Elimiz ekonomıkasynyń tutqasyn ustaýshy jas mamandardy otansúıgishtikke, patrıottyq rýhta, joǵary azamattyq qasıetterge tárbıeleý maqsatyndaǵy isterdi dáıekti júrgizýimen tanymal Qaraǵandy memlekettik tehnıkalyq ýnıversıtetinde taǵylymdy mádenı shara boldy. «Uly Otan soǵysy. HHI ǵasyr jastary kózimen» atty taqyrypta ótken bul V respýblıkalyq stýdenttik ǵylymı-tájirıbelik konferensııa qatysýshylarǵa umytylmastaı áser etýimen este qaldy. Onda soǵys jáne tyl ardagerleri el basyna túsken syn kezeńdegi erlikteri men eren eńbekteri týraly estelikter aıtyp, san alýan suraqtarǵa qaıtarylǵan jaýaptar erkin áńgimege jalǵasty. «Biz jastarymyzdyń aǵa býynnyń qaısarlyq pen jalyndy jigerin qaster tutýyna súısinemiz. Búginde kórkeıýdegi elimizdi odan ári damytýǵa degen ynta-yqylastaryńyz kóńil qýantady. Urpaqtan-urpaqqa ulasqan úrdis-úlgisi jarqyraı berýin tileımiz», dedi kómir óndirisiniń iri uıymdastyrýshysy bolǵan Nıkolaı Drıdj aqsaqal.
Budan soń seksııalyq májilisterde ýnıversıtet oqytýshylary men stýdentteri Jeńiske qaraǵandylyqtardyń qosqan úlesteri jaıly tyń derekterge negizdelgen baıandamalaryn tyńdaýshylar nazaryna usyndy. Sondaı-aq, konferensııaǵa qatysýshylar jyl saıyn ótetin dástúrli óner baıqaýyna shaqyrylyp, beıbitshilik besiginde terbelgen bilim men ónerdiń qosa órilýin tamashalady. Ardagerler jastardyń jan-jaqty rýhanı ósýine súısinis bildirdi.
Aıqyn NESIPBAI, «Egemen Qazaqstan».
QARAǴANDY.
