ASTANA. 16 mamyr. Túriktiń belgili kıno akteri Býrak О́zchıvıt Astanaǵa keledi. Kıno «juldyzynyń» Qazaqstanǵa sapary «Mahabbatym saǵan uqsaıdy» fılminiń tusaýkeseri aıasynda uıymdastyrylýda. Bul týraly «Qazaqstan» teleradıokorporasııasynyń baspasóz qyzmeti habarlady.
Býrak О́zchıvıt qazaqstandyq kórermenderge «Súleımen sultan» telehıkaıasyndaǵy Malkochoglý Balı beı róli arqyly tanymal.
Sapar aıasynda ol 23 mamyr kúni «Arman 3D Azııa park Astana» kınoteatryndaǵy gala-keshke qatysady. Sondaı-aq, «Qazaqstan» telearnasynyń túsirilim alańyna kelip, belgili «Túngi stýdııada Nurlan Qoıanbaev» túngi shoýynyń qonaǵy bolady dep josparlanýda. Atalǵan baǵdarlama «Qazaqstan» telearnasynyń efırinde 26 mamyr kúni saǵat 23:30-da kórsetiledi.
Býrak – akterlikten buryn model bolǵan. 2005 jyly túriktiń ulttyq Best Model of Turkey atty sulýlyq saıysynyń jeńimpazy atandy. Al álem boıynsha ótkizilgen Best Model of the World saıysynda 2-orynǵa ıe boldy.
Shyǵarmashylyq jolyn Eýropanyń tanymal brendterin jarnamalaýmen bastady. 2014 jyly Ystambul qalasynda óziniń Balibey Döner atty jeke meıramhanasyn ashqanyn aıta keteıik.
Elaman Qońyr.
Derek, sýret: «Qazaqstan» teleradıokorporasııasynyń baspasóz qyzmeti.
