О́ner arqaýy – halyq dostyǵy

Aqtóbe qalasyndaǵy Qazaq­­­­stan halqy Assambleıasy ǵıma­ra­tyn­da HVI «Qazaqstan – dostyqtyń mekeni» atty halyq dostyǵynyń oblystyq festıvali ótkizildi. Festıvalǵa oblystyq Dostyq úıiniń etnomádenı birles­­tikteriniń shyǵarmashylyq ujym­dary, án-bı ansamblderi qatysty. Qazaqstan halqy Assam­bleıa­synyń 20 jyldyǵyna oraı on altynshy ret ótkizilip otyrǵan festıvaldiń maqsaty – óńirde turyp jatqan etnostardyń tili men salt-dástúrin, jalpy, qazaq­­standyq mádenıetti, rýhanı birlikti, halyqtar arasyndaǵy dos­tyq­ty, ulttyq tól mádenıetti qalyptas­tyrý men damytý, nasıhattaý bolyp tabylady. Mádenı shara­nyń shymyldyǵyn «Dostyq sazy» halyqtyq-folklorlyq ansam­bli «Ilme» kúıimen ashty. Sodan keıin sahnaǵa kóterilgen ánshi Gúlmars Amanbaeva Ǵarı­folla Qurmanǵalıevtiń «Sálem» ánin sánine keltire shyrqady. Festıvaldiń saltanatty ashy­lýynda sóz alǵan oblystyq má­denıet, muraǵattar jáne qu­jat­tama basqarmasynyń basshysy Názıra Tabyldınova óńirde toqsannan astam ulttyń ókilderi tatý-tátti turyp jatqanyn, olar­dyń tilin, salt-dástúrin jáne ónerin saqtaýǵa jáne damytýǵa jan-jaqty jaǵdaı ja­salyp otyr­ǵanyn tilge tıek ete kelip, búgingi mádenı sharanyń ma­ńyzy zor eke­nin atap ótti. Festı­­val­ǵa qatysý­shylardyń óner bıi­gi­­ne kó­te­rile berýlerine sáttilik tiledi. Budan keıin sahnaǵa etnomádenı birlestikterdiń ónerpazdary kóte­rildi. Osyndaǵy «Slavıane» orys etnomádenı birlestiginiń ánshisi Vıktorııa Sýraı oryndaǵan «Zemlıa Kazahstana» áni týǵan jer­ge degen súıispenshilik sezim­ge bóledi. Odan keıin ortalyq­tyń kórkemónerpazdar ujymy bir­neshe orystyń halyq ánderin oryndap, bılerin bıledi. Babık Azızov jetekshilik etetin ázer­baı­jan­dardyń «Azerı» bıshi jigit­ter toby qyzýqandylyqpen shalt qımylmen oryndaǵan «Kav­kaz halqynyń bıleri» de kórermen kóńilinen shyqty. Al, «Vıara» bol­gar etnomádenı birles­­­tiginiń tóraıy­my Anastasııa Podo­lıanova «Shat­tyǵym – ánim» ánin qazaqsha tógilt­kende súısinbegen jan qalmady dese bolady. Bir qyzyǵy – bul ánniń sózi men ánin jazǵan da bolgar ultynyń ókili Natalıa Bosh­kova. «Shattyq» tatar-bashqurt etnomádenı bir­lesti­giniń ánshiler toby oryn­daǵan tatardyń «Aı-janym» jáne bashqurttyń «Gúlnázıra» ánderi de júrekterge jyly sózim uıalatty. Odan keıin de oblys­taǵy on toǵyz etnomádenı birles­tikterdiń ónerpazdary kezekpen sahna tórine kóterilip, ónerlerin kórsetti. Bul óńirde turatyn halyq­tardyń óneri bir arnada toǵys­qan saltanaty kelisken shara retinde kópshiliktiń kóńilin­de qaldy. San tilde, alýan daýys­ta astasqan mádenı shara qyzǵylyq­ty ótkeni sonshama kórermen­der qatary konserttik baǵdar­lama aıaqtalǵansha sıremedi.   Satybaldy SÁÝIRBAI, «Egemen Qazaqstan». Aqtóbe oblysy.