Aqtóbede úzdik qyzmetkerlerge páter berildi

AQTО́BE. 30 maýsym. Aqtóbedegi Tahaýı Ahtanov atyndaǵy oblystyq drama teatrynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti ujymynyń uıymdastyrýymen memlekettik qyzmetkerler kúni atap ótildi. Oǵan oblys ákimdigi apparatynyń ókilderi, jergilikti jáne aımaqtyq atqarýshy organdardyń basshylary, sondaı-aq, memlekettik qyzmet salasynyń ardagerleri qatysty. Bul týraly egemen.kz tilshisi habarlady. Saltanatty sharada atalǵan departament basshysy Qaırat Sóntaev memlekettik qyzmet salasyndaǵylardy kásibı merekemen quttyqtady. Shara barysynda memlekettik qyzmet salasyndaǵy úlgili eńbegi úshin 5 memlekettik qyzmetker Memlekettik qyzmet isteri jáne sybaılas jemqorlyqqa qarsy is-qımyl agenttiginiń «Úzdik memlekettik qyzmetker» arnaıy tósbelgisimen marapattaldy, 2 qyzmetkerge qyzmettik páterlerdiń kilti tabys etildi. Sondaı-aq, taǵy 2 memlekettik qyzmetkerdiń omyraýyna Prezıdent Nursultan Nazarbaevtyń Jarlyǵyna sáıkes «Qazaqstan halqy assambleıasyna 20 jyl» merekelik medali taǵyldy. Sonymen qatar, sahna tórine ornatylǵan LED-ekrannan jınalǵandar departamenttiń ımıdjdik fılmi men «Biz jemqorlyqqa qarsymyz!» atty áleýmettik beınesıýjetti tamashalady. Shara sońynda jas memlekettik qyzmetkerler «Memlekettik qyzmet týraly» Zańyna sáıkes ant qabyldady. Mereke sońy konserttik baǵdarlamaǵa ulasty. Satybaldy Sáýirbaı. Derek, sýret: egemen.kz.