Ishki ister qyzmetiniń otstavkadaǵy polkovnıgi, otyz jyldan astam ǵumyryn quqyq qorǵaý salasyna arnaǵan Ysqaq aqsaqal sol sátte ákimdikte ótkiziletin qurmetteý rásimine ketken eken. Sondyqtan jaýmen shaıqasta kórsetken batyl qımyldary men erligi úshin «Qyzyl Juldyz» jáne «Otan soǵysy» ordenderimen marapattalǵan maıdangermen kezdese almaı qalǵanymyzǵa sál ókinish te bildirgen edik. Alaıda munyń ornyn toqsannyń ótkel bermes asýyn emin-erkin baǵyndyrǵan ekinshi maıdanger Qaıyrjan Báımenov tolyqtyrǵan-tyn. – Men soǵysqa 1942 jyldyń tamyz aıynda alyndym, – dep bastady áńgimesin «Za otvagý» medali men «Otan soǵysy» ordenderiniń ıegeri Qaıyrjan Báımenuly. – Kóp keshikpeı marshal Bagramıan basqaratyn 2-shi Baltyq maıdanyna qarasty 68-shi polktiń quramynda Lenıngrad qalasy men Baltyq boıy mańynda qııan-keski shaıqastarǵa kirisip kettik. Bizdiń maıdannyń Novosokolnıkı túbinde 3-shi Baltyq maıdanynyń jaýyngerlerimen betpe-bet kezdesip qalǵan sátteri de bar. Osyǵan bir tamasha mysal keltirgim keledi. – 1943 jyly aýyr jaraqat alyp gospıtalda emdelip shyqqannan keıin soǵysqa qaıta kirdim, – dep jalǵady áńgimesin qart maıdanger. – Bul kezde men snaıperler sapynda bolatynmyn. Qandy joryq kezinde bir tereń saıdyń ishimen kele jatyp, sál myzǵyp alýǵa toqtaǵan edik. Bir kezde ókpe tusymnan: «Baýyrym, qazaqpysyń?» – dep til qatqan áıel adamnyń daýysy estildi. Ot pen oqtyń ortasynda bul ne istep júrgen áıel degen oı sanamnan júgirip ótti de, daýys shyqqan jaqqa qaraı jalt buryldym. Áıel degenim órimdeı qyz eken. Kózderi ottaı jaınap tur.Ústinde gımnasterka. Aıaǵynda kerzi etik. Qapelimde ne derimdi bilmeı kidirip qaldym. Tek sodan keıin ǵana: – Iá, qazaqpyn, – dedim. – Qaıdansyń? – dep ol taǵy da til qatty. – Oraldanmyn, – dedim men bul joly esh irkilmesten. – Tipti jaqsy, men de sol jaqtanmyn. Ordada týyp-óstim. Esimim – Mánsııa, – dedi ol maǵan jyly júzben. – Bizdiń bul til qatysýymyz uzaqqa sozylmady. Soǵys jaǵdaıy uzaq áńgimeni kótermeıdi ǵoı. Bul qazaqtyń batyr qyzy Mánshúk Mámetova edi. Osy qaıtalanbas kórinis pen kezdeısoq kezdesý kóńilimde máńgi umytylmastaı bolyp jattalyp qaldy, – deıdi Qaıyrjan aǵa.
Temir QUSAIYN,
«Egemen Qazaqstan».
ORAL.
