Máskeýde jolbarys eti men adam qoldaryn satýshylar ustaldy

ASTANA. 15 mamyr. Máskeýde amýr jolbarysynyń eti men adam qoldaryn satqan eki Vetnam azamaty qolǵa tústi. Bul týraly vesti.ru habarlady. Jolbarystyń Qyzyl kitapqa engizilgenine qaramastan, saýdagerler ony ashyq jarnamalaǵan. Tipti jergilikti gazetterdiń birine saýdalary týraly habarlandyrý da bergen. Tintý kezinde Máskeý polıseıleri budan basqa da kútpegen jaıttarǵa tap boldy. Polıseıler jarnama arqyly tutynýshy retinde habarlasyp, saýdagerlerdi kezdesýge shaqyrady. Olar jolbarystyń basyn satyp alý jóninde sóılesken. Qazirgi tańda atalǵan ańnyń sany álem boıynsha 1 myńǵa da jetpeıtinin aıta keteıik. Jolbarystyń tisinen sheberler qymbat áshekeı buıymdar men kishkentaı músinder jasaıdy. Sondaı-aq, ústel saǵattaryn ásemdep, kómkerý úshin de qoldanylady. Sol sebepti, tek tisiniń baǵasy shamamen 10 myń AQSh dollaryn quraıdy. Ustalǵan vetnamdyqtar Máskeýdiń Lıýblıno aýdanyndaǵy páterlerdiń birinde turǵan. Sol jerge túnde ólgen jolbarystardy alyp kelip, etterin bólshektegen. Páterdegi eki muzdatqysh jolbarys etimen toltyrylǵany belgili boldy. Mundaı ettiń kılosy jabaıy saýdada 2 myń dollardan qymbatqa baǵalanady. Biraq bul saýdagerlerdiń etti qaıda jiberip otyrǵandary ázirge belgisiz. Osy rette Máskeýdegi keıbir meıramhanalarda jolbarys etinen ekzotıkalyq as daıyndalatynyn aıta ketken jón. Tártip saqshylarynyń biri bul qylmys jóninde: «Jarnamada aq jolbarystyń sýreti boldy. Al muzdatqyshta jatqany jıren tústi. Sondyqtan barlyǵyn eritip, naqtylaý kerek», – deıdi. Búginde polıseıler quryp bara jatqan ańnyń Máskeýge qaıdan ákelingenin anyqtaýda. Sonymen qatar, tártip saqshylary páterdi tintý barysynda taǵy bir dorbany tapqan. Alǵashynda jolbarystyń tabandary dep qabyldaǵan olar, ashqan kezde jantúrshigerlik kóriniske kýá boldy. Sebebi, dorbanyń ishinde adamnyń qoldary jatqan edi. Qazir osy derekter boıynsha qylmystyq is qozǵalyp, tergeý jumystary qolǵa alyndy. Elaman Qońyr. Derek, sýret: vesti.ru.