. Tarıhymyzdyń sondaı qıyn, almaǵaıyp sátinde halqymyz óziniń tańdaýyn jasap, el tizginin Nursultan Ábishuly Nazarbaevqa ustatty. Bul tańdaýdyń qanshalyqty durys bolǵanyn sodan bergi ýaqyt tolyǵynan dáleldedi. Elbasynyń kúni keshegi Qazaqstan halqyna Úndeýinde aıtylǵandaı, ótken 23 jyl ǵasyrǵa bergisiz jyldar boldy. Prezıdentimizdiń kemel basshylyǵynyń arqasynda respýblıkamyz barlyq qıynshylyqtardan, syndardan múdirmeı ótti. Shekaralary aıqyndalǵan, ekonomıkasy damyǵan, kók baıraǵy kókke jelbiregen, álem tanyǵan, halyqaralyq bedeli zor, táýelsiz, qýatty memleketke aınaldy. Halyqtyń turmysy túzeldi. Muny baqyt demegende ne deısiz. Alaıda, baqyt baǵalaı bilgenniń ǵana basynda turady degen de sóz bar. Muny umytpaǵan jón. Búgin biz óz keleshegimizge úlken úmitpen, senimmen qaraımyz.
Osy ǵasyrdyń basynda, Reseıde shyǵatyn úlken gazetterdiń birinde jazylǵan mynadaı pikir jadymda qalypty. Ondaǵy aıtylǵan oı mynadaı: biz, Reseı, jańa reforma dep, ony óıtý kerek, muny búıtý kerek dep, jamyraı pikir aıtyp, jantalasa qımyldap jatqandaı kúı keshemiz. Qazaqstan ol kezde tynysh. Arada biraz ýaqyt ótedi. Qazaqstan eshqandaı dabyrasyz, daý-damaısyz, óz Prezıdentiniń basshylyǵymen áldeqandaı utymdy tetikti iske qosady da, endi bir qarasaq, bizden ozyp, aldymyzda ketip bara jatady degen pikir. Gazet muny sol kezde «Fenomen Nazarbaeva» dep ataǵan edi. Mundaıǵa qalaı qýanyp, masattanbaısyz. Elimizdiń búgingi qol jetkizgen keremet tabystary túptep kelgende Elbasymyzdyń kemel aqyl-oıynyń, óz elin tek qana durys jolmen bastap kele jatqan kóregendiginiń, kemeńgerliginiń, janqııarlyq eńbeginiń arqasy ekeni kúmánsiz.
Saılaý kúni belgilendi. Endigi másele – saılaýǵa kimderdiń túsetininde. Barsha jurt úshin bir jaıdyń basy ashyq – eldegi prezıdenttik saılaýǵa Elbasymyzdyń túsýi kerek. Keshe Almaty jaqtan jaqsy habar estidim. Jazýshylar qaýymy aldaǵy saılaýǵa Nursultan Nazarbaevtyń túsýin suraǵan sheshim qabyldapty. Men de osy usynysqa qosylamyn. Muny halqymyzdyń armandaǵan bıikterine qol jetkizýiniń, kemel keleshegimizdiń kepili dep bilemin.
Bolat BODAÝBAI,
jazýshy, Qazaqstannyń eńbek sińirgen qaıratkeri, halyqaralyq «Alash» syılyǵynyń ıegeri.
Biz qazaq halqymen, Elbasymen birgemiz!
2015 jyldyń 14 aqpanynda Qazaqstan halqy Assambleıasynyń Keńesi elimizde kezekten tys prezıdenttik saılaý ótkizý týraly bastama kótergeni málim. Bul bastama barsha qazaqstandyqtar tarapynan jáne demokratııalyq kúshterdiń «Qazaqstan-2050» jalpyhalyqtyq koalısııasy tarapynan qoldaý tapty.
О́zge ult ókilderin ózekke teppeı, baýyryna alǵan qazynaly Qazaq elin meken etip otyrǵan barsha ult ókilderi ózderiniń balalary men keler urpaqtarynyń beıbit te berekeli, tynyshtyq pen turaqtylyqtyń týy jelbiregen Qazaqstandaı elde jaqsy ómir súrgenin qalaıdy. Bolashaq ómir barshamyzdy alańdatady. El ishinde tatýlyq pen dostyq qatynas nyǵaıa berý úshin bizdiń barshamyz úlken jaýapkershilikpen atsalysamyz.
Biz Qazaqstannyń ishki-syrtqy saıası ustanymyn tolyqtaı qoldaımyz. Bul – birinshi kezekte elimizdiń qaýipsizdigi degen sóz. Osyndaı jahandyq kúrdeli máselede asa joǵary jetistikterge qol jetkizý úshin bárimiz Elbasynyń tóńiregine toptasa bilýimiz kerek.
Memleket basshysynyń ustanǵan baǵdary men kóregen saıasatynyń arqasynda búginde Qazaqstan álemdik dárejede eń turaqty qoǵam men damýshy el retinde óz beınesin aıqyndap úlgerdi. Qazaq elin meken etken árbir shańyraqta shat kúlki men berekeli ómir, teńdik pen teń quqyqtyq, ashyq aspan men merekeli kúnder jeterlik. Bul – bizdiń ortaq qýanyshymyz!
Memleket basshysy Nursultan Nazarbaevtyń elimizde kezekten tys prezıdenttik saılaý ótkizý týraly Jarlyqqa qol qoıǵanyna shyn kóńilden rızashylyǵymyzdy bildire otyryp, biz ol kisiden óz kandıdatýrasyn osy saılaýǵa usynýyn suraǵymyz keledi. О́ıtkeni, bizder, kıeli de qasterli Qazaq elin meken etýshi ózge ult pen ulys ókilderi, óz taǵdyrymyzdy Elbasyna senip tapsyra alamyz.
Knıaz MIRZOEV,
Qazaqstandaǵy kúrdterdiń «Barbang» assosıasııasynyń prezıdenti.
ALMATY.
Saılaý úderisi
joǵary demokratııalyq standarttarǵa saı uıymdastyrylatyn bolady
Syrtqy ister mınıstrliginde Erlan Ydyrysov Qazaqstanda akkredıttelgen dıplomatııalyq ókildikterdiń basshylaryna elimizde josparlanyp otyrǵan prezıdenttik saılaýǵa baılanysty brıfıng ótkizdi. Dıplomatııalyq korpýs ókilderi aldynda sóz sóılegen E.Ydyrysov, Qazaqstannyń jańa syndarly damý kezeńine kirgenin atap ótti. «Másele munaı baǵasynyń quldyraýy, Reseıge salynǵan sanksııalar yqpaly sekildi ekonomıkalyq faktorlardyń qysymynda, ýkraındyq daǵdarys pen Halyqaralyq koalısııa kúshteriniń Aýǵanstannan shyǵarylýymen baılanysty óńirdegi turaqsyzdyqta. Bizdiń elimizdi jáne jalpy alǵanda bizdiń óńirimizdi synaqtar kezeńi kútip tur», dedi mınıstr. Sonymen qatar, ol Qazaqstanda zamanaýı qaýip-qaterler týraly tolyq túsinik bar ekenin jáne olardy eńserýge anyq jospar men qorlar bar ekenin jetkize otyryp, orta merzimdi jáne uzaq merzimdi damý baǵdarlamalary turaqtylyqty, gúldený men elimizdegi ómir súrý sapasyn arttyrýǵa baǵyttalǵanyn erekshe atap ótti. «Prezıdent usynǵan «Nurly Jol» baǵdarlamasyn, sonymen qatar, «Qazaqstan-2050» Strategııasy men álemniń eń damyǵan otyz eli qataryna kirý sekildi uzaq merzimdi basymdyqtardy iske asyrý belsendi jumys pen basymdyqtarǵa aıqyn nazardy shoǵyrlandyrýdy talap etedi. Qazir Úkimetten birizdi, tıimdi, keıbir kezderi erik-jigerli is-áreketter talap etiledi», dep qosty QR SIM basshysy. 26 sáýirde ótetin kezekten tys prezıdenttik saılaý týraly aıta kele, QR SIM basshysy sheteldik dıplomattardyń nazaryn jańa mandat memleket pen onyń basshylyǵyna alǵa qoıylǵan tapsyrmalardy júzege asyrýǵa tez arada kirisýge jáne aldaǵy kezeńde syrtqy faktorlardyń teris áserlerine tótep berý úshin belsendi jumys atqarýǵa, alǵa qoıylǵan maqsattardy atqarýdy jáne elimizdegi halyqtyń ómir súrý sapasyn arttyrýdy qamtamasyz etýge múmkindik beretinine aýdardy. Prezıdenttik saılaýdyń uıymdastyrý máselelerine toqtala kele, ol qazaqstandyq tarap saılaý úderisin joǵary demokratııalyq standarttarǵa saı uıymdastyrýdy qamtamasyz etý úshin barlyq múmkin sharalardy qabyldaıtynyn erekshe aıtyp ótti. «Ortalyq saılaý komıssııasy EQYU jáne basqa da bedeldi halyqaralyq uıymdardyń budan buryn jasaǵan usynystaryn eskere otyryp, saılaýdy ótkizýdiń joǵary uıymdastyrý dárejesin qamtamasyz etetindigine senemin, al basqa múddeli organdar olardan Qazaqstan zańnamasy talap etetin sharalardy júzege asyrý úshin bar kúsh-jigerin salady», dep málimdedi E.Ydyrysov. Sonymen birge, ol Syrtqy ister mınıstrligi dıplomatııalyq korpýs ókilderin, halyqaralyq uıymdardy, sheteldik baıqaýshylar men buqaralyq aqparat quraldaryn saılaýǵa baqylaý júrgizýleri úshin shaqyratyny týraly habardar etti. «Biz saılaý úderisiniń ashyqtyq, ádilettilik jáne básekelestik qaǵıdalaryna, azamattardyń ishki zańnama normalaryna jáne halyqaralyq standarttarǵa saı óz oılaryn erkin bildirýin qamtamasyz etýge beıimdiligimizdi rastaımyz», dep Qazaqstan syrtqy saıasat vedomstvosynyń basshysy sózin túıindedi. «Egemen-aqparat».
Biraýyzdan qoldady
«Nur Otan» partııasy «Mádenıet» bastaýysh uıymynyń jınalysy boldy. Onda «Nur Otan» partııasy «Birlik» fılıaly «Mádenıet» bastaýysh partııa uıymy quramyndaǵy mádenıet jáne óner qaıratkerleri, sport ókilderi Qazaqstan halqy Assambleıasy Keńesiniń kezekten tys prezıdenttik saılaý ótkizý týraly bastamasyn qoldady. Ulttyq akademııalyq kitaphana dırektory Úmithan Muńalbaeva kezekten tys ótetin prezıdenttik saılaýǵa partııa Tóraǵasy N.Á.Nazarbaevtyń kandıdatýrasyn usynyp, sóz sóıledi. – Tarıhı ólshem turǵysynan alǵanda, asa qysqa ýaqytta Elbasy Nursultan Nazarbaevtyń basshylyǵymen elimizde ekonomıkalyq jáne saıası turǵyda ǵana emes, áleýmettik salalarda da edáýir jumystar júzege asyrylýda. Qarapaıym adamdar eshqashan nazardan tys qalyp kórgen joq. Álemdegi túrli jaǵymsyz qubylystarǵa, ekonomıkalyq keleńsiz jaǵdaılarǵa qaramastan, Elbasy memleketimizdiń áleýmettik mindetterin qorǵap, óziniń nyq ustanymyn kórsetti, – dedi Ulttyq akademııalyq kitaphananyń dırektory. Ol Elbasynyń memlekettik saıasatyn qazaqstandyqtardyń qoldaıtynyna senim bildirdi. Bul usynysqa belgili qoǵam qaıratkeri, fılosofııa ǵylymdarynyń doktory, professor Ǵarıfolla Esim de qosyla otyryp, kezekten tys prezıdenttik saılaýda partııa Tóraǵasynyń kandıdatýrasyn qoldaý árbir nurotandyqtyń patrıottyq boryshy ekenin tilge tıek etti. «Bolashaq» baǵdarlamasynyń túlegi (City Univercity London), ónertaný magıstri Ermek Raqymovtyń pikirinshe, elimizdiń, partııamyzdyń tarıhy kórsetip otyrǵandaı, Qazaqstan Prezıdenti – memleketimizdiń odan ári damýynyń senimdi kepili. Bizdiń ujymda jumys jasaıtyn bolashaqtyqtardyń atynan «Bolashaq» prezıdenttik baǵdarlamasy boıynsha álemniń eń úzdik joǵary oqý oryndarynda bilim alýǵa múmkindik bergeni úshin alǵys aıta otyryp, ózin usynǵan jaǵdaıda prezıdenttik saılaýda Nursultan Ábishulynyń kandıdatýrasyn qoldaıtynymdy aıtqym keledi dedi ol. Sport ókilderi – «Astana Arena» stadıonynyń dırektory Baýyrjan Muqashev, 2014 jylǵy Azııa oıyndarynyń júldegeri Danabek Sýjanov ta saılaýǵa túsken jaǵdaıda N.Á.Nazarbaevtyń kandıdatýrasyn qoldaıtynyn bildirdi. – Elimizdiń barlyq sportshylary atynan biz aldaǵy bolatyn prezıdenttik saılaýda, eger Elbasy saılaýǵa túsken jaǵdaıda, Nursultan Nazarbaevtyń kandıdatýrasyn qoldaımyz, – dep málimdedi. «Nur Otan» partııasy «Birlik» fılıaly «Mádenıet» bastaýysh partııa uıymynyń músheleri aldaǵy bolatyn Qazaqstan Respýblıkasy Prezıdentiniń kezekten tys saılaýyna qatysý úshin Nursultan Nazarbaevtyń kandıdatýrasyn usynýǵa biraýyzdan daýys berdi. «Egemen-aqparat».Damýdyń basty baǵdary
Qazaqstan Respýblıkasy Ulttyq ınjenerlik akademııasynda kezekti sessııa bolyp ótti. Sessııa qatysýshylary 2015 jyldyń 26 sáýirine belgilengen kezekten tys prezıdenttik saılaý ótkizý týraly Elbasy N.Á.Nazarbaevtyń sheshimin biraýyzdan qoldady. Akademııa prezıdenti Baqytjan Jumaǵulov óziniń sessııany ashar alǵy sózinde Memleket basshysynyń saılaýdy ótkizý jónindegi Qazaqstan halqyna Úndeýiniń mánine keńirek toqtalyp ótti. – Geosaıası qarama-qaıshylyqtar asqynyp turǵan jaǵdaıda qazaqstandyqtardy ulttyq qaýipsizdigimiz alańdatady, halqymyz Prezıdent Nursultan Nazarbaev júrgizip otyrǵan ishki jáne syrtqy saıasatymyzdyń turaqtylyǵyn qoldaıdy, – dedi sheshen óz sózinde. Sessııa qatysýshylary – ǵalymdar, ınjenerler, óndiristiń belgili mamandary, iri kompanııalar men uıymdardyń jetekshileri ózderiniń sózinde beıbitshilik pen kelisim – jalpyhalyqtyq basty jetistik ekenin aıtyp, ony qorǵap, kúndelikti eńbegimizben nyǵaıtyp otyrýymyzdyń qajettigine basa nazar aýdardy. Elbasy aıtqandaı, «Birlik jáne turaqtylyq – bul bizdiń jaýapty tańdaýymyz! Bul – Otanymyz damýynyń basty formýlasy». Sessııa jumysynda ǵylymı-zertteýlerdi júzege asyrý boıynsha birqatar akademık – Ýálıhan Bıshimbaev, Uzaqbaı Qarabalın, Asqar Qulybaev, Nádir Nádirov sııaqty ǵalymdar shyǵyp sóılep, óz oılarymen ortaqtasty. Sessııa jumysynyń sońynda professor Turlybek Ysqaqovqa О́.Joldasbekov atyndaǵy syılyq, professor Aleksandr Trofımovke Sh.Shókın atyndaǵy syılyq, jas ǵalym Dılnara Zakırovaǵa Q.Turysov atyndaǵy syılyq tapsyryldy. Sharafaddın ÁMIROV, «Egemen Qazaqstan». Almaty.
