TARAZ. 15 mamyr. Jambyl oblysy Talas aýdanynyń ortalyǵy – Qarataý qalasynda belgili aıtys aqyny Shorabek Aıdarovtyń 60 jasqa tolýyna oraı respýblıkalyq aıtys ótti. Bul týraly egemen.kz tilshisi habarlady.
«Shoq tildi shaıyr – Shorabek» atty bul jyr dodasyna elimizdiń túkpir-túkpirinen 20 aıtysker qatysty. Aıtysqa elimizge belgili azamattar Bekbolat Tileýhan, Muhamedjan Tazabekov, aqyndar Qaıyrbek Asanov, Shyryn Mamaserikova, jazýshy Kósemáli Sáttibaı qazylyq etti.
Bir kúnge sozylyp, Talas jerin jyrǵa bólegen bul dodanyń bas júldesine Aınur Tursynbaeva laıyq dep tanyldy. Bas júldegerge 1 mıllıon teńge tabys etildi. Birinshi orynǵa astanalyq Serikzat Dúısenǵazın, ekinshi oryndarǵa Almaty oblysynan kelgen Aıtaqyn Bulǵaqov pen jambyldyq Altynkúl Qasymbekova, al úshinshi oryndarǵa shymkenttik Aqmaral Leýbaeva men jambyldyq Kúmiskúl Sársenbaeva ıe boldy.
Jambyl oblysy ákiminiń orynbasary Erqanat Manjýov pen Talas aýdanynyń ákimi Bolat Rysmendıev toı ıesin arnaıy quttyqtap, aq boz at mingizdi. Al, tarazdyq kásipker Shorabaev Aıdarovqa temir tulpardyń kiltin tabys etti.
Oralhan Dáýit.
Derek, sýret: egemen.kz.
